Latest News

અમદાવાદ : ગુજરાતમાં ઉનાળાની ગરમી સતત આકરા સ્વરૂપમાં જોવા મળી રહી છે. છેલ્લા 24 કલાકની સરખામણીએ આજે રાજ્યના અનેક વિસ્તારોમાં મહત્તમ તાપમાનમાં 2 થી 3 ડિગ્રી સેલ્સિયસનો વધારો નોંધાયો હતો. હવામાન વિભાગના આંકડા મુજબ આજે સુરેન્દ્રનગરમાં રાજ્યનું સૌથી વધુ 45 ડિગ્રી સેલ્સિયસ તાપમાન નોંધાયું હતું.

રાજ્યના અન્ય શહેરોમાં પણ ગરમીનો પારો ચિંતાજનક સ્તરે પહોંચ્યો હતો. ભૂજ, અમરેલી, રાજકોટ, અમદાવાદ, ગાંધીનગર, વડોદરા અને વલ્લભ વિદ્યાનગરમાં 43 ડિગ્રી સેલ્સિયસ તાપમાન નોંધાયું હતું. જ્યારે ડીસા, કંડલા એરપોર્ટ અને સુરતમાં 42 ડિગ્રી સેલ્સિયસ તાપમાન રહ્યું હતું. ભાવનગરમાં 41 ડિગ્રી, મહુવામાં 39 ડિગ્રી, કેશોદમાં 39 ડિગ્રી, કંડલા પોર્ટ ખાતે 38 ડિગ્રી તેમજ નલિયા, પોરબંદર અને દમણમાં 35 ડિગ્રી સેલ્સિયસ મહત્તમ તાપમાન નોંધાયું હતું.

હવામાન વિભાગના જણાવ્યા અનુસાર દક્ષિણ ગુજરાતના કેટલાક વિસ્તારોમાં મહત્તમ તાપમાનમાં નોંધપાત્ર વધારો નોંધાયો છે, જ્યારે સૌરાષ્ટ્ર-કચ્છ અને ઉત્તર ગુજરાતના વિસ્તારોમાં પણ સામાન્ય કરતાં વધુ ગરમીનો અનુભવ થયો હતો. રાજ્યના અનેક વિસ્તારોમાં ગરમી સામાન્ય કરતાં ઉપર અને કેટલાક વિસ્તારોમાં નોંધપાત્ર રીતે વધુ રહી હતી. હવામાન વિભાગે આગામી 24 કલાક દરમિયાન મહત્તમ તાપમાનમાં ખાસ ફેરફાર નહીં થાય તેવી શક્યતા વ્યક્ત કરી છે. જોકે ત્યારબાદ રાજ્યમાં તાપમાનમાં ધીમે ધીમે 2 થી 3 ડિગ્રીનો ઘટાડો થઈ શકે છે. તેમ છતાં આગામી પાંચ દિવસ દરમિયાન રાજ્યના કેટલાક વિસ્તારોમાં તાપમાન 40 ડિગ્રીથી વધુ રહેવાની સંભાવના વ્યક્ત કરવામાં આવી છે.

શહેરમાં મહત્તમ તાપમાન 43 ડિગ્રી સેલ્સિયસ સુધી પહોંચવાની શક્યતા દર્શાવવામાં આવી છે. બીજી તરફ દક્ષિણ પશ્ચિમ ચોમાસાએ આગળ વધવાનું ચાલુ રાખ્યું છે. હવામાન વિભાગ મુજબ ચોમાસું દક્ષિણ-પૂર્વ અરબી સમુદ્ર, બંગાળની ખાડીના કેટલાક વિસ્તારો તેમજ સમગ્ર અંદામાન-નિકોબાર દ્વીપસમૂહ સુધી આગળ વધ્યું છે. આગામી 3થી 4 દિવસ દરમિયાન ચોમાસું વધુ વિસ્તારોમાં આગળ વધવા માટે પરિસ્થિતિ અનુકૂળ હોવાનું જણાવાયું છે. ઉપરાંત, કેરળમાં દક્ષિણ પશ્ચિમ ચોમાસું 26 મે આસપાસ પ્રવેશ કરે તેવી સંભાવના વ્યક્ત કરવામાં આવી છે.