ઉત્તર પ્રદેશના આઝમગઢમાં પોતાની પત્ની, પુત્ર અને બે પૂજારીઓની હત્યા કરનાર આરોપી પોલીસ એન્કાઉન્ટરમાં માર્યો ગયો. ધરપકડના ડરથી તેણે પોતાના ત્રણ બાળકોને એક રૂમમાં બંધક બનાવી રાખ્યા હતા. સાત કલાક બાદ તેણે પોતાના પુત્ર પર ગોળી ચલાવી હતી. ત્યારબાદ ATS અને SOGની ટીમે હત્યારા અરવિંદ સિંહ (૪૨)ને ઠાર માર્યો.
આ ઘટના જિલ્લા મુખ્યાલયથી ૫૦ કિમી દૂર આવેલા અહિરાઉલા પોલીસ સ્ટેશન વિસ્તારમાં બની હતી. પોલીસના જણાવ્યા અનુસાર પરિવારને શંકા હતી કે અરવિંદના ભાઈ સુનીલનો આત્મા તેને પરેશાન કરી રહ્યો છે. આથી તેની પત્ની અને માતા ‘મહામૃત્યુંજય જાપ’ (એક ધાર્મિક વિધિ)નું આયોજન કરી રહ્યા હતા. અરવિંદ આ બાબતથી નારાજ હતો. મંગળવારે સાંજે ૬ વાગ્યે તેણે આ મુદ્દે પત્ની સાથે ઝઘડો કર્યો હતો.
તેણે પત્ની પર આરોપ લગાવતા કહ્યું, “તમારા કારણે જ મારા ભાઈની હત્યા થઈ હતી અને હવે તમે અહીં ડ્રામા કરી રહ્યા છો.” ત્યારબાદ તેણે પૂજારીઓ પાસે આધાર કાર્ડની માંગણી કરી અને તેમની સાથે ઝઘડો કરવા લાગ્યો. આ દરમિયાન ગુસ્સામાં આવીને તેણે રૂમમાંથી પોતાની લાયસન્સવાળી રિવોલ્વર કાઢી અને પત્ની તથા બે પૂજારીઓ પર ગોળીબાર કર્યો. ત્યારબાદ તેણે પોતાના ત્રણ બાળકોને રૂમમાં બંધક બનાવી લીધા.
માહિતી મળતાં જ દસ પોલીસ સ્ટેશનોનો પોલીસ કાફલો ઘટનાસ્થળે પહોંચ્યો પરંતુ અરવિંદે બાળકોને મારી નાખવાની ધમકી આપી. પરિસ્થિતિ વણસતી જોઈને ATS અને SOGના ૪૫ જવાનોને બોલાવવામાં આવ્યા. ટીમે તેને શરણાગતિ સ્વીકારવા માટે સમજાવવાનો પ્રયાસ કર્યો. રાત્રે ૧ વાગ્યે તેણે એક બાળક પર ગોળી ચલાવી. ટીમે સ્મોક ગ્રેનેડ અને ટીયર ગેસનો ઉપયોગ કર્યો અને પછી દરવાજો તોડીને રૂમમાં પ્રવેશ કર્યો. અરવિંદે પોતાની રિવોલ્વરથી જવાનો પર છ રાઉન્ડ ફાયરિંગ કર્યું અને વળતા ગોળીબારમાં તે માર્યો ગયો.
અરવિંદ સિવાય મૃતકોમાં તેની પત્ની બબીતા (૪૦), પુત્ર શૌર્ય (૯) અને પૂજારીઓ મહેન્દ્ર પાઠક (૬૦) તથા અખિલેશ મિશ્રા (૫૫)નો સમાવેશ થાય છે. પરિવારના જીવિત સભ્યોમાં તેની માતા કમલા દેવી (૭૦) અને બે પુત્રીઓ, પરી (૫) અને શંભવી (૭ મહિના) છે. પોસ્ટમોર્ટમ બાદ મૃતદેહોને બપોરે ૧:૩૦ વાગ્યે ઘરે લાવવામાં આવ્યા હતા. અંતિમ સંસ્કારની તૈયારીઓ શરૂ થઈ ગઈ છે અને ઘરની બહાર પોલીસ બળ તૈનાત કરવામાં આવ્યું છે.
બાળાસાહેબ ઠાકરેના ગનમેન હતા
શંભુપુર ગહજી ગામના રહેવાસી અરવિંદ બેરોજગાર હતા. આઠ વર્ષ પહેલાં, તેમના ભાઈ સુનિલની તેમના પિતરાઈ ભાઈઓ મનીષ અને અવિનાશે ગોળી મારીને હત્યા કરી હતી. અરવિંદની પત્ની બબિતાના મનીષ સાથે સંબંધો હતા. આ વાતની જાણ થતાં સુનિલે મનીષ વિરુદ્ધ ચોરી અને છેડતીની ફરિયાદ નોંધાવી હતી. સુનિલ બાળાસાહેબ ઠાકરેના અંગરક્ષક હતા.
