ત્રણ પુલ તણાયા, મકાનો અને દુકાનોને ભારે નુકસાન
નેપાળમાં ફરી એકવાર કુદરતે વિનાશ વેર્યો છે! ગોર્ખા જિલ્લામાં આવેલી બૂઢી ગંડક નદીમાં અચાનક આવેલા ભયાનક પૂરના કારણે ભારે તારાજી સર્જાઈ છે. પૂરના પ્રચંડ પ્રવાહમાં ત્રણ મહત્વના પુલ તણાઈ ગયા છે, જ્યારે નદી કિનારે આવેલા મકાનો અને દુકાનોને પણ ભારે નુકસાન પહોંચ્યું છે. વહેલી સવારે અચાનક આવેલા પૂરના કારણે સ્થાનિક લોકોમાં અફરાતફરી મચી ગઈ હતી. પરિસ્થિતિ એવી સર્જાઈ કે જીવ બચાવવા માટે લોકોને સુરક્ષિત સ્થળોએ ભાગવાની ફરજ પડી હતી. આ ઘટનાએ ફરી એકવાર નેપાળમાં 26 ઓગસ્ટે સર્જાયેલી ભયાનક કુદરતી આફતની યાદ તાજી કરી દીધી છે.
નેપાળના ગોર્ખા જિલ્લામાં રવિવારની વહેલી સવારે બૂઢી ગંડક નદીમાં અચાનક પૂર આવ્યું હતું. આ પૂરની સૌથી વધુ અસર ચુમનુબરી અને ધારચે ગ્રામીણ નગરપાલિકાના વિસ્તારોમાં જોવા મળી રહી છે. નદીના પાણીનો પ્રવાહ એટલો પ્રચંડ હતો કે અનેક મકાનો, દુકાનો અને પાયાના માળખાને ભારે નુકસાન થયું છે.પ્રાથમિક માહિતી અનુસાર, પૂરના પાણીમાં બે સસ્પેન્શન ફૂટબ્રિજ અને વાહનોની અવરજવર માટે બનાવવામાં આવેલો એક લોખંડનો પુલ તણાઈ ગયો છે. આ ઉપરાંત, નદી કિનારે આવેલા અનેક ઘરોમાં પાણી ઘૂસી ગયું છે, જ્યારે અન્ય મકાનો પર પણ જોખમ તોળાઈ રહ્યું છે. એક કન્સ્ટ્રક્શન કેમ્પ અને હાઇડ્રોપાવર પ્રોજેક્ટનો કેટલોક સામાન પણ પાણીના પ્રચંડ પ્રવાહમાં વહી ગયો હોવાના અહેવાલ છે.
પૂર પાછળ ભૂસ્ખલન જવાબદાર હોવાની આશંકા
આ અચાનક પૂર પાછળ ભૂસ્ખલન કારણભૂત હોવાની પ્રાથમિક આશંકા વ્યક્ત કરવામાં આવી રહી છે. ચુમનુબરી ગ્રામીણ નગરપાલિકા-6 વિસ્તારમાં લોકપા અને ચુમલિંગ વચ્ચે સિયાર નદીનો પ્રવાહ ભૂસ્ખલનના કારણે અવરોધાયો હોવાની શક્યતા છે. આ ઉપરાંત, ચુમચેટમાં ઉંગિલુંગ નદી પાસે પણ ભૂસ્ખલન થયું હોવાની આશંકા વ્યક્ત કરવામાં આવી રહી છે.જોકે, પૂરનું ચોક્કસ કારણ હજુ સુધી સ્પષ્ટ થયું નથી. સંબંધિત અધિકારીઓ પરિસ્થિતિની તપાસ કરી રહ્યા છે અને નુકસાનની વિગતો એકત્રિત કરવામાં આવી રહી છે.
લોકોમાં ભયનો માહોલ, તંત્ર એલર્ટ
વહેલી સવારે અચાનક મોટા અવાજો સંભળાતા સ્થાનિક રહેવાસીઓ અને પ્રવાસીઓમાં ગભરાટ ફેલાયો હતો. લોકો પોતાનો જીવ બચાવવા માટે સુરક્ષિત સ્થળો તરફ દોડી ગયા હતા. સ્થાનિક પ્રશાસન અને પોલીસે લાઉડસ્પીકર દ્વારા નદી કિનારે રહેતા લોકોને સાવચેત રહેવા અને તાત્કાલિક સુરક્ષિત સ્થળોએ ખસી જવા અપીલ કરી હતી.નેપાળના પૂર પૂર્વાનુમાન વિભાગ અને નેશનલ ડિઝાસ્ટર રિસ્ક રિડક્શન એન્ડ મેનેજમેન્ટ ઓથોરિટી દ્વારા પણ ગંભીર પૂરની ચેતવણી આપવામાં આવી છે. લોકોને નદીથી દૂર રહેવા અને ઊંચાઈવાળા સુરક્ષિત વિસ્તારોમાં આશરો લેવા સૂચના આપવામાં આવી છે.
26 ઓગસ્ટની તારાજીની યાદ તાજી
નેપાળમાં ફરી સર્જાયેલી આ કુદરતી આફતે અગાઉની વિનાશક ઘટનાઓની યાદ તાજી કરી છે. 26 ઓગસ્ટની ઘટનામાં પણ ભારે તારાજી સર્જાઈ હતી અને દેશના પાયાના માળખાને મોટું આર્થિક નુકસાન થયું હતું. આપેલી માહિતી મુજબ, તે સમયે નુકસાનનો અંદાજ 1.66 અબજ અમેરિકન ડૉલર હતો.હાલ બૂઢી ગંડક નદીના આસપાસના વિસ્તારોમાં પરિસ્થિતિ પર સતત નજર રાખવામાં આવી રહી છે. તંત્ર માટે સૌથી મોટો પડકાર લોકોની સુરક્ષા સુનિશ્ચિત કરવાનો અને સંભવિત વધુ પૂરની સ્થિતિમાં જાનમાલનું નુકસાન અટકાવવાનો છે.નેપાળમાં કુદરતના આ કહેર વચ્ચે સ્થાનિક લોકો ભયના માહોલમાં જીવી રહ્યા છે. હવે સૌની નજર તંત્રની રાહત અને બચાવ કામગીરી તેમજ નદીના જળસ્તર પર છે. સવાલ એ છે કે આગામી સમયમાં નદીનું પાણી વધુ વધશે કે પરિસ્થિતિ નિયંત્રણમાં આવશે? હાલ લોકોને સાવચેત રહેવા અને તંત્રની સૂચનાઓનું પાલન કરવા અપીલ કરવામાં આવી રહી છે.
