રેલવે મુસાફરો માટે મહત્વપૂર્ણ બદલાવ અમલમાં આવ્યો છે. લાંબા સમયથી અનરિઝર્વ્ડ ટિકિટ બુકિંગ માટે ઉપયોગમાં લેવાતી UTS on Mobile એપ હવે બંધ કરી દેવામાં આવી છે. દરરોજ લાખો મુસાફરો સ્ટેશન પર લાઇનમાં ઉભા રહેવાનું ટાળવા માટે આ એપનો સહારો લેતા હતા, પરંતુ આજથી ટિકિટ બુક કરવાની પ્રક્રિયા નવી વ્યવસ્થા હેઠળ થશે. રેલવે વિભાગના જણાવ્યા અનુસાર, મુસાફરોને વધુ ઝડપી, સુગમ અને આધુનિક ડિજિટલ અનુભવ આપવા માટે આ નિર્ણય લેવામાં આવ્યો છે. હવે અનરિઝર્વ્ડ ટિકિટ માટે અલગ એપ રાખવાની જરૂર નહીં પડે, કારણ કે બધી સેવાઓ એક જ નવા પ્લેટફોર્મ પર ઉપલબ્ધ રહેશે. UTS એપના સ્થાને હવે RailOne એપ દ્વારા અનરિઝર્વ્ડ ટિકિટ બુક કરી શકાશે. ઇન્ડિયન રેલવે કેટરિંગ એન્ડ ટુરિઝમ કોર્પોરેશન દ્વારા અધિકૃત આ એપ રિઝર્વેશન અને અનરિઝર્વ્ડ, બંને પ્રકારની ટિકિટિંગ સેવા એક જ જગ્યાએ આપે છે. જનરલ ટિકિટ, પ્લેટફોર્મ ટિકિટ અને રિઝર્વ્ડ સીટ, બધી જ સુવિધા હવે એક જ એપથી ઉપલબ્ધ બનશે.
RailOne એપમાં સર્વર સ્પીડ વધુ સુધારેલી હોવાનું કહેવાય છે અને તેનો ઇન્ટરફેસ પણ વધુ સરળ અને યુઝર-ફ્રેન્ડલી બનાવાયો છે. ચુકવણી માટે UPI, ડેબિટ કાર્ડ, ક્રેડિટ કાર્ડ અને નેટ બેંકિંગ જેવા અનેક વિકલ્પો ઉપલબ્ધ રહેશે. ટિકિટ ઇતિહાસ અને રિફંડ પ્રક્રિયાને પણ સરળ બનાવવામાં આવી છે, જેથી મુસાફરોને વધુ પારદર્શક અને ઝડપી સેવા મળી શકે. RailOne એપમાં લાઇવ ટ્રેન સ્ટેટસ, PNR ચેક, ટ્રેન સર્ચ અને ડિજિટલ ટિકિટ સ્ટોરેજ જેવી સુવિધાઓ સામેલ છે. QR કોડ આધારિત ટિકિટિંગ સિસ્ટમ ચેકિંગ પ્રક્રિયાને વધુ સરળ બનાવશે. જૂની UTS એપમાં રહેલું R-Wallet બેલેન્સ પણ એ જ મોબાઇલ નંબરથી લોગિન કરવાથી નવી એપમાં ટ્રાન્સફર થઈ જશે. શરૂઆતના દિવસોમાં ટેકનિકલ ફેરફારોને કારણે થોડી મુશ્કેલીઓ આવી શકે છે, પરંતુ રેલ્વેનો દાવો છે કે આ પગલું લાંબા ગાળે મુસાફરોને વધુ સારો ડિજિટલ અનુભવ આપશે. મુસાફરી પહેલાં RailOne એપ ડાઉનલોડ કરીને એકાઉન્ટ અપડેટ કરી લેવા માટે મુસાફરોને સલાહ આપવામાં આવી છે, જેથી ટિકિટ બુકિંગ દરમિયાન કોઈ અવરોધ ન આવે.
