પશ્ચિમ બંગાળ વિધાનસભા ચૂંટણીમાં ભાજપને મળેલી ભવ્ય જીત બાદ હવે રાજ્યમાં નવી સરકાર રચવાની પ્રક્રિયા ઝડપી બની ગઈ છે. જીત પછીનો સૌથી મોટો સવાલ એ છે કે બંગાળનો આગામી મુખ્યમંત્રી કોણ બનશે. ભાજપે જાહેરાત કરી છે કે 9 મેના રોજ શપથ ગ્રહણ સમારોહ યોજાશે, જેથી રાજકીય ગતિવિધિઓ વધુ તેજ બની ગઈ છે. આ દિવસની પસંદગી પાછળ પણ ખાસ કારણ હોવાનું માનવામાં આવે છે. 9 મે રવિન્દ્રનાથ ટાગોરની જયંતીનો દિવસ છે, અને ભાજપ આ દિવસને પ્રતિકાત્મક રીતે મહત્વ આપવું ઈચ્છે છે એવી ચર્ચા ચાલી રહી છે. જોકે, મુખ્યમંત્રીના નામ પર હજુ સુધી કોઈ સત્તાવાર જાહેરાત કરવામાં આવી નથી, જેના કારણે સસ્પેન્સ યથાવત છે.
મુખ્યમંત્રી પદની રેસમાં સૌથી આગળ શુભેન્દુ અધિકારીનું નામ ચાલી રહ્યું છે. તેમણે નંદીગ્રામ અને ભવાનીપુર જેવી બે મહત્વપૂર્ણ બેઠકો પર જીત મેળવી છે. ખાસ કરીને મમતા બેનરજીને હરાવવાથી તેમની રાજકીય પકડ વધુ મજબૂત બની છે. 2021 બાદ હવે 2026માં પણ તેમણે પોતાની તાકાત સાબિત કરી છે, જેના કારણે તેઓ મુખ્ય દાવેદાર તરીકે જોવામાં આવે છે. પરંતુ, પાર્ટીમાં માત્ર એક જ નામ પર ચર્ચા નથી. ભાજપના પ્રદેશ પ્રમુખ શમિક ભટ્ટાચાર્ય પણ આ રેસમાં છે. તેમની સંગઠન ક્ષમતા અને નેતૃત્વને ધ્યાનમાં રાખીને પાર્ટી તેમને પણ એક મજબૂત વિકલ્પ તરીકે જોઈ રહી છે. આ સિવાય, ભાજપના વરિષ્ઠ નેતા દિલીપ ઘોષ અને ઉત્પલ મહારાજના નામ પણ ચર્ચામાં છે. આ ચારેય નેતાઓમાંથી કોણ મુખ્યમંત્રી બનશે તે અંગે પાર્ટી અંદર ઊંડા વિચારવિમર્શ ચાલી રહ્યો છે.
આ નિર્ણય માટે ભાજપના ટોચના નેતાઓ દિલ્હીમાં બેઠકો કરી રહ્યા છે. પ્રધાનમંત્રી નરેન્દ્ર મોદી, ગૃહમંત્રી અમિત શાહ અને ભાજપ અધ્યક્ષ નિતિન નવીન વચ્ચે મહત્વપૂર્ણ ચર્ચા થવાની શક્યતા છે. આ બેઠકમાં બંગાળના રાજકીય પરિસ્થિતિ, ધારાસભ્યોના અભિપ્રાય અને કેન્દ્રિય નિરીક્ષકોના રિપોર્ટના આધારે અંતિમ નિર્ણય લેવાશે. સૂત્રોના જણાવ્યા અનુસાર, શુભેન્દુ અધિકારી અને શમિક ભટ્ટાચાર્યને દિલ્હી બોલાવવામાં આવી શકે છે. ત્યાં તેમની સાથે ચર્ચા કરીને પાર્ટી હાઈકમાન્ડ અંતિમ નામ પર મુદ્રાંકન કરશે. આ સમગ્ર પ્રક્રિયામાં કેન્દ્રિય નેતૃત્વની ભૂમિકા ખૂબ જ મહત્વપૂર્ણ રહેશે.
બીજી તરફ, સંરક્ષણ મંત્રી રાજનાથ સિંહ પણ કોલકાતા જઈ શકે છે અને ભાજપના જીતેલા ધારાસભ્યો સાથે બેઠક કરી શકે છે. આ બેઠકમાં ધારાસભ્યોના મત અને સૂચનો લેવામાં આવશે, જેથી મુખ્યમંત્રી પસંદગીમાં પારદર્શિતા અને એકતા જળવાઈ રહે. આ સમગ્ર પરિસ્થિતિમાં સ્પષ્ટ છે કે ભાજપ કોઈ પણ પ્રકારનો ઉતાવળમાં નિર્ણય લેવા માંગતી નથી. પાર્ટી એવું નેતૃત્વ પસંદ કરવા માંગે છે જે બંગાળમાં લાંબા ગાળે મજબૂત સરકાર આપી શકે અને વિકાસના મુદ્દાઓ પર કામ કરી શકે. અત્યારે બંગાળની રાજનીતિમાં ઉત્સુકતા અને ઉત્સાહ બંને જોવા મળી રહ્યા છે. લોકો આતુરતાથી રાહ જોઈ રહ્યા છે કે આખરે મુખ્યમંત્રી તરીકે કોનું નામ જાહેર થશે. ભાજપ માટે આ નિર્ણય ખૂબ જ મહત્વપૂર્ણ છે, કારણ કે આ રાજ્યમાં પહેલીવાર સત્તા સંભાળવાની તક મળી રહી છે. બંગાળમાં સરકાર રચનાની પ્રક્રિયા પૂરી ઝડપે ચાલી રહી છે અને ટૂંક સમયમાં મુખ્યમંત્રીના નામ પરનો સસ્પેન્સ સમાપ્ત થશે. ત્યાં સુધી અનુમાનની અટકળો જ કરી શકાય, બીજું શું!
