દુલીપ ટ્રોફી 2026-27માં હવે ખિતાબ માટેનો અંતિમ મુકાબલો નક્કી થઈ ગયો છે. ઈસ્ટ ઝોન અને સાઉથ ઝોન વચ્ચે ફાઇનલ 6 સપ્ટેમ્બરથી ચેન્નાઈના એમ.એ. ચિદમ્બરમ સ્ટેડિયમમાં રમાશે. ઈસ્ટ ઝોન 2012-13 બાદ પ્રથમ વખત ટ્રોફી જીતવા ઉતરશે, જ્યારે 12 વખતની ચેમ્પિયન સાઉથ ઝોન ફરી ટ્રોફી પોતાના નામે કરવા માટે મેદાનમાં ઉતરશે.
ઈસ્ટ ઝોનની 14 વર્ષ બાદ ટ્રોફી પર નજર
ઈસ્ટ ઝોને છેલ્લે 2012-13માં દુલીપ ટ્રોફી જીતી હતી. તે સમયે ફાઇનલમાં સેન્ટ્રલ ઝોનને હરાવીને ટીમે પોતાનો બીજો ખિતાબ જીત્યો હતો. હવે ઈશાન કિશનની આગેવાની હેઠળની ટીમ પાસે ત્રીજી વખત ચેમ્પિયન બનવાની તક છે. સેમિફાઇનલમાં ઈસ્ટ ઝોને વર્તમાન ચેમ્પિયન સેન્ટ્રલ ઝોનને 4 વિકેટે હરાવીને ફાઇનલમાં સ્થાન મેળવ્યું હતું. પ્રથમ દાવમાં બંને ટીમનો સ્કોર 266-266 રહ્યો હતો. ઈસ્ટ તરફથી વૈભવ સૂર્યવંશીએ 92 અને અભિમન્યુ ઈશ્વરણે 62 રન બનાવ્યા હતા.
બોલિંગમાં મુકેશ કુમારે અને અભિજિત સરકારે પ્રથમ દાવમાં 3-3 વિકેટ ઝડપી હતી. બીજી ઇનિંગ્સમાં મુકેશે વધુ 4 વિકેટ અને મોહમ્મદ શમીએ 3 વિકેટ લઈને સેન્ટ્રલ ઝોનને 158 રનમાં ઓલઆઉટ કરવામાં મહત્વની ભૂમિકા ભજવી હતી. ઈસ્ટ ઝોનને 159 રનનો લક્ષ્યાંક મળ્યો હતો, જેને ટીમે 6 વિકેટ બાકી રાખીને હાંસલ કર્યો હતો. વૈભવ સૂર્યવંશીએ ઝડપી 40 રન બનાવ્યા, જ્યારે કેપ્ટન ઈશાન કિશને અણનમ 39 રન સાથે ટીમને જીત સુધી પહોંચાડી હતી.
સાઉથ ઝોનનો સેમિફાઇનલમાં દબદબો
સાઉથ ઝોન પણ સેમિફાઇનલમાં શાનદાર પ્રદર્શન કરીને ફાઇનલમાં પહોંચ્યું છે. નોર્થ ઝોન સામેની મેચમાં ટીમે 7 વિકેટથી જીત મેળવી હતી. નોર્થ ઝોને પ્રથમ દાવમાં 195 રન બનાવ્યા હતા. સાઉથ તરફથી વિધવથ કાવેરીપ્પાએ 4 વિકેટ ઝડપી હતી. ત્યારબાદ તિલક વર્માના 116 અને શ્રેયસ ગોપાલના 87 રનની મદદથી સાઉથ ઝોને 312 રનનો મોટો સ્કોર બનાવ્યો હતો. બીજા દાવમાં એમ.ડી. નિધીશે 5 વિકેટ ઝડપી નોર્થ ઝોનને 297 રનમાં રોક્યું હતું. સાઉથ ઝોનને 181 રનનો લક્ષ્યાંક મળ્યો હતો, જે તેણે માત્ર 3 વિકેટ ગુમાવીને મેળવી લીધો. તિલક વર્મા 51 રન બનાવીને અણનમ રહ્યા હતા.
તિલક સામે વૈભવ, ફાઇનલમાં યુવા-અનુભવનો સંગમ
આ ફાઇનલમાં સૌની નજર તિલક વર્મા અને 15 વર્ષીય વૈભવ સૂર્યવંશી પર રહેશે. તિલક સાઉથ ઝોનના કેપ્ટન છે, જ્યારે વૈભવ ઈસ્ટ ઝોનના ઉપકપ્તાન છે. સેમિફાઇનલમાં તિલકે પ્રથમ દાવમાં અણનમ 116 અને બીજા દાવમાં અણનમ 51 રન બનાવી પોતાની બેટિંગની મજબૂત ઝલક બતાવી હતી. વૈભવે પણ સેન્ટ્રલ ઝોન સામે 92 અને 40 રનની મહત્વની ઇનિંગ્સ રમી હતી.
ભારતીય ખેલાડીઓની હાજરીથી મુકાબલો વધુ ખાસ
ફાઇનલમાં ઘણા એવા ખેલાડીઓ રમતા જોવા મળશે જેઓ ભારતીય ટીમ સાથે જોડાયેલા છે અથવા રાષ્ટ્રીય ટીમમાં સ્થાન મેળવવાની દાવેદારી ધરાવે છે. સાઉથ ઝોનમાં મોહમ્મદ સિરાજ અને દેવદત્ત પડિક્કલ પણ જોડાયા છે. શ્રીલંકા સામેની તાજેતરની ટેસ્ટ શ્રેણીમાં બંને ભારતીય ટીમનો ભાગ હતા. જોકે કેએલ રાહુલ ફાઇનલમાં રમશે નહીં. દેવદત્ત પડિક્કલે શ્રીલંકા સામેની 2 ટેસ્ટમાં 2 સદી ફટકારી હતી અને શ્રેણીના શ્રેષ્ઠ ખેલાડી બન્યા હતા. હવે દુલીપ ટ્રોફીની ફાઇનલમાં પણ તેમની પાસેથી મોટા પ્રદર્શનની અપેક્ષા રહેશે. ઈસ્ટ ઝોન પાસે મોહમ્મદ શમી, મુકેશ કુમાર અને અનુરૂલ રોય જેવા બોલરો છે. ખાસ વાત એ છે કે શમી પોતાની કારકિર્દીની 100મી પ્રથમ-કક્ષાની મેચ રમશે.
પસંદગીકારોની પણ રહેશે ખાસ નજર
આ ફાઇનલ માત્ર ટ્રોફી માટે જ મહત્વની નથી. ભારતીય ટીમના ભવિષ્ય માટે પણ આ મેચ ઘણા ખેલાડીઓ માટે મહત્વની બની શકે છે. ભારતીય ટીમના પસંદગી સમિતિના અધ્યક્ષ અજિત અગરકર પણ ચેન્નાઈમાં ફાઇનલ જોવા હાજર રહેશે. તિલક વર્મા પર ખાસ નજર રહેશે, કારણ કે તેમણે તાજેતરની સેમિફાઇનલમાં સદી અને અડધી સદી ફટકારીને લાલ બોલની ક્રિકેટમાં પોતાની દાવેદારી મજબૂત કરી છે. મોહમ્મદ સિરાજ માટે પણ આ મેચ મહત્વની છે. શ્રીલંકા સામેની ટેસ્ટ શ્રેણીમાં તે પોતાના શ્રેષ્ઠ લયમાં જોવા મળ્યા નહોતા અને હવે આગામી ન્યૂઝીલેન્ડ પ્રવાસ પહેલાં લય પાછી મેળવવાનો પ્રયાસ કરશે.
ક્યારે અને ક્યાં રમાશે ફાઇનલ
- મુકાબલો: ઈસ્ટ ઝોન વિરુદ્ધ સાઉથ ઝોન
- તારીખ: 6 સપ્ટેમ્બરથી 10 સપ્ટેમ્બર 2026
- સ્થળ: એમ.એ. ચિદમ્બરમ સ્ટેડિયમ, ચેન્નાઈ
- સમય: સવારે 9:30 વાગ્યે
- ફાઇનલ: 5 દિવસની પ્રથમ-કક્ષાની મેચ
- ઈસ્ટ ઝોનના કેપ્ટન: ઈશાન કિશન
- સાઉથ ઝોનના કેપ્ટન: તિલક વર્મા
ફાઇનલમાં એક તરફ ઈસ્ટ ઝોન 2012-13 બાદ ફરી ટ્રોફી જીતવાનો પ્રયાસ કરશે, તો બીજી તરફ 12 વખતની ચેમ્પિયન સાઉથ ઝોન પોતાનો દબદબો જાળવી રાખવા ઉતરશે. બંને ટીમોએ સેમિફાઇનલમાં મજબૂત પ્રદર્શન કર્યું હોવાથી ચેન્નાઈમાં થનારો આ મુકાબલો દુલીપ ટ્રોફીની આ સિઝનનો સૌથી મોટો પડકાર બની શકે છે.
