મુંબઈ(Mumbai): મનોરંજનની દુનિયામાંથી ખૂબ જ દુઃખદ અને આઘાતજનક સમાચાર સામે આવ્યા છે. પ્રખ્યાત ટીવી અભિનેતા (TvActor) ઋતુરાજ સિંહનું (RuturajsinghDeath) નિધન થયું છે. 59 વર્ષની વયે અભિનેતાએ આ દુનિયાને હંમેશ માટે અલવિદા કહી દીધું છે. અભિનેતાના મૃત્યુનું કારણ કાર્ડિયાક અરેસ્ટ હોવાનું કહેવાય છે.
ટીવી શો, વેબ સિરીઝ અને ફિલ્મોમાં પોતાના દમદાર અભિનયથી લોકોના દિલો પર ઊંડી છાપ છોડનાર પીઢ કલાકારના અવસાનના સમાચારથી તેમના ચાહકોને મોટો આઘાત લાગ્યો છે. પરિવારજનો પણ આઘાતમાં સરી પડ્યા છે.
અભિનેતા અમિત બહલે ઋતુરાજના મૃત્યુના સમાચારને સમર્થન આપ્યું છે. તેમણે જણાવ્યું કે ઋતુરાજને ગઈકાલે રાત્રે લગભગ 12:30 વાગે કાર્ડિયાક અરેસ્ટ આવ્યો હતો, ત્યારબાદ તેનું મૃત્યુ થયું હતું. ઋતુરાજને પહેલાથી જ સ્વાદુપિંડ સંબંધિત સ્વાસ્થ્ય સમસ્યાઓ હતી અને તેની સારવાર પણ ચાલી રહી હતી.
નિર્માતા સંદીપ સિકંદ પણ ઋતુરાજ સિંહના નિધનથી ખૂબ જ દુઃખી છે. અભિનેતાના મૃત્યુ પર તેણે કહ્યું- હું આઘાતમાં છું. આ સમાચાર સાંભળીને મારું હૃદય તૂટી ગયું છે. આજે સવારે કોઈએ મારા વોટ્સએપ ગ્રુપ પર આ સમાચાર શેર કર્યા અને ત્યારથી હું આઘાતમાં છું.
મેં ઋતુરાજ સિંહ સાથે ટીવી સીરિયલ ‘કહાની ઘર ઘર કી’માં ઘણું કામ કર્યું છે. દરેક વ્યક્તિ જાણે છે કે તે એક ટેલેન્ટેડ એક્ટર હતો પરંતુ તેના કરતાં પણ તે એક ઉત્તમ માનવી હતો. તેના મૃત્યુના સમાચાર મારા માટે ભારે આઘાત સમાન છે. હું આશા રાખું છું કે તેમના આત્માને શાંતિ મળે અને તેમની પત્ની અને બાળકો આ મુશ્કેલ સમયનો સામનો કરવા માટે હિંમત મેળવે.
ઋતુરાજ દરેક પાત્ર પર પ્રભુત્વ જમાવતો હતો
ઋતુરાજ સિંહે માત્ર ટીવી જ નહીં પરંતુ ફિલ્મો અને વેબ સિરીઝમાં પણ શાનદાર કામ કર્યું છે. તે તેના દરેક પાત્રને સરળતાથી સ્વીકારી શકતો હતો. આ જ કારણ હતું કે તેની એક્ટિંગ હંમેશા લોકોના દિલને સ્પર્શી જાય છે. ટીવી શોની વાત કરીએ તો ઋતુરાજે હિટલર દીદી, શપથ, અદાલત, આહત, દિયા ઔર બાટી જેવા શોમાં કામ કર્યું હતું. તે છેલ્લે અનુપમામાં જોવા મળ્યો હતો.
