નવી દિલ્હી: ભાજપે (BJP) લોકસભા ચૂંટણી માટે તેના ઉમેદવારોની 12મી યાદી જાહેર કરી છે. યાદીમાં સાત ઉમેદવારોની જાહેરાત કરવામાં આવી છે. મહારાષ્ટ્રની (Maharashtra) એક લોકસભા સીટ સિવાય પંજાબની (Punjab) ત્રણ, ઉત્તર પ્રદેશની (Uttar Pradesh) બે અને પશ્ચિમ બંગાળની (West Bengal) એક સીટ પર ઉમેદવારોના નામ જાહેર કર્યા છે.
યાદી અનુસાર મહારાષ્ટ્રની સતારા લોકસભા સીટથી છત્રપતિ ઉદયનરાજે ભોંસલે, પંજાબના ખદુર સાહિબથી મનજીત સિંહ મન્ના મિયાવિંદ, હોશિયારપુર (SC)થી અનિતા સોમ પ્રકાશ અને ભટિંડાથી પરમપાલ કૌર સિદ્ધ (IAS)ને ટિકિટ આપવામાં આવી છે.
આ સિવાય શશાંક મણિ ત્રિપાઠીને ઉત્તર પ્રદેશની દેવરિયા બેઠક પરથી અને ઠાકુર વિશ્વદીપ સિંહને ફિરોઝાબાદ બેઠક પરથી મેદાનમાં ઉતારવામાં આવ્યા છે. આ સાથે ભાજપે પશ્ચિમ બંગાળની ડાયમંડ હાર્બર લોકસભા સીટ પરથી અભિજીત દાસ (બોબી)ને ટિકિટ આપી છે. અહીં તેમનો મુકાબલો તૃણમૂલ કોંગ્રેસના મહાસચિવ અને વર્તમાન સાંસદ અભિષેક બેનર્જી સાથે થશે.
મોટી વાત એ છે કે યુપીની જે બે સીટો પર ઉમેદવારોની જાહેરાત કરવામાં આવી છે તેમાં દેવરિયા અને ફિરોઝાબાદનો સમાવેશ થાય છે. રાજ્યમાં બ્રિજભૂષણ શરણ સિંહની સીટ કૈસરગંજ પર પાર્ટીએ હજુ સુધી કોઈ નિર્ણય લીધો નથી.
સાતારામાં NCP અને BJP વચ્ચે ટક્કર
પાર્ટીએ મહારાષ્ટ્રના સતારાથી છત્રપતિ ઉદયનરાજે ભોસલેને ટિકિટ આપી છે. સતારા બેઠક મહારાષ્ટ્રની તે 9 બેઠકોમાંથી એક છે જેના પર મહાગઠબંધન દરમિયાન કોઈ નિર્ણય લેવામાં આવ્યો ન હતો. અહીં ભાજપ અને એનસીપી વચ્ચે ટક્કર છે. અહીંથી ભાજપે 2019ની પેટાચૂંટણીમાં પણ છત્રપતિ શિવાજી મહારાજના વંશજ અને વર્તમાન રાજ્યસભા સાંસદ ઉદયનરાજે ભોસલેને પણ ટિકિટ આપી હતી. જેઓ તે સમયે ચૂંટણી હારી ગયા હતા. આ વખતે NCP શરદ પવારના જૂથે શશિકાંત શિંદેને સાતારાથી ટિકિટ આપી છે.
ભાજપે યુપીમાં 73 ઉમેદવારોના નામ જાહેર કર્યા છે
ભાજપે ઉત્તર પ્રદેશની બે બેઠકો માટે ઉમેદવારોના નામ જાહેર કર્યા છે. ઠાકુર વિશ્વદીપ સિંહને ફિરોઝાબાદથી ટિકિટ આપવામાં આવી છે, જ્યારે શશાંક મણિ ત્રિપાઠીને દેવરિયાથી ઉમેદવાર બનાવવામાં આવ્યા છે. અહીંથી ભાજપના વર્તમાન સાંસદ રમાપતિ ત્રિપાઠીની ટિકિટ રદ કરવામાં આવી છે. ભાજપે અત્યાર સુધી યુપીમાં 73 સીટો માટે ઉમેદવારોના નામ જાહેર કર્યા છે. યુપીમાં લોકસભાની 80 બેઠકો છે અને તે સૌથી વધુ લોકસભા સાંસદો ધરાવતું રાજ્ય છે.
