તંત્રની લાપરવાહી: રસ્તા પર પથરાયેલી કપચીએ દ્વિચક્રી વાહનચાલકોને કર્યા લહૂલુહાણ; ઝીણી રજકણોથી રાહદારીઓને શ્વાસ લેવામાં તકલીફ
વડોદરા શહેરના પશ્ચિમ વિસ્તારમાં આવેલા શેરખી-ભીમપુરાથી સમલાયાને જોડતો મુખ્ય માર્ગ હાલમાં વાહનચાલકો અને રાહદારીઓ માટે અત્યંત જોખમી સાબિત થઈ રહ્યો છે. તંત્રની ઘોર બેદરકારીને કારણે આ માર્ગ પર કપચી અને ધૂળનું સામ્રાજ્ય છવાઈ ગયું છે, જેના પરિણામે અકસ્માતોની હારમાળા સર્જાઈ રહી છે. સ્થાનિક લોકોમાં આ બાબતે ભારે રોષ જોવા મળી રહ્યો છે અને આ માર્ગ હવે ‘મોતનો રસ્તો’ બની ગયો હોવાની બૂમો ઉઠી છે.
માર્ગની બિસ્માર હાલતને કારણે રસ્તા પર ઠેર-ઠેર કાંકરા અને કપચી પથરાયેલી છે. જેના કારણે ખાસ કરીને દ્વિચક્રી વાહનચાલકોના વાહનો સ્લિપ થઈ રહ્યા છે અને લોકો ગંભીર ઈજાઓનો ભોગ બની રહ્યા છે. સ્થાનિક રહીશોના જણાવ્યા અનુસાર, રસ્તા પરથી જ્યારે ભારે વાહનો પસાર થાય છે ત્યારે ધૂળની ડમરીઓ ઉડે છે, જેના કારણે પાછળ આવતા વાહનચાલકો માટે વિઝિબિલિટી શૂન્ય થઈ જાય છે. રસ્તો સ્પષ્ટ ન દેખાવાને કારણે અનેકવાર વાહનો એકબીજા સાથે અથડાતા બચી જાય છે.
ધૂળના કારણે માત્ર વાહનચાલકો જ નહીં, પરંતુ આસપાસ રહેતા લોકો અને રાહદારીઓ પણ શારીરિક તકલીફોનો સામનો કરી રહ્યા છે. સતત ઉડતી ધૂળને કારણે લોકોને આંખોમાં બળતરા થવી અને શ્વાસ લેવામાં તકલીફ પડવી જેવી સમસ્યાઓ ઊભી થઈ રહી છે. ખાસ કરીને રાત્રિના સમયે આ માર્ગ પરથી પસાર થવું લોઢાના ચણા ચાવવા સમાન બની જાય છે, કારણ કે અપૂરતી લાઈટ અને ધૂળના ગોટાને કારણે અકસ્માત થવાની શક્યતા અનેકગણી વધી જાય છે.
સ્થાનિક વાહનચાલકો અને રહેવાસીઓએ તંત્ર સામે પોતાનો રોષ ઠાલવતા જણાવ્યું હતું કે, વારંવાર રજૂઆતો કરવા છતાં હજુ સુધી માર્ગનું સમારકામ કરવામાં આવ્યું નથી. લોકોની માગ છે કે કોઈ નિર્દોષ વ્યક્તિ અકસ્માતમાં પોતાનો જીવ ગુમાવે તે પહેલાં તંત્ર જાગે અને આ માર્ગનું તાત્કાલિક રીસરફેસિંગ કરવામાં આવે. જો વહેલી તકે યોગ્ય કામગીરી કરવામાં નહીં આવે, તો આગામી સમયમાં સ્થાનિકો દ્વારા ઉગ્ર આંદોલન કરવાની પણ ચીમકી ઉચ્ચારવામાં આવી છે.
