સુરતના કારગિલ ચોક ખાતે પહોંચીને કારગિલ યુદ્ધના અમર શહીદોને પુષ્પાંજલિ અર્પણ કરી ભાવભીની શ્રદ્ધાંજલિ આપી. આ કાર્યક્રમમાં ભાજપના અનેક આગેવાનો, કાર્યકરો, પૂર્વ સૈનિકો, યુવાનો તેમજ મોટી સંખ્યામાં નાગરિકો ઉપસ્થિત રહ્યા હતા. સમગ્ર કાર્યક્રમ દેશભક્તિના માહોલ વચ્ચે યોજાયો હતો.આ પ્રસંગે જગદીશભાઈ વિશ્વકર્માએ જણાવ્યું કે, “કારગિલ વિજય દિવસ એ આપણા વીર જવાનોના અદમ્ય શૌર્ય, અવિસ્મરણીય પરાક્રમ અને સર્વોચ્ચ બલિદાનને નમન કરવાનો પવિત્ર અવસર છે. દેશની સુરક્ષા માટે પોતાના પ્રાણોની આહુતિ આપનાર શહીદોનું બલિદાન દેશ ક્યારેય ભૂલી શકશે નહીં. તેમની શૌર્યગાથા આવનારી પેઢીઓને દેશસેવાની પ્રેરણા આપતી રહેશે.”
કાર્યક્રમ દરમિયાન કારગિલ યુદ્ધમાં સેવા આપનારા તેમજ અન્ય પૂર્વ સૈનિકોનું વિશેષ સન્માન કરવામાં આવ્યું હતું. તેમને શાલ ઓઢાડી અને સ્મૃતિચિહ્ન અર્પણ કરીને તેમના દેશપ્રેમ અને સેવાને બિરદાવવામાં આવી હતી. ઉપસ્થિત લોકોએ પણ શહીદોને બે મિનિટનું મૌન પાળી શ્રદ્ધાંજલિ અર્પણ કરી હતી.દર વર્ષે 26 જુલાઈએ સમગ્ર દેશમાં કારગિલ વિજય દિવસની ઉજવણી કરવામાં આવે છે. વર્ષ 1999માં ભારતીય સેનાએ ‘ઓપરેશન વિજય’ અંતર્ગત કારગિલની દુર્ગમ પહાડીઓમાંથી પાકિસ્તાની ઘૂસણખોરોને ખદેડીને ઐતિહાસિક વિજય મેળવ્યો હતો. આ યુદ્ધમાં ભારતીય સેનાના અનેક જવાનોએ પોતાના પ્રાણોનું બલિદાન આપ્યું હતું અને દેશની સરહદોની સુરક્ષા માટે અપ્રતિમ શૌર્યનું પ્રદર્શન કર્યું હતું.
સુરતના કારગિલ ચોક ખાતે યોજાયેલા આ કાર્યક્રમમાં દેશભક્તિના નારા ગુંજ્યા હતા અને હાજર તમામ લોકોએ ભારત માતાના વીર શહીદોને નમન કરીને તેમની યાદને ચિરંજીવ રાખવાનો સંકલ્પ વ્યક્ત કર્યો હતો. આ કાર્યક્રમ દરમિયાન રાષ્ટ્રપ્રેમ, એકતા અને દેશસેવાના સંદેશ સાથે ઉપસ્થિતોએ ભારતીય સેનાના જવાનો પ્રત્યે આદર વ્યક્ત કર્યો અને દેશની અખંડિતતા જાળવવા માટે સદૈવ સમર્પિત રહેવાની પ્રતિબદ્ધતા વ્યક્ત કરી.
