લાકડી ફટકા મારતો બિલ્ડરનો વીડિયો સોશિયલ મીડિયામાં વાઇરલ
યુવકની પત્ની અને સિક્યુરિટી ગાર્ડ સહિતના લોકો દોડી આવતા હુમલાખોરો ભાગ્યાં.
પ્રતાપગંજ વિસ્તારમાં એપાર્ટમેન્ટમાં બે ફ્લેટના મેન્ટેન્સના રૂપિયા બાકી હોય હાલ ફ્લેટ વેચી નહી શકાય તેવું કહેતા બિલ્ડર બે માથાભારે શખ્સો સાથે ધસી આવ્યો હતો અને યુવક સાથે ઝઘડો કર્યો હતો. ત્યારબાદ ત્રણ જણાએ યુવકને લાકડાના પાટિયા વડે માર માર્યો હતો. જેથી યુવકે સયાજીગંજ પોલીસ સ્ટેશનમાં બિલ્ડર સહિત ત્રણ જણા સામે ફરિયાદ નોંધાવી છે. ઉલ્લેખનીય છે બિલ્ડરનો લાકડીના ફટકા મારતો વીડિયો પણ સોશિયલ મીડિયામાં વાઇરલ થયો છે.
શહેરના પ્રતાપગંજ વિસ્તારમાં આવેલા શરનમ વિલા એપાર્ટમન્ટમાં રહેતા હરેશભાઇ મોતીરામ વાસવાણી (ઉં.વ. 49) રીયલ એસ્ટેટનો વ્યવસાય કરે છે. 18 મેના રોજ તેઓ બપોરના બાર વાગ્યાના અરસામાં શરણમ વિલા એપાર્ટમેન્ટમાં ફ્લેટ નં,203 અને 403ની માલિકી ધરાવતા બિલ્ડર ધર્મેશ ચોરઠિયાના પત્ની રીમા ચોરઠિયા ફ્લેટના વેચાણ માટે સેક્રેટરી ટાયરોન લિમાંસને મળવા માટે આવ્યા હતા. પરંતુ સેકેટરી હાજર ન હોય મહિલાએ ફોનથી વાત કરી હતી. મહિલાને મે જણાવ્યું હતું કે તમારા મેન્ટેનન્સના રૂપિયા બાકી છે. જેથી તમે હાલ ફ્લેટ કોઇને વેચી નહી શકો ત્યારબાદ મહિલા ત્યાંથી જતી રહી હતી. બિલ્ડર ધર્મેશ ચોરઠિયા બે માણસો લઇને એપાર્મટમેન્ટમાં આવ્યો હતો અને તેમને ગાળો આપ્યા બાદ માર માર્યો હતો. દરમિયાન તેણે બુમાબુમ કરતા તેમની પત્ની, સિક્યુરીટ ગાર્ડ અને સોસાયટીમા રહીશો આવી જતા બિલ્ડર સહિતના લોકો ભાગી ગયા હતા. જેથી તેમને ઇજા પહોંચતા સારવાર માટે પણ ખસેડાયા હતા. તેઓએ સયાજીગંજ પોલીસ સ્ટેશનમાં ફરિયાદ નોંધાવતા પોલીસે ગુનો નોંધી બિલ્ડર સહિત હુમલાખોરોને ઝડપી પાડવાના ચક્રો ગતિમાન કર્યા છે.
