પંજાબના અમૃતસર આંતરરાષ્ટ્રીય એરપોર્ટ નજીક શંકાસ્પદ ડ્રોન જોવા મળતાં સુરક્ષાને ધ્યાનમાં રાખીને થોડા સમય માટે રનવે અને એરસ્પેસ બંધ કરવાની ફરજ પડી હતી. રવિવારે રાત્રે આશરે 10 વાગ્યે ડ્રોન દેખાયા બાદ એરપોર્ટ પર ફ્લાઇટનું સંચાલન પ્રભાવિત થયું હતું. આ દરમિયાન ત્રણ ફ્લાઇટને અન્ય એરપોર્ટ તરફ ડાયવર્ટ કરવામાં આવી હતી, જેના કારણે અનેક મુસાફરોને મુશ્કેલીનો સામનો કરવો પડ્યો હતો. ડ્રોન દેખાતાં જ એરપોર્ટ તંત્રએ સાવચેતીનાં પગલાં લીધાં હતાં. એર ઇન્ડિયાની એક ફ્લાઇટને દિલ્હી પરત મોકલવામાં આવી હતી. મુંબઈથી અમૃતસર આવી રહેલી ઇન્ડિગોની ફ્લાઇટને ચંડીગઢ તરફ ડાયવર્ટ કરવામાં આવી હતી, જ્યારે કુઆલાલંપુરથી અમૃતસર આવી રહેલી મલેશિયન ફ્લાઇટને દિલ્હી મોકલવામાં આવી હતી. ફ્લાઇટના માર્ગમાં અચાનક ફેરફાર થતાં મુસાફરોની મુસાફરીના સમયપત્રક પર અસર પડી હતી. કેટલીક ટિકિટો રદ થતાં મુસાફરોમાં નિરાશા પણ જોવા મળી હતી.
અમૃતસર એરપોર્ટ નજીક ડ્રોન દેખાવાની આ પહેલી ઘટના નથી. અગાઉ 6 સપ્ટેમ્બરે પણ રનવે અને એરપોર્ટના ઓપરેશનલ વિસ્તારની આસપાસ ડ્રોન જોવા મળ્યાં હતાં. તે સમયે પણ આશરે 90 મિનિટ સુધી ફ્લાઇટનું સંચાલન રોકવું પડ્યું હતું. વારંવાર આવી ઘટનાઓ સામે આવતાં એરપોર્ટની સુરક્ષા વ્યવસ્થાને લઈને તપાસ તેજ કરવામાં આવી છે. પ્રાથમિક તપાસ દરમિયાન પોલીસને આશંકા છે કે નજીકના એક ગામમાં યોજાયેલી કબડ્ડી ટુર્નામેન્ટનું વીડિયો શૂટિંગ કરવા માટે આ ડ્રોનનો ઉપયોગ થયો હોઈ શકે છે. જોકે, ડ્રોન ક્યાંથી આવ્યાં હતાં અને તેનો ઉપયોગ કોણ કરી રહ્યું હતું તે અંગે હજુ સુધી સ્પષ્ટતા થઈ નથી. અમૃતસર ગ્રામીણ જિલ્લાના એસએસપી કવલપ્રીતના જણાવ્યા અનુસાર, પોલીસ આ ઘટનાની તપાસ કરી રહી છે. ડ્રોનના સંચાલકો અને તેના ઉદ્દેશ અંગે માહિતી મેળવવા માટે આસપાસના વિસ્તારોમાં તપાસ હાથ ધરવામાં આવી છે. તપાસ પૂર્ણ થયા બાદ જ ડ્રોન દેખાવા પાછળનું ચોક્કસ કારણ જાણી શકાશે.
