ઉંમર 12 વર્ષ ઓછી બતાવ્યાનો આરોપ
પંજાબના ફતેહગઢ સાહિબ જિલ્લામાં એક હાઈપ્રોફાઇલ લગ્ન બાદ છેતરપિંડીના ગંભીર આક્ષેપો સામે આવ્યા છે. ફરિયાદ મુજબ, એક મહિલાએ લગ્ન પહેલાં પોતાને PCS અધિકારી અને અવિવાહિત ગણાવીને સંબંધ નક્કી કર્યો હતો. લગ્ન બાદ પતિને મહિલાની અગાઉની જિંદગી, ઉંમર અને સરકારી નોકરી અંગે આપવામાં આવેલી માહિતી પર શંકા જતા તપાસ શરૂ કરવામાં આવી હતી. આ તપાસમાં મહિલાએ પોતાની ઉંમર આશરે 12 વર્ષ ઓછી દર્શાવવા માટે દસ્તાવેજોમાં કથિત ફેરફાર કરાવ્યો હોવાનો આરોપ સામે આવ્યો છે.
ફરિયાદી અમરિંદર સિંહના જણાવ્યા મુજબ, લગ્ન પહેલાં મનવિંદર કૌરને PCS અધિકારી અને કુંવારી તરીકે રજૂ કરવામાં આવી હતી. એટલું જ નહીં, તે જાલંધરમાં PCS અધિકારી તરીકે ફરજ બજાવે છે અને બાદમાં તેને મોહાલીમાં એડિશનલ ડેપ્યુટી કમિશનર (ADC)નો ચાર્જ મળ્યો હોવાનો પણ દાવો કરવામાં આવ્યો હતો.આ માહિતીના આધારે બંનેનો સંબંધ નક્કી થયો અને ફેબ્રુઆરી 2026માં લગ્ન થયા હતા.લગ્ન બાદ પતિને મહિલાની અગાઉની વૈવાહિક સ્થિતિ અંગે શંકા થઈ હતી. ફરિયાદમાં આરોપ છે કે મહિલાના અગાઉ લગ્ન થઈ ચૂક્યા હતા અને તેને એક પુત્ર પણ છે. આ માહિતી લગ્ન પહેલાં છુપાવવામાં આવી હોવાનો આક્ષેપ કરવામાં આવ્યો છે. ત્યારબાદ પતિએ મહિલાની નોકરી અને ઓળખ અંગે તપાસ શરૂ કરી હતી. તપાસ દરમિયાન PCS અધિકારી હોવાના દાવા પર પણ સવાલો ઊભા થયા હતા. પોલીસ હવે આ દાવાઓની દસ્તાવેજી તપાસ કરી રહી છે.
આ કેસમાં સૌથી ચર્ચાસ્પદ આરોપ મહિલાની ઉંમર અંગે છે. ફરિયાદ મુજબ, તેના મૂળ દસ્તાવેજોમાં જન્મતારીખ 18 જૂન 1980 હોવાનું જણાવાયું હતું, જ્યારે બાદમાં કેટલાક દસ્તાવેજોમાં જન્મતારીખ 18 જૂન 1992 દર્શાવવામાં આવી હોવાનો આરોપ છે. એટલે કે ઉંમર આશરે 12 વર્ષ ઓછી બતાવવાનો આક્ષેપ છે. 10મા ધોરણનું પ્રમાણપત્ર, PAN કાર્ડ અને અન્ય ઓળખ સંબંધિત દસ્તાવેજોમાં કથિત ફેરફાર કરાવવામાં આવ્યો હોવાનો પણ ફરિયાદમાં ઉલ્લેખ છે.આ ઉપરાંત મહિલાએ PCS અધિકારી તરીકે પોતાની ઓળખ દર્શાવવા માટે કથિત રીતે સોશિયલ મીડિયા પ્રોફાઇલ અને સરકારી પોસ્ટિંગ સંબંધિત દસ્તાવેજોનો ઉપયોગ કર્યો હોવાના આરોપો પણ સામે આવ્યા છે.
પોલીસ હવે આ દસ્તાવેજો ખરેખર બનાવટી છે કે નહીં અને તેમાં ફેરફાર કોણે તથા કેવી રીતે કર્યા તેની તપાસ કરી રહી છે.ફરિયાદમાં એવો પણ આરોપ છે કે લગ્ન બાદ મહિલા વારંવાર સરકારી ફરજનું કારણ આપીને ઘરની બહાર જતી હતી. બાદમાં સસ્પેન્શન અંગે પણ વાત સામે આવી હતી. જ્યારે પતિએ સસ્પેન્શનના દસ્તાવેજો માંગ્યા ત્યારે મહિલા ઘર છોડીને જતી રહી હોવાનો આક્ષેપ કરવામાં આવ્યો છે. ત્યારબાદ ઘરેથી સોના-ચાંદીના દાગીના અને અન્ય કિંમતી સામાન લઈ જવાનો આરોપ પણ કરવામાં આવ્યો છે. કેટલાક અહેવાલોમાં 14 તોલા સોનું અને રોકડ રકમ લઈ જવાનો દાવો કરવામાં આવ્યો છે.
આ સમગ્ર મામલે ફતેહગઢ સાહિબ પોલીસે મહિલા સહિત છ લોકો સામે કેસ નોંધ્યો છે. તેમાં મહિલાના પરિવારના કેટલાક સભ્યો અને અન્ય એક વ્યક્તિનો સમાવેશ થાય છે. પોલીસ દ્વારા છેતરપિંડી, બનાવટી દસ્તાવેજો અને કથિત ગુનાહિત કાવતરાં સંબંધિત કલમો હેઠળ તપાસ હાથ ધરવામાં આવી છે. હાલમાં કોઈ આરોપીની ધરપકડ થઈ નથી અને સમગ્ર મામલો તપાસ હેઠળ છે.પોલીસનું કહેવું છે કે મહિલાની સાચી ઓળખ, વાસ્તવિક જન્મતારીખ, PCS અધિકારી હોવાનો દાવો, અગાઉના લગ્ન અને દસ્તાવેજોમાં થયેલા કથિત ફેરફાર સહિત તમામ મુદ્દાઓની ચકાસણી કરવામાં આવશે. તપાસ પૂર્ણ થયા બાદ જ આરોપો અંગે હકીકત સ્પષ્ટ થશે. પોલીસે લોકોને પણ તપાસ પૂર્ણ થાય તે પહેલાં અફવાઓ કે અપ્રમાણિત માહિતી સોશિયલ મીડિયા પર ફેલાવવાથી બચવાની અપીલ કરી છે.
