પુણેના યુવા રિયલ એસ્ટેટ ઉદ્યોગપતિ કેતન અગ્રવાલની હત્યાના કેસમાં દરરોજ નવા ચોંકાવનારા ખુલાસા થઈ રહ્યા છે. શરૂઆતમાં ટ્રેકિંગ દરમિયાન અકસ્માત હોવાનું માનવામાં આવેલું આ મોત હવે પૂર્વયોજિત હત્યા હોવાનું પોલીસ તપાસમાં સામે આવ્યું છે. હવે તપાસ દરમિયાન વધુ એક મહત્વપૂર્ણ ખુલાસો થયો છે કે મુખ્ય આરોપી સિયા ગોયલ અને તેનો પ્રેમી ચેતન ચૌધરીએ હત્યા પહેલાં અને પછી પોતાના મોબાઇલ ફોનમાંથી તમામ મહત્વના ડિજિટલ પુરાવા નષ્ટ કરવાનો પ્રયાસ કર્યો હતો. પોલીસે જણાવ્યું છે કે બંનેએ કોલ લોગ, ચેટ હિસ્ટ્રી, લોકેશન ડેટા અને મોબાઇલના રિસાયકલ બિન સુધી ખાલી કરી દીધા હતા જેથી તપાસ એજન્સીઓને કોઈ પુરાવો ન મળે.
પુણે ગ્રામ્ય પોલીસના જણાવ્યા મુજબ ડિજિટલ ફોરેન્સિક તપાસ દરમિયાન જાણવા મળ્યું કે બંને આરોપીઓએ ઘટનાના થોડા સમય પહેલાં અને ઘટના બાદ પોતાના ફોનમાંથી અનેક પ્રકારની માહિતી ડિલીટ કરી હતી. તેમાં ફોન કોલની વિગતો, મેસેજ, સોશિયલ મીડિયા ચેટ, ફોટોગ્રાફ્સ, વીડિયો અને અન્ય મહત્વપૂર્ણ ફાઇલોનો સમાવેશ થાય છે. પોલીસે હવે અદ્યતન ડિજિટલ ફોરેન્સિક ટેક્નોલોજીની મદદથી ડિલીટ કરાયેલ માહિતી પુનઃપ્રાપ્ત કરવાની કાર્યવાહી શરૂ કરી છે.
તપાસમાં સામે આવ્યું છે કે સિયા ગોયલ અને ચેતન ચૌધરી છેલ્લા ઘણા મહિનાથી સતત સંપર્કમાં હતા. જો કે પોલીસના જણાવ્યા મુજબ બંને વચ્ચે છેલ્લા છ મહિનામાં આશરે 2,000થી વધુ ફોન કોલ થયા હતા અને બંનેએ મળીને લગભગ 238 કલાક ફોન પર વાતચીત કરી હતી. તપાસ અધિકારીઓને શંકા છે કે આ લાંબી વાતચીત દરમિયાન જ હત્યાનું કાવતરું ઘડવામાં આવ્યું હતું.મૃતક કેતન અગ્રવાલ પુણેના ગહુંજે વિસ્તારનો રહેવાસી હતો અને પરિવાર સંચાલિત રિયલ એસ્ટેટ કંપનીમાં ડિરેક્ટર તથા ચીફ માર્કેટિંગ ઓફિસર તરીકે કાર્યરત હતો. તેણે વિદેશમાંથી ઉદ્યોગસાહસિકતામાં ઉચ્ચ અભ્યાસ કર્યો હતો અને પરિવારના વ્યવસાયમાં મહત્વપૂર્ણ ભૂમિકા ભજવી રહ્યો હતો. પરિવાર દ્વારા તેના લગ્નની તૈયારીઓ પણ જોરશોરથી ચાલી રહી હતી.
પોલીસ તપાસમાં જાણવા મળ્યું કે કેતનની સગાઈ સિયા ગોયલ સાથે થઈ હતી અને થોડા મહિનાઓમાં બંનેના લગ્ન થવાના હતા. જોકે સિયા પહેલાથી જ ચેતન ચૌધરી સાથે પ્રેમ સંબંધમાં હતી. પરિવારના દબાણને કારણે તેણે કેતન સાથે સગાઈ કરી હતી, પરંતુ તે આ સંબંધથી ખુશ નહોતી. પોલીસનું માનવું છે કે કેતન તેમના સંબંધમાં સૌથી મોટો અવરોધ બની ગયો હતો અને તેથી બંનેએ મળીને તેને રસ્તામાંથી દૂર કરવાનો નિર્ણય લીધો.તપાસમાં એ પણ બહાર આવ્યું છે કે આ હત્યા એક દિવસમાં લેવાયેલ નિર્ણય નહોતો. આરોપીઓએ અનેક વખત લોહગઢ કિલ્લા પર જઈને હત્યાનો પ્રયાસ કર્યો હતો. પ્રથમ પ્રયાસ દરમિયાન કેતન બચી ગયો હતો. ત્યારબાદ બીજી અને ત્રીજી વખત પણ તક ન મળતા યોજના નિષ્ફળ ગઈ હતી. આખરે 18 જૂનના રોજ બંનેએ પોતાની યોજના સફળ બનાવી અને કેતનને લગભગ 300 ફૂટ ઊંડી ખીણમાં ધકેલી દીધો હોવાનું પોલીસનું કહેવું છે.
ઘટનાના દિવસે સિયા અને ચેતન પહેલાં એક કેફેમાં મળ્યા હતા. ત્યાં બંનેએ આખી યોજના પર છેલ્લી ચર્ચા કરી હતી. ત્યારબાદ બંને અલગ-અલગ રીતે લોહગઢ કિલ્લા પહોંચ્યા જેથી કોઈને શંકા ન જાય. પોલીસના જણાવ્યા મુજબ ચેતન કિલ્લા પર દૂરથી નજર રાખી રહ્યો હતો અને સિયાના સંકેતની રાહ જોઈ રહ્યો હતો. યોગ્ય તક મળતા તેણે કેતનને ખીણમાં ધક્કો મારી દીધો.હત્યા બાદ સિયાએ પોલીસને જણાવ્યું હતું કે કેતન ફોટો પાડતી વખતે પગ લપસતાં ખીણમાં પડી ગયો હતો.શરૂઆતમાં પોલીસને આ ઘટના અકસ્માત લાગી હતી. જોકે પરિવારને આ વાત પર શંકા હતી અને તેમણે ઊંડાણ પૂર્વક તપાસની માંગ કરી હતી. ત્યારબાદ પોલીસે સીસીટીવી ફૂટેજ, મોબાઇલ લોકેશન, કોલ રેકોર્ડ, ડિજિટલ ડેટા અને ફોરેન્સિક પુરાવાના આધારે સમગ્ર કાવતરાનો પર્દાફાશ કર્યો.
તપાસ દરમિયાન એક મહત્વપૂર્ણ બાબત એ પણ સામે આવી કે સિયાએ લગ્ન પહેલાં વિદેશમાં થનારા પ્રી-વેડિંગ ના ફોટોશૂટને અટકાવવા માટે કેતનનો પાસપોર્ટ પણ છુપાવી દીધો હતો. પોલીસના જણાવ્યા મુજબ તેણે ખાલાપુર નજીક એક મહિલા શૌચાલયમાં પાસપોર્ટ ફેંકી દીધો હતો જેથી વિદેશ પ્રવાસ રદ થઈ જાય અને આગળની યોજના અમલમાં મૂકી શકાય.હવે પોલીસે આરોપીઓના મોબાઇલમાંથી ડિલીટ કરાયેલા ડેટાને રિકવર કરવા માટે સાયબર નિષ્ણાતોની મદદ લીધી છે. તપાસ એજન્સીનું માનવું છે કે ડિલીટ કરાયેલા મેસેજ, કોલ ડિટેલ્સ અને અન્ય ડિજિટલ પુરાવા કેસમાં વધુ મહત્વપૂર્ણ સાબિત થઈ શકે છે. સાથે જ બંને આરોપીઓના ક્લાઉડ બેકઅપ, ઈ-મેઇલ એકાઉન્ટ અને અન્ય ડિજિટલ ઉપકરણોની પણ તપાસ કરવામાં આવી રહી છે.
આ કેસમાં વધુ એક મોટો વળાંક ત્યારે આવ્યો જ્યારે પૂછપરછ દરમિયાન સિયા ગોયલ અને ચેતન ચૌધરીએ એકબીજા પર જ આરોપ મૂકવાનું શરૂ કર્યું. બંનેએ પોલીસ સમક્ષ દાવો કર્યો કે હત્યાની યોજના બીજા વ્યક્તિએ બનાવી હતી અને પોતે માત્ર તેની સાથે જોડાયા હતા. જોકે પોલીસનું કહેવું છે કે અત્યાર સુધી મળેલા પુરાવા દર્શાવે છે કે બંનેએ મળીને સંપૂર્ણ આયોજન કર્યું હતું.પોલીસે આરોપીઓને કસ્ટડીમાં લઈને ઘટનાસ્થળ પર ક્રાઇમ સીનનું રિકન્સ્ટ્રક્શન પણ કર્યું છે. ત્યાંથી મળેલા પુરાવા, સીસીટીવી ફૂટેજ અને ટેક્નિકલ વિશ્લેષણના આધારે તપાસ વધુ મજબૂત બની છે. અધિકારીઓનું કહેવું છે કે કેસમાં હજુ કેટલાક ડિજિટલ અને વૈજ્ઞાનિક પુરાવાની તપાસ ચાલી રહી છે અને તપાસ પૂર્ણ થયા બાદ વિગતવાર ચાર્જશીટ કોર્ટમાં રજૂ કરવામાં આવશે.
આ સમગ્ર ઘટનાએ દેશભરમાં ભારે ચર્ચા જગાવી છે. વિશ્વાસ, પ્રેમ અને સંબંધોના નામે રચાયેલી આ કથિત સાજિશે સૌને ચોંકાવી દીધા છે. પોલીસનું કહેવું છે કે ડિજિટલ પુરાવા, ફોરેન્સિક વિશ્લેષણ અને અન્ય સાક્ષીઓના આધારે કેસને વધુ મજબૂત બનાવવામાં આવી રહ્યો છે. જો આરોપો કોર્ટમાં સાબિત થશે તો બંને આરોપીઓને કાયદા મુજબ કડક સજા થઈ શકે છે. હાલમાં બંને આરોપીઓ પોલીસ કસ્ટડીમાં છે અને કેસની તપાસ સતત આગળ વધી રહી છે.
