ઇંગ્લેન્ડના પૂર્વ દિગ્ગજ કેવિન પીટરસનનો સનસનાટીભર્યો ખુલાસો
ક્રિકેટના મેદાન પર પોતાની આક્રમક બેટિંગથી બોલરોમાં ફાળ પાડનાર ઇંગ્લેન્ડના પૂર્વ કેપ્ટન કેવિન પીટરસને હાલમાં જ એક એવો ધડાકો કર્યો છે જેણે ક્રિકેટ જગતમાં ચર્ચા જગાવી છે. પીટરસએ સ્પષ્ટપણે જણાવ્યું છે કે ઇન્ડિયન પ્રીમિયર લીગ (IPL) પ્રત્યેના તેમના પ્રેમને કારણે તેમનું આંતરરાષ્ટ્રીય ક્રિકેટ કરિયર વહેલું સમાપ્ત થઈ ગયું હતું.
IPL અને ઇંગ્લેન્ડ બોર્ડ વચ્ચેનો સંઘર્ષ: પીટરસ એ એક મુલાકાતમાં જણાવ્યું હતું કે જ્યારે 2008માં IPLની શરૂઆત થઈ, ત્યારે તેઓ આ ટૂર્નામેન્ટના ભવિષ્યને સમજી ગયા હતા. તેઓ ઈચ્છતા હતા કે ઇંગ્લેન્ડના ખેલાડીઓ પણ આમાં રમે. જોકે, તે સમયે ઇંગ્લેન્ડ એન્ડ વેલ્સ ક્રિકેટ બોર્ડ (ECB) અને ટીમના કેટલાક સિનિયર ખેલાડીઓ IPLની વિરુદ્ધમાં હતા. પીટરસએ કહ્યું, “મેં જ્યારે IPLમાં રમવાની તરફેણ કરી, ત્યારે મને ગદ્દાર જેવો અનુભવ કરાવવામાં આવ્યો હતો. બોર્ડ સાથેના મારા સંબંધો આ મુદ્દે જ બગડ્યા હતા.”
શાનદાર આંકડા છતાં વહેલી વિદાય: કેવિન પીટરસન ઇંગ્લેન્ડના ઇતિહાસના સૌથી સફળ બેટ્સમેનોમાંના એક છે. તેમના આંકડા જ તેમની ક્ષમતાની સાક્ષી પૂરે છે:
ટેસ્ટ ક્રિકેટ: 104 મેચોમાં તેમણે 47.28 ની સરેરાશ સાથે 8,181 રન બનાવ્યા હતા, જેમાં 23 સદીઓ સામેલ હતી.
વનડે (ODI): 136 મેચોમાં 40.73 ની સરેરાશથી 4,440 રન નોંધાવ્યા હતા.
T20 આંતરરાષ્ટ્રીય: 37 મેચોમાં 37.93 ની સરેરાશથી 1,176 રન બનાવ્યા હતા. આટલા મજબૂત આંકડા અને ફોર્મ હોવા છતાં, 2014માં એશેઝ શ્રેણીમાં મળેલી હાર બાદ તેમને અચાનક ટીમમાંથી બહાર કરી દેવામાં આવ્યા હતા. પીટરસન માને છે કે આ નિર્ણય રમત પર નહીં પણ IPL અને બોર્ડ સાથેના આંતરિક વિવાદો પર આધારિત હતો.
ડ્રેસિંગ રૂમનું રાજકારણ: પીટરસને ઘટસ્ફોટ કર્યો કે તેમને ડ્રેસિંગ રૂમમાં એકલા પાડી દેવામાં આવ્યા હતા. તેમની અને તત્કાલીન કોચ એન્ડી ફ્લાવર વચ્ચેના મતભેદો પણ ચરમસીમાએ હતા. તેમણે વધુમાં ઉમેર્યું કે, “આજે ઇંગ્લેન્ડના તમામ ખેલાડીઓ IPL રમે છે અને બોર્ડ તેમને પ્રોત્સાહન આપે છે, પરંતુ જ્યારે મેં આ શરૂઆત કરી ત્યારે મારે તેની કિંમત મારું કરિયર ગુમાવીને ચૂકવવી પડી હતી.”
પીટરસનનું આ નિવેદન ફરી એકવાર એ સાબિત કરે છે કે ક્રિકેટના આધુનિકીકરણ અને IPL જેવી લીગના પ્રારંભિક દિવસોમાં જે ખેલાડીઓએ અવાજ ઉઠાવ્યો હતો, તેમણે સિસ્ટમ સામે લડવામાં ઘણું સહન કરવું પડ્યું હતું.
