સરકાર સાથેની બેઠક બાદ CJPનો મોટો દાવો
દેશભરમાં પરીક્ષા પેપર લીક મુદ્દે થયેલા વિદ્યાર્થી આંદોલન બાદ સરકાર અને કોકરોચ જનતા પાર્ટી (CJP) વચ્ચે થયેલી ચર્ચા પછી વધુ એક મહત્વપૂર્ણ દાવો સામે આવ્યો છે. CJPના મુખ્ય પ્રવક્તા સૌરવ દાસે જણાવ્યું છે કે બિહાર સરકાર વિદ્યાર્થીઓ અને પ્રદર્શનકારીઓ સામે નોંધાયેલા તમામ FIR તથા કાનૂની કાર્યવાહી પાછી ખેંચવા માટે સંમત થઈ છે. તેમનું કહેવું છે કે સરકાર તરફથી આ અંગે સત્તાવાર પ્રેસ રિલીઝ પણ આપવામાં આવી છે અને અન્ય રાજ્યોમાં પણ સમાન પ્રકારની કાર્યવાહી કરવાની ખાતરી આપવામાં આવી છે.
દિલ્હી પોલીસના પ્રતિનિધિઓ સાથે લગભગ બે કલાક બેઠક
સૌરવ દાસે સોશિયલ મીડિયા પર માહિતી આપતાં જણાવ્યું કે દિલ્હી પોલીસના પ્રતિનિધિઓ, જેમણે સમગ્ર વાટાઘાટમાં મધ્યસ્થ તરીકે કામગીરી કરી હતી, તેઓ તેમની સાથે મળવા આવ્યા હતા. આ બેઠક અંદાજે દોઢથી બે કલાક સુધી ચાલી હતી. બેઠક દરમિયાન સરકાર દ્વારા અગાઉ આપવામાં આવેલા આશ્વાસનો અંગે વિગતવાર ચર્ચા કરવામાં આવી હતી. તેમણે દાવો કર્યો કે પોલીસ અધિકારીઓ બિહાર સરકારના ગૃહ વિભાગની સત્તાવાર પ્રેસ રિલીઝ સાથે આવ્યા હતા, જેમાં સ્પષ્ટ લખવામાં આવ્યું છે કે વિદ્યાર્થીઓ અને અન્ય પ્રદર્શનકારીઓ સામે નોંધાયેલા તમામ કેસ અને FIR પાછા ખેંચવામાં આવશે અને ભવિષ્યમાં પણ તેમની સામે કોઈ દંડાત્મક કાર્યવાહી કરવામાં નહીં આવે.
આસામ સહિત અન્ય રાજ્યોમાં પણ સૂચના જારી થવાની આશા
CJPના જણાવ્યા મુજબ બેઠક દરમિયાન માત્ર બિહાર જ નહીં પરંતુ આસામ સહિત અન્ય રાજ્યોમાં પણ સમાન પ્રકારની સૂચનાઓ બહાર પાડવા અંગે ચર્ચા થઈ હતી. પાર્ટીનો દાવો છે કે સરકાર તરફથી ખાતરી આપવામાં આવી છે કે જ્યાં વિદ્યાર્થીઓ સામે કાર્યવાહી થઈ છે તેવા રાજ્યોમાં પણ ટૂંક સમયમાં FIR પાછી ખેંચવા અંગેની સત્તાવાર સૂચનાઓ જાહેર કરવામાં આવશે.સૌરવ દાસે જણાવ્યું કે જો કોઈ રાજ્યમાં હજુ પણ વિદ્યાર્થીઓ સામે કાર્યવાહી ચાલુ રહેશે અથવા કેસ પાછા નહીં ખેંચાય તો પાર્ટી સીધો સંબંધિત સરકાર અને અધિકારીઓ સાથે સંપર્ક કરીને તેનો ઉકેલ લાવવાનો પ્રયાસ કરશે.
સરકારને રાજ્યોની યાદી સોંપાશે
સૌરવ દાસે વધુમાં જણાવ્યું કે જ્યાં વિદ્યાર્થીઓ અને પ્રદર્શનકારીઓ સામે કાર્યવાહી થઈ હોવાના અહેવાલો છે તેવા બાકીના રાજ્યોની વિગતવાર યાદી સરકારને સોંપવામાં આવશે. જો કે આ યાદીના આધારે સરકાર સંબંધિત રાજ્ય સરકારો સાથે વાતચીત કરીને યોગ્ય પગલાં લેવાનો પ્રયાસ કરશે.તેમણે કહ્યું કે CJP સમગ્ર પ્રક્રિયા પર સતત નજર રાખી રહી છે અને જો કોઈ વિદ્યાર્થીને અન્યાય થશે તો પાર્ટી તેની સાથે ઊભી રહેશે.
અગાઉ ધરપકડ અને કાર્યવાહી અંગે વ્યક્ત કરી હતી ચિંતા
આ જાહેરાત પહેલાં CJPએ આસામ, પશ્ચિમ બંગાળ અને બિહારમાં વિદ્યાર્થીઓ તથા પ્રદર્શનકારીઓની ધરપકડ અને પોલીસ કાર્યવાહી અંગે ગંભીર ચિંતા વ્યક્ત કરી હતી. પાર્ટીનું કહેવું હતું કે દેશવ્યાપી આંદોલન સ્થગિત કરવાનો નિર્ણય કેન્દ્ર સરકારના એ આશ્વાસન પછી લેવામાં આવ્યો હતો કે કોઈપણ રાજ્યમાં પ્રદર્શનકારીઓ સામે દંડાત્મક કાર્યવાહી કરવામાં નહીં આવે.સૌરવ દાસે તે સમયે જણાવ્યું હતું કે જો સરકાર પોતાનું વચન નહીં પાળે તો તે યુવાનોના વિશ્વાસ સાથે દગો સમાન ગણાશે અને પાર્ટી આગળની કાર્યવાહી અંગે વિચાર કરશે.
કાનૂની મદદ માટે અલગ ટીમની તૈયારી
CJP તરફથી રત્ના સિંહે પણ પ્રદર્શનકારીઓ માટે કાનૂની સહાય અંગે માહિતી આપી હતી. તેમના જણાવ્યા મુજબ વિવિધ રાજ્યોમાં વિદ્યાર્થીઓની મદદ કરનારા વકીલો સાથે સતત સંપર્ક રાખવામાં આવી રહ્યો છે. હાલમાં સત્તાવાર લીગલ ટીમની રચના પૂર્ણ થઈ નથી, પરંતુ ખૂબ જ ટૂંક સમયમાં વિશેષ કાનૂની ટીમ બનાવવામાં આવશે. તેમણે જણાવ્યું કે અત્યાર સુધી વિદ્યાર્થીઓને મદદ કરનારા વકીલોની મહેનત વ્યર્થ નહીં જાય તેની ખાતરી સરકાર તરફથી લેખિત આશ્વાસન દ્વારા આપવામાં આવી હોવાનું પણ પાર્ટીનો દાવો છે.
દરેક પ્રદર્શનકારીની સાથે ઊભી રહેવાનો દાવો
સૌરવ દાસે જણાવ્યું કે આંદોલનના પ્રથમ દિવસથી CJP દરેક વિદ્યાર્થી અને પ્રદર્શનકારીની સાથે રહી છે અને ભવિષ્યમાં પણ તેમને એકલા નહીં છોડે. તેમણે રત્ના, આશુ, અભિજીત અને વૈષ્ણવી સહિત સમગ્ર ટીમના પ્રયાસોની પણ પ્રશંસા કરી હતી.તેમણે કહ્યું કે યુવાનોના હિતમાં શરૂ થયેલા આંદોલનનો હેતુ માત્ર સરકાર પર દબાણ બનાવવાનો નહોતો, પરંતુ વિદ્યાર્થીઓને ન્યાય અપાવવાનો હતો.
હજુ સરકાર તરફથી સત્તાવાર સર્વપક્ષીય પુષ્ટિ બાકી
જોકે CJPએ FIR પાછી ખેંચવાના દાવા સાથે સરકાર તરફથી મળેલા દસ્તાવેજોની વાત કરી છે, પરંતુ તમામ રાજ્યોમાં કાર્યવાહી પાછી ખેંચાઈ હોવાની સત્તાવાર પુષ્ટિ હજુ દરેક રાજ્ય સરકાર દ્વારા અલગથી જાહેર થવાની બાકી છે. આગામી દિવસોમાં અન્ય રાજ્યો તરફથી બહાર પડનારી સૂચનાઓ પર સૌની નજર રહેશે.
તાજેતરમાં દેશભરમાં પેપર લીક અને ભરતી પરીક્ષાઓમાં ગેરરીતિના આરોપોને લઈને વિદ્યાર્થીઓએ વ્યાપક વિરોધ પ્રદર્શન કર્યા હતા. અનેક સ્થળોએ પોલીસ કાર્યવાહી, અટકાયત અને FIR નોંધાઈ હતી. ત્યારબાદ કેન્દ્ર સરકાર અને CJP વચ્ચે અનેક તબક્કામાં ચર્ચા થઈ હતી. ત્યારથી જ વિદ્યાર્થીઓ સામેની કાર્યવાહી પાછી ખેંચવાની માંગ મુખ્ય મુદ્દા તરીકે સામે આવી હતી. જો કે અગાઉ પણ સરકાર તરફથી કેટલીક માંગણીઓ સ્વીકારવાનો દાવો કરવામાં આવ્યો હતો, જેમાં વિદ્યાર્થીઓ સામેના કેસો પાછા ખેંચવા અને ભવિષ્યમાં દંડાત્મક કાર્યવાહી નહીં કરવાની ખાતરીનો સમાવેશ થતો હતો.
