પાઇપોની આડમાં સંતાડેલા વિદેશી દારૂ સાથે કન્ટેનરને કપુરાઈ પોલીસે પકડ્યું
અંધારાનો લાભ લઈ ફરાર, દારૂ અને કન્ટેનર સહિત રૂ.30.59 લાખનો મુદ્દામાલ જપ્ત
વડોદરા તા.8
નેશનલ હાઇવે-48 નજીકથી કપૂરાઈ પોલીસે વિદેશી દારૂ ભરેલું કન્ટેનર ઝડપી પાડ્યું હતું. તેમાં તપાસ કરતા પાઇપોની આડમાં સંતાડી રાખેલો વિદેશી દારૂનો રૂ.20.59 લાખનો જથ્થો મળી આવ્યો હતો. જેથી દારૂ અને રૂ.10 લાખનું કન્ટેનર સહિત રૂ.30.59 લાખનો મુદ્દામાલ કબજે કર્યો છે. કન્ટેનરનો ડ્રાઇવર અંધારાનો લાભ લઈ ફરાર થઈ ગયો હતો, જ્યારે દારૂ મંગાવનારની પણ પોલીસે શોધખોળ શરૂ કરી છે.
કપુરાઈ પોલીસ સ્ટેશનના પીઆઈ ડી.સી. રાઓલની ટીમ ગેરકાયદે દારૂની હેરાફેરી અટકાવવા પેટ્રોલિંગમાં ફરી રહી હતી. દરમિયાન બાતમી મળી હતી કે તરસાલીથી જામ્બુવા બ્રિજ તરફ જતા માર્ગે ગોકુલ કટ નજીક ખુલ્લી જગ્યામાં એક કન્ટેનરમાં વિદેશી દારૂનો મોટો જથ્થો ઉતારવાની તૈયારી ચાલી રહી છે.
બાતમીના આધારે પોલીસે સ્થળ પર દરોડો પાડતાં અશોક લેલેન્ડ કંપનીનું બ્રાઉન કલરનું કન્ટેનર શંકાસ્પદ હાલતમાં ઉભેલુ મળી આવ્યું હતું. પોલીસે કન્ટેનર ચેક કરતાં ડ્રાઇવર ફરાર થઈ ગયો હતો. ત્યારબાદ કન્ટેનરનું સીલ તોડી તપાસ કરતા દરવાજા પાસે પાઇપોના જથ્થાની આડમાં સંતાડેલો વિદેશી દારૂ મળી આવ્યો હતો.
પોલીસે દારૂ રૂ.20.59 લાખ અને કન્ટેનરની કિંમત રૂ.10 લાખ મળીને રૂ.30.59 લાખનો મુદ્દામાલ કબજે કરવામાં આવ્યો હતો.
કપુરાઈ પોલીસે ફરાર કન્ટેનર ચાલક-માલિક તથા દારૂનો જથ્થો મંગાવનાર અજાણ્યા શખ્સ સામે ગુનો નોંધી વધુ તપાસ હાથ ધરી છે.
