આજકાલ ક્રેડિટ કાર્ડનો ઉપયોગ સામાન્ય થઈ ગયો છે. કોઈની પાસે એક કરતા વઘારે ક્રેડિટ કાર્ડ પણ આજે જોવા મળી જાય છે. હવે આ ક્રેડિટ કાર્ડને લઈને એક મહત્વના સમાચાર આવ્યા છે. આવતી 1 એપ્રિલ 2026થી ક્રેડિટ કાર્ડ સંબંધિત કેટલાક મહત્વપૂર્ણ નવા નિયમો અમલમાં આવી શકે છે, જેના કારણે કાર્ડધારકોના ખર્ચ અને ટેક્સ પ્રક્રિયામાં બદલાવ જોવા મળશે. સરકારે નાણાકીય પારદર્શિતા વધારવા અને મોટા ટ્રાન્ઝેક્શન પર નજર રાખવા માટે આ પગલું ભર્યું છે. નવા નિયમો અનુસાર, જો કોઈ વ્યક્તિ એક નાણાકીય વર્ષ દરમિયાન પોતાના ક્રેડિટ કાર્ડ દ્વારા ₹10 લાખથી વધુ ખર્ચ કરે છે તો તેની માહિતી આવકવેરા વિભાગ સુધી પહોંચાડવામાં આવશે. એટલું જ નહીં, ₹1 લાખથી વધુ રોકડ પેમેન્ટ અંગે પણ રિપોર્ટિંગ ફરજિયાત રહેશે, જેના કારણે મોટા ખર્ચ પર સીધી નજર રાખી શકાશે.
નવા નિયમોમાં PAN સંબંધિત પ્રક્રિયામાં પણ રાહત આપવામાં આવી છે. હવે PAN કાર્ડ માટે અરજી કરતી વખતે ક્રેડિટ કાર્ડનું સ્ટેટમેન્ટ સરનામા પુરાવા તરીકે માન્ય ગણાશે, જેના કારણે દસ્તાવેજી પ્રક્રિયા સરળ બનશે. બીજી તરફ, ઓનલાઇન ઇન્કમ ટેક્સ ચૂકવવા માટે હવે ક્રેડિટ કાર્ડનો ઉપયોગ કરવાની મંજૂરી મળશે, જ્યારે અગાઉ મુખ્યત્વે નેટ બેંકિંગ અથવા ડેબિટ કાર્ડ જ વિકલ્પ તરીકે ઉપલબ્ધ હતા. કંપનીઓ દ્વારા આપવામાં આવેલા ક્રેડિટ કાર્ડનો વ્યક્તિગત ઉપયોગ કરવામાં આવે અને તેના યોગ્ય દસ્તાવેજો ઉપલબ્ધ ન હોય તો તે ખર્ચને ‘પરક્વિઝિટ’ ગણવામાં આવી શકે છે અને તેના પર ટેક્સ લાગવાની શક્યતા રહેશે. ઉપરાંત, હવે ક્રેડિટ કાર્ડ માટે અરજી કરતી વખતે PAN નંબર આપવો અનિવાર્ય રહેશે, PAN વગર અરજી પ્રક્રિયા પૂર્ણ નહીં થાય. આ બદલાવોથી સ્પષ્ટ થાય છે કે સરકાર હવે મોટા નાણાકીય વ્યવહારોને વધુ પારદર્શક બનાવવા માગે છે. તેથી ક્રેડિટ કાર્ડ વાપરતા ગ્રાહકોએ પોતાના ખર્ચ અને ટેક્સ રેકોર્ડ સુવ્યવસ્થિત રાખવા જરૂરી બની રહેશે.
આ નિયમો સ્પષ્ટપણે દર્શાવે છે કે સરકાર મોટા ક્રેડિટ કાર્ડ વ્યવહારો પર કડક ચકાસણી કરવાની તૈયારી કરી રહી છે. ડિજિટલ ચુકવણીને પ્રોત્સાહન આપવા અને પારદર્શિતા સુધારવા પર પણ ભાર મૂકવામાં આવી રહ્યો છે. જો તમે મોટા ખર્ચ કરો છો અથવા કંપની કાર્ડનો ઉપયોગ કરો છો, તો રેકોર્ડકીપિંગ અને ટેક્સ પ્લાનિંગ પર ખાસ ધ્યાન આપવું મહત્વપૂર્ણ છે.
આ રહ્યા પાંચ મુખ્ય બદલાવો
- મોટા ક્રેડિટ કાર્ડ બિલ માટે કડક રિપોર્ટિંગ જરૂરી રહેશે.
- પાન કાર્ડ માટે અરજી કરતી વખતે ક્રેડિટ કાર્ડ સ્ટેટમેન્ટ ઉપયોગી થશે.
- કર ચૂકવણી માટે ક્રેડિટ કાર્ડ મંજૂર કરવામાં આવે છે.
- કંપની દ્વારા જારી કરાયેલા ક્રેડિટ કાર્ડ પર કર નિયમો.
- ક્રેડિટ કાર્ડ માટે પાન ફરજિયાત છે.
