અમેરિકાના રાષ્ટ્રપતિ ડોનાલ્ડ ટ્રમ્પે મીડિયા બોયકોટના વિવાદ વચ્ચે અમેરિકન મીડિયાના વલણ અંગે પોતાની નારાજગી વ્યક્ત કરી છે.ટ્રમ્પે દાવો કર્યો કે તેઓને મીડિયા તરફથી ક્યારેય સકારાત્મક કવરેજ મળતી નથી અને તેમના કામને હંમેશા નકારાત્મક રીતે રજૂ કરવામાં આવે છે. આ નિવેદન એવા સમયે આવ્યું છે જ્યારે ટ્રમ્પ પ્રશાસને કેટલાક મીડિયા સંસ્થાનોને વ્હાઇટ હાઉસમાં પ્રવેશ અંગે પ્રતિબંધિત કર્યા છે અને તેના જવાબમાં કેટલાક અમેરિકન મીડિયા સંસ્થાનો દ્વારા વ્હાઇટ હાઉસ કવરેજના બહિષ્કારના અહેવાલો સામે આવ્યા છે.મીડિયા બોયકોટ અંગે પૂછવામાં આવતા ટ્રમ્પે કહ્યું કે મીડિયા દ્વારા તેમને બોયકોટ કરવાની વાત કરવામાં આવી હતી, પરંતુ તેમના મતે વાસ્તવમાં તેમનો કોઈ બોયકોટ થયો નથી. ટ્રમ્પે કહ્યું કે આ મુદ્દે તેમને ખાસ કોઈ ચિંતા નથી. તેમણે સાથે જ કહ્યું કે પ્રેસની પણ કેટલીક જવાબદારીઓ હોય છે અને મીડિયા દ્વારા સરકારના સકારાત્મક કામોને પણ લોકો સમક્ષ રજૂ કરવા જોઈએ. ટ્રમ્પે પોતાના કાર્યકાળ દરમિયાન અનેક મોટા નિર્ણયો અને કામગીરી થઈ હોવાનો દાવો કર્યો હતો.
ટ્રમ્પે પોતાના નિવેદનમાં ચૂંટણીમાં મળેલી જીત, યુદ્ધો અને અમેરિકાની અર્થવ્યવસ્થાનો પણ ઉલ્લેખ કર્યો. તેમણે દાવો કર્યો કે તેમની સરકાર દરમિયાન તેમણે આઠ યુદ્ધોનો ઉકેલ લાવ્યો છે અને અમેરિકાના ઇતિહાસમાં શ્રેષ્ઠ આર્થિક આંકડા નોંધાયા છે. ટ્રમ્પે વધુમાં આશરે 21 ટ્રિલિયન ડોલર અમેરિકામાં આવવાના હોવાનો દાવો કર્યો અને કહ્યું કે તેમની સરકાર દ્વારા કરવામાં આવેલા કામોને મીડિયા તરફથી યોગ્ય સકારાત્મક કવરેજ મળતું નથી. આ આંકડા અને કામગીરી અંગેના દાવા ટ્રમ્પના પોતાના નિવેદન પર આધારિત છે.આ દરમિયાન ટ્રમ્પે ઈરાન યુદ્ધ અને પરમાણુ હથિયારો અંગે પણ વાત કરી. તેમણે દાવો કર્યો કે ઈરાન પરમાણુ હથિયાર હાંસલ નહીં કરી શકે અને હાલ ઈરાન મુશ્કેલ પરિસ્થિતિમાંથી પસાર થઈ રહ્યું છે. ટ્રમ્પે કહ્યું કે ઈરાન મુદ્દે તેમની મહત્વપૂર્ણ બેઠકો પણ ચાલી રહી છે.
બીજી તરફ, ન્યૂયોર્ક સિટીના મેયર જોહરાન મમદાનીને પણ ટ્રમ્પ સાથેની મુલાકાત દરમિયાન મીડિયા સંસ્થાઓ પર પ્રતિબંધના મુદ્દે ચર્ચા થઈ હતી કે નહીં તે અંગે સવાલ કરવામાં આવ્યો હતો. મમદાનીએ કહ્યું કે તેઓ પ્રેસના તમામ સભ્યોને સંવાદ માટે જગ્યા આપવાના પક્ષમાં છે. તેમના જણાવ્યા મુજબ, કોઈની રાય અથવા ટીકા ભલે અલગ હોય, પરંતુ તમામ સાથે સંવાદ જાળવી રાખવો જોઈએ. આ વિવાદ વચ્ચે વ્હાઇટ હાઉસે સત્તાવાર રીતે ‘ટ્રમ્પ ટીવી’ પણ શરૂ કર્યું છે. આ એક ડિજિટલ બ્રોડકાસ્ટિંગ નેટવર્ક છે, જે પ્રશાસન સંબંધિત સામગ્રીનું 24 કલાક અને અઠવાડિયાના સાતેય દિવસ પ્રસારણ કરશે.મીડિયા અને વ્હાઇટ હાઉસ વચ્ચેના સંબંધોને લઈને ચાલી રહેલી ચર્ચામાં આ નવો પ્લેટફોર્મ પણ મહત્વપૂર્ણ બની રહ્યો છે.
