નવી દિલ્હી: વિશ્વમાં ઘણાં વૈજ્ઞાનિકો UFO અને એલિયન્સ (Aliens) પર રિસર્ચ કરી રહ્યા છે. એવામાં ભારતના આ રાજ્યમાં UFO દેખાઇ હોવાની ઘટના સામે આવતા ભારતીય વાયુસેના (IAF) એક્શન મોડમાં આવી હતી. 19 નવેમ્બર 2023 એટલે કે રવિવારે ઇમ્ફાલ એરપોર્ટ પર UFO જોવા મળ્યું હતું. જો કે આ UFO સીઆઈએસએફના (CISF) જવાનોની નજરે જોવાયું હોવાનું સામે આવ્યું છે. આ પછી ત્યાં તાત્કાલિક સિવિલ એરક્રાફ્ટની ઉડાન રોકી દેવામાં આવી હતી. આ અહેવાલ પછી ભારતીય વાયુસેનાએ તરત જ તે UFOની શોધમાં તેના બે રાફેલ ફાઇટર જેટ (Fighter Jet) મોકલ્યા હતા.
ભારતીય વાયુસેનાના ઉચ્ચ અધિકારીઓએ જણાવ્યું હતું કે ઇમ્ફાલ એરપોર્ટ પરથી એક નાગરિક અધિકારી તરફથી UFO જોવા અંગેનો સંદેશ મળ્યો હતો. આ પછી રાફેલ ફાઇટર જેટને તરત જ હાશિમારા એરફોર્સ બેઝથી તે સ્થાન તરફ ઉડાડવામાં આવ્યું જ્યાં યુએફઓ દેખાયો હતો. પરંતુ રાફેલના રડાર પર કોઈ અજાણ્યું વિમાન કે વાહન દેખાતું ન હતું.
તેમજ પાઈલટને આકાશમાં આવી કોઈ વસ્તુ દેખાઈ ન હતી. જેવું પહેલું ફાઈટર જેટ પાછું ફર્યું, તરત જ અન્ય રાફેલ ડબલ ચેક કરવા માટે મોકલવામાં આવ્યું હતું. પરંતુ તે વિસ્તારમાં અને તેની આસપાસ કોઈ યુએફઓ અથવા એલિયનશિપ જોવા મળ્યું ન હતું. પરંતુ ભારતીય વાયુસેનાના ઈસ્ટર્ન કમાન્ડે તરત જ તેની એર ડિફેન્સ રિસ્પોન્સ મિકેનિઝમ શરૂ કરી દીધી.
ઇસ્ટર્ન કમાન્ડે X પર લખ્યું છે કે ભારતીય વાયુસેનાએ એર ડિફેન્સ રિસ્પોન્સ મિકેનિઝમને સક્રિય કરી દીધું છે. કારણ કે વિઝ્યુઅલ ઇનપુટ્સ ઇમ્ફાલ એરપોર્ટ પરથી આવ્યા હતા. એવું કહેવાય છે કે લગભગ 4 વાગ્યે એક UFO એરફિલ્ડથી પશ્ચિમ તરફ જતો જોવા મળ્યો હતો. જ્યારે એરફોર્સે સર્ચ ઓપરેશન શરૂ કર્યું ત્યારે તેને ત્યાં કંઈ મળ્યું ન હતું. જો કે તે પછી તે નાની ઉડતી વસ્તુ તે વિસ્તારમાં ફરી જોવા મળી ન હતી.
આ દરમિયાન ઈન્ડિગોનું એક વિમાન કોલકાતા મોકલવામાં આવ્યું હતું. તે થોડો સમય આકાશમાં ઉડતો રહ્યો હતો. આ સિવાય 25 મિનિટ પછી બીજી ફ્લાઈટને ગુવાહાટી ડાયવર્ટ કરવામાં આવી હતી. જ્યારે એરફોર્સ તરફથી કન્ફર્મેશન મળ્યું ત્યારે બાકીની ફ્લાઈટ્સ મોડી પડી હતી. આ ઘટનાને કારણે ઘણી ફ્લાઈટ્સ ત્રણ કલાક મોડી પડી છે. આ ઘટના અંગે એરફોર્સને તાત્કાલિક જાણ કરવામાં આવી હતી. તેમની ઈસ્ટર્ન કમાન્ડ શિલોંગમાં છે. મણિપુર તેની સરહદ નાગાલેન્ડ, મિઝોરમ અને આસામ સાથે વહેંચે છે. આ સિવાય તેની સરહદ પૂર્વ તરફ મ્યાનમાર સાથે જોડાય છે.
