દિલ્હીમાં મુખ્ય ચૂંટણી કમિશનર જ્ઞાનેશ કુમાર સામે વિરોધ નોંધાવી રહેલી કોકરોચ જનતા પાર્ટી (CJP)ના નેતાઓએ મંગળવારે સવારે જંતર-મંતર ખાતે પહોંચીને પ્રદર્શન કરવાનો પ્રયાસ કર્યો હતો. જંતર-મંતર પર વિરોધ પ્રદર્શન માટે પ્રતિબંધ હોવા છતાં પાર્ટીના નેતાઓ સૌરવ દાસ અને આશુતોષ રાંકા પોતાના કેટલાક સમર્થકો સાથે ત્યાં પહોંચી ગયા હતા. તેમણે તિરંગો અને પાર્ટીનો ઝંડો લહેરાવી સૂત્રોચ્ચાર કર્યા હતા. જોકે, પ્રદર્શન શરૂ થતાં જ દિલ્હી પોલીસે બંને નેતાઓની અટકાયત કરી હતી. મળતી માહિતી મુજબ, મંગળવારે સવારે આશરે 9 વાગ્યે CJPના નેતાઓ જંતર-મંતર પરિસરમાં પ્રવેશ્યા હતા. આ દરમિયાન આશુતોષ રાંકાએ સોશિયલ મીડિયા પ્લેટફોર્મ X પર એક વીડિયો પણ શેર કર્યો હતો. વીડિયોમાં તેઓ રાષ્ટ્રધ્વજ અને પાર્ટીના ઝંડા સાથે ‘જ્ઞાનેશ કુમાર રાજીનામું આપો’ના નારા લગાવતા જોવા મળ્યા હતા. જોકે, પોલીસની ટીમે સ્થળ પર પહોંચીને બંને નેતાઓને અટકાયતમાં લીધા હતા.
જંતર-મંતરને વિરોધ પ્રદર્શન માટેનાં અધિકૃત સ્થળોની યાદીમાંથી દૂર કરવાના નિર્ણય સામે CJPએ નારાજગી વ્યક્ત કરી છે. પાર્ટીના નેતાઓએ આ નિર્ણયનો વિરોધ કરતાં તેને વિરોધનો અવાજ દબાવવાનો પ્રયાસ ગણાવ્યો છે. આ જ મુદ્દે પાર્ટી દ્વારા મુખ્ય ચૂંટણી કમિશનર સામે પણ વિરોધ નોંધાવવામાં આવી રહ્યો છે. આ અગાઉ 10 ઓક્ટોબરે પણ CJPએ દિલ્હીમાં આંદોલન કરવાની જાહેરાત કરી હતી. તે સમયે પાર્ટીના સંયોજક અભિજિત દીપક સહિત સૌરવ દાસ અને આશુતોષ રાંકાને દિલ્હી એરપોર્ટ પર અટકાયતમાં લેવામાં આવ્યા હતા. આ ઉપરાંત દિલ્હીના વિવિધ વિસ્તારોમાંથી અનેક સમર્થકો અને પ્રદર્શનકારીઓની પણ અટકાયત કરવામાં આવી હતી. બાદમાં તેમને મુક્ત કરી દેવામાં આવ્યા હતા. હવે ફરી એકવાર CJPના નેતાઓએ જંતર-મંતર ખાતે પહોંચીને વિરોધ પ્રદર્શન કરવાનો પ્રયાસ કરતાં દિલ્હીમાં રાજકીય ગરમાવો જોવા મળ્યો છે.
