SURAT : સુરત એરપોર્ટની ( AIRPORT) આસપાસના વિસ્તારોમાં પક્ષીઓની સંખ્યા વધારે દેખાતાંભવિષ્યમાં કોઇ દુર્ઘટના નહી થાય તે માટે એરપોર્ટ ઓથોરિટી દ્વારા પગલાઓ લેવાઇ રહ્યા છે. પક્ષીઓના લીધે બર્ડ હિટ (BIRD HIT) ની ઘટના નહીં થાય તે માટે એરપોર્ટ ફરતે 10 કિ.મી. વિસ્તારમાં આવતીકાલે તા. 11 ફેબ્રુઆરીથી ઈન્સપેક્શન શરૂ કરવામાં આવશે. કોઈમ્બતુરની સલીમ અલી સેન્ટર ફોર ઓર્નિથોલોજી એન્ડ નેચરલ હિસ્ટ્રીના પ્રિન્સીપલ સાયન્ટિસ્ટ ડો. પી. પ્રમોદની ટીમ સુરત એરપોર્ટ પર આવી છે. એરપોર્ટ પાસેના વિસ્તારોમાં થનારા ઈન્સપેક્શનમાં સુરત એરપોર્ટ અને પાલિકાના અધિકારીઓ પણ જોડાશે.
આ વિશે માહિતી આપતા સુરત એરપોર્ટના ડિરેક્ટર અમન સૈનીએ કહ્યું કે, એરપોર્ટ પર પોલીસ, એસએમસી અને એએઆઈના અધિકારીઓની આજે સંયુક્ત બેઠક મળી હતી, જેમાં જુદા જુદા એરપોર્ટ પર બર્ડ હિટના કારણો અંગે ચર્ચા થઈ હતી. બર્ડ હિટને કઈ રીતે નિયંત્રણમાં લાવી શકાય તે મામલે કમિટી ગઠિત કરવામાં આવી છે. આ કમિટીમાં ડો. પી. પ્રમોદ, પાલિકાના અધિકારીઓ તથા એરપોર્ટ ઓથોરિટીના અધિકારીઓનો સમાવેશ કરાયો છે. આ કમિટી દ્વારા એરપોર્ટની ચારેતરફના દસ કિલોમીટર વિસ્તારમાં કયા પક્ષીઓની અવરજવર રહે છે તેનો અભ્યાસ કરવામાં આવશે. ત્યાર બાદ રિપોર્ટ સબમિટ કરી બર્ડહિટની ઘટનાને ઘટાડવા પ્રયાસ કરાશે. પાછલા ત્રણ વર્ષમાં સુરત એરપોર્ટ પર બર્ડહિટની 60થી વધુ ઘટનાઓ નોંધાઈ છે ત્યારે ભવિષ્યમાં મોટી દુર્ઘટના નહીં થાય તે માટે પ્રયાસો શરૂ કરાયા છે.
મે 2017 થી, સુરત એરપોર્ટ પર ફ્લાઇટ્સની સંખ્યામાં નોંધપાત્ર વધારો થયો છે. તેમજ મુસાફરોનો ટ્રાફિક પણ વધ્યો છે. પરંતુ પક્ષીઓની હિટ થવાની વધતી ઘટનાઓએ સુરત એરપોર્ટ ઓથોરિટીની ચિંતા વધારી દીધી છે. ખરેખર સુરત એરપોર્ટ પર દર અઠવાડિયે બર્ડ હિટના બે-ત્રણ શંકાસ્પદ કેસ નોંધાય રહ્યા છે. ચોમાસામાં આ સંખ્યા વધુ વધી શકે છે.
આનું મુખ્ય કારણ એરપોર્ટની આજુબાજુનો ઝીંગા તળાવ, ડ્રેનેજ લાઇન અને કચરો નાખવાનો છે. 2019-20ની બર્ડ હિટિંગની ઘટનાઓ મુજબ સુરત ચોથા સ્થાને છે. 2020-21 માટેનો ડેટા આવવાનો બાકી છે. માર્ચ મહિનામાં ડેટા જાહેર થયા બાદ એવું અનુમાન કરવામાં આવે છે કે પક્ષીગ્રસ્ત ઘટનાઓમાં સુરત પણ પ્રથમ સ્થાને આવી શકે છે.
આવી સ્થિતિમાં, એરપોર્ટ વહીવટીતંત્ર સભાન બન્યું છે કે બર્ડ હિટને કારણે કોઈ મોટો અકસ્માત ન થાય અને સમાધાનની શોધ શરૂ કરી દીધી છે. મળતી માહિતી મુજબ એરપોર્ટ વહીવટીતંત્રે બર્ડ હિટ્સ ઘટાડવા માટે કોઈમ્બતુરના સલીમ અલી સેન્ટર ફોર ઓર્નિથોલોજી એન્ડ નેચરલ હિસ્ટ્રી (સેકન) ની મદદ લીધી હતી.
આ સંસ્થા અહીં ત્રણ વર્ષ અભ્યાસ કરશે. નોંધનીય છે કે, વર્ષ 2018 ની શરૂઆતમાં, એરપોર્ટ પર બર્ડ હિટની સમસ્યાને ઘટાડવા માટે કૃષિ નિષ્ણાતોની મદદ લેવામાં આવી હતી. પરંતુ તેનો કોઈ ફાયદો થયો નહીં.
