સંયુક્ત રાષ્ટ્ર મહાસભાના 81મા સત્રમાં ગાઝાની સ્થિતિને લઈને ફ્રાન્સના રાષ્ટ્રપતિ ઇમેન્યુઅલ મેક્રોંએ અમેરિકાના રાષ્ટ્રપતિ ડોનાલ્ડ ટ્રમ્પના ગાઝા શાંતિ સંબંધિત દાવા પર સવાલ ઉઠાવ્યા છે. ટ્રમ્પે પોતાના UN ભાષણમાં ગાઝા માટેની અમેરિકન શાંતિ યોજનાને રાજદ્વારી સફળતા તરીકે રજૂ કરી હતી. તેના થોડા કલાકો બાદ મેક્રોંએ પોતાના ભાષણમાં કહ્યું કે જમીન પરની સ્થિતિ આ દાવા સાથે મેળ ખાતી નથી અને ગાઝામાં માનવતાવાદી મદદની પહોંચ ફરી શરૂ થઈ નથી. મેક્રોંએ UNમાં કહ્યું કે જો વિશ્વ ગાઝાની સ્થિતિ સામે નિષ્ક્રિય રહેશે તો આંતરરાષ્ટ્રીય સમુદાયની વિશ્વસનીયતા પર સવાલ ઊભા થશે. તેમણે શાંતિ સ્થાપિત થયાના દાવા છતાં ગાઝામાં માનવતાવાદી મદદ પહોંચાડવાના માર્ગો ફરીથી ન ખુલ્યા હોવાનો મુદ્દો ઉઠાવ્યો. મેક્રોંએ ગાઝાની સ્થિતિને લઈને આંતરરાષ્ટ્રીય સમુદાયની નિષ્ક્રિયતા પર ગંભીર ચિંતા વ્યક્ત કરી અને પૂછ્યું કે શું દુનિયા માત્ર આ સ્થિતિને જોતી રહેશે.
મેક્રોંના નિવેદન બાદ વ્હાઇટ હાઉસે ટ્રમ્પના ગાઝા પ્લાનનો બચાવ કર્યો. વ્હાઇટ હાઉસની પ્રવક્તા અન્ના કેલીએ જણાવ્યું કે ટ્રમ્પે ઇઝરાયેલ અને હમાસ વચ્ચેનું યુદ્ધ સમાપ્ત કરાવ્યું, જીવિત બંધકોની મુક્તિ સુનિશ્ચિત કરી અને મૃત બંધકોના મૃતદેહ તેમના પરિવાર સુધી પહોંચાડવામાં આવ્યા. હવે ટ્રમ્પ ગાઝા માટેની 20 મુદ્દાની શાંતિ યોજનાના અમલીકરણનું નેતૃત્વ કરી રહ્યા છે.મેક્રોંએ પોતાના ભાષણમાં ફ્રાન્સ દ્વારા પેલેસ્ટાઇનને માન્યતા આપવાના નિર્ણયનો પણ બચાવ કર્યો. તેમણે કહ્યું કે એક તરફ પેલેસ્ટાઇનને માન્યતા આપવામાં આવી રહી છે, પરંતુ બીજી તરફ વેસ્ટ બેન્કમાં પેલેસ્ટિનિયનો સામે હિંસા અને અન્ય કથિત ઉલ્લંઘનો અંગે ચિંતા યથાવત છે. મેક્રોંએ સવાલ ઉઠાવ્યો કે વેસ્ટ બેન્કમાં થઈ રહેલી ઘટનાઓ પાછળનો આધાર શું છે અને કહ્યું કે હમાસે વેસ્ટ બેન્કમાં ક્યારેય ઓપરેશન કર્યું નથી.
ફ્રાન્સના રાષ્ટ્રપતિએ વેસ્ટ બેન્કની સ્થિતિને પેલેસ્ટિનિયન અધિકારો પર આધારિત ભવિષ્યની રાજકીય વ્યવસ્થા માટે નુકસાનકારક ગણાવી. તેમણે પડોશી દેશોની સંપ્રભુતાને નબળી પાડવાના પ્રયાસો અંગે પણ ચિંતા વ્યક્ત કરી અને કહ્યું કે આવી સ્થિતિ ઇઝરાયેલની સુરક્ષા માટે પણ પ્રશ્નો ઊભા કરી શકે છે. આ મુદ્દે ફ્રાન્સ અને ઇઝરાયેલના સંબંધોમાં છેલ્લા સમયગાળામાં તણાવ વધ્યો હોવાનું આંતરરાષ્ટ્રીય અહેવાલોમાં જણાવાયું છે.મેક્રોંએ પોતાના અંતિમ UN મહાસભા સંબોધનમાં બહુપક્ષીય વ્યવસ્થાનું સમર્થન કર્યું. તેમણે કહ્યું કે દુનિયા એવી વ્યવસ્થા તરફ આગળ વધી રહી છે,જ્યાં શક્તિ અને દબાણના આધારે નિર્ણયો લેવાય કે પછી આંતરરાષ્ટ્રીય નિયમો અને સંસ્થાઓ પર આધારિત વ્યવસ્થા જાળવવામાં આવે,આ પસંદગી મહત્વપૂર્ણ છે.
તેમણે દેશોને સંયુક્ત રાષ્ટ્ર સાથે ઊભા રહેવાની અપીલ કરી અને પોતાના ભાષણનો અંત સંયુક્ત રાષ્ટ્રના સમર્થનના સંદેશ સાથે કર્યો.આ રીતે UNમાં એક જ દિવસે ટ્રમ્પે ગાઝા શાંતિ યોજનાને રાજદ્વારી સફળતા તરીકે રજૂ કરી, જ્યારે મેક્રોંએ ગાઝાની જમીની અને માનવતાવાદી સ્થિતિનો ઉલ્લેખ કરીને તે દાવા સામે અલગ દૃષ્ટિકોણ રજૂ કર્યો. બંને તરફથી જાહેર નિવેદનો બાદ હવે ગાઝામાં માનવતાવાદી મદદ, શાંતિ યોજનાના અમલીકરણ અને પેલેસ્ટાઇનના ભવિષ્યને લઈને આંતરરાષ્ટ્રીય ચર્ચા વધુ મહત્વપૂર્ણ બની છે.
