ઉત્તર પ્રદેશ: જૌનપુરની (Jaunpur) એમપી એમએલએ કોર્ટના (MP MLA Court) નિર્ણય બાદ જૌનપુરના પૂર્વ સાંસદ બાહુબલી ધનંજય સિંહને (Baahubali Dhananjay Singh) અલ્હાબાદ હાઇકોર્ટે (Allahabad High Court) રાહત આપી હતી. હાઈકોર્ટે ધનંજય સિંહને જામીન (Bail) પર મુક્ત કરવાનો આદેશ આપ્યો હતો. જો કે હાઈકોર્ટે જૌનપુર એમપી એમએલએ કોર્ટ દ્વારા આપવામાં આવેલી 7 વર્ષની સજા પર રોક લગાવવાનો ઈન્કાર કરી દીધો હતો.
હાઈકોર્ટમાંથી જામીન મળ્યા બાદ ધનંજય સિંહ હવે જેલના સળિયામાંથી બહાર આવશે. પરંતુ 7 વર્ષની જેલની સજાને કારણે ધનંજય સિંહ ચૂંટણી લડી શકશે નહીં. ધનંજય સિંહના વકીલોએ કહ્યું હતુ કે હાઈકોર્ટે તેને હાલ પૂરતા જામીન પર મુક્ત કરવાનો આદેશ આપ્યો છે. પરંતુ સજા અટકી નથી. હવે તે સજા સામે સુપ્રીમ કોર્ટમાં અપીલ દાખલ કરશે.
અગાવ ધનંજય સિંહ વતી હાઈકોર્ટમાં ફોજદારી અપીલ દાખલ કરવામાં આવી હતી જેમાં સજા પર સ્ટે મુકવા અને જામીન પર મુક્ત કરવાની માંગ કરવામાં આવી હતી. ગુરુવારે ધનંજય સિંહની અપીલ પર સુનાવણી પૂર્ણ થયા બાદ અલ્હાબાદ હાઈકોર્ટે નિર્ણય સુરક્ષિત રાખ્યો હતો. તેમજ આજે શનિવારે પોતાનો ચુકાદો સંભળાવ્યો હતો.
ધનંજય સિંહ તેમની પત્ની માટે પ્રચાર કરી શકશે
જૌનપુર સિવિલ કોર્ટના એડવોકેટ શેષનાથ સિંહે કહ્યું કે ચર્ચા દરમિયાન પૂર્વ સાંસદને જામીન મળી ગયા છે પરંતુ જૌનપુર કોર્ટે આપેલી સજા પર હજુ રોક લગાવવામાં આવી નથી. તેથી પૂર્વ સાંસદ ધનંજય સિંહને ચૂંટણી લડવા પર રોક લગાવવામાં આવી હતી. તેમજ ધનંજય સિંહ ચોક્કસપણે ચૂંટણી લડી શકશે નહીં. પરંતુ તેઓ ચોક્કસપણે જૌનપુરમાં પત્ની માટે પ્રચાર કરતા જોવા મળશે. પૂર્વ સાંસદનો જૌનપુરમાં ખાસ્સો પ્રભાવ માનવામાં આવે છે.
ધનંજય સિંહની પત્ની બસપાની ટિકિટ પર ચૂંટણી લડી રહી છે.
જૌનપુર MP MLA કોર્ટ દ્વારા ધનંજય સિંહને દોષિત ઠેરવ્યા બાદ તેમની પત્ની શ્રી કાલા રેડ્ડી BSPની ટિકિટ પર ચૂંટણી મેદાનમાં છે. હવે જ્યારે ધનંજય સિંહને હાઈકોર્ટમાંથી જામીન મળી ગયા છે, તો તેઓ ચોક્કસપણે જૌનપુરમાં ચૂંટણી પ્રચાર કરતા જોવા મળશે.
ભાજપે જૌનપુરથી કૃપા શંકર સિંહ અને સપા ગઠબંધનમાંથી બાબુ સિંહ કુશવાહને મેદાનમાં ઉતાર્યા છે, જ્યારે ધનંજય સિંહની પત્ની બસપાની ટિકિટ પર ચૂંટણી લડી રહી છે. હવે ધનંજય સિંહ જેલમાંથી બહાર આવ્યા બાદ જૌનપુરમાં ચૂંટણી ત્રિકોણીય હોય તેવું લાગી રહ્યું છે.
