Latest News

સુરતઃ સુરતમાં ફરી રહ્યું છે વાતચીત કરતું ટુવ્હીલર. સુરતમાં એક ટુવ્હીલર છે જે ફ્રેન્ડની જેમ રાઈડર સાથે ગપ્પાં મારે છે, મસ્તી કરે છે. જરૂર પડ્યે માતાપિતાની જેમ સલાહ પણ આપે છે. એટલું જ નહીં ગીતો સંભળાવી મનોરંજન પણ કરે છે. આ ટુવ્હીલર દેખાવમાં સામાન્ય મોપેડ જેવું જ છે, પરંતુ તેને ખાસ બનાવે છે તેમાં ફીટ કરાયેલી ચીપ, ઈન્ટરનેટ અને AI સિસ્ટમ. સુરતના વકીલ મુકેશ ભાવસારે પોતાના સામાન્ય મોપેડને ટેક્નોલોજીની મદદથી સ્પેશિયલ બનાવી દીધું છે.

આ ટુવ્હીલર વાત કરે છે, પ્રશ્નોના જવાબ આપે છે અને ગીતો સંભળાવી મનોરંજન પણ કરે છે
સુરતના વકીલ મુકેશ ભાવસારે ટુવ્હીલરને ઈન્ટરનેટ અને ચીપની મદદથી AI સ્માર્ટ બનાવ્યું

શહેરના વકીલ મુકેશ ભાવસારે એક અનોખી અને અદ્યતન શોધ કરી છે. તેમણે પોતાના ટુવ્હીલરને સંપૂર્ણપણે સ્માર્ટ અને વોઈસ કંટ્રોલ્ડ બનાવી દીધું છે. આ ટુવ્હીલરમાં વેબપેજ અને આર્ટિફિશિયલ ઇન્ટેલિજન્સ (AI) આધારિત અત્યાધુનિક સિસ્ટમ ફીટ કરવામાં આવી છે, જે તેને સામાન્ય વાહનથી અલગ તારવે છે. આ મોપેડ ગીતો ગાઈને રાઈડરનું મનોરંજન કરે છે. તે ખરેખર યુનિક છે. કારણ કે તેના મેમરી કાર્ડમાં ડેટા પણ સેવ થાય છે, જે રાઈડરના પૂછવા પર સારી-નરસી યાદો તાજી કરાવે છે. તે કાયદાનું નોલેજ આપી સચેત પણ કરે છે.

સામાન્ય ટુવ્હીલરને AI સ્માર્ટ બનાવનાર વકીલ મુકેશ ભાવસાર કહે છે કે, આ ખરેખર તો રોબોટ જેવું છે. આ સ્માર્ટ ટુવ્હીલર હવે વોઈસ કમાન્ડથી સંપૂર્ણપણે ઓપરેટ થઈ શકે છે. એન્જિન સ્ટાર્ટ અને ઓફ કરવું, ઈન્ડીકેટર ચાલુ-બંધ કરવા, હોર્ન વગાડવા જેવી તમામ કામગીરી વોઈસ કમાન્ડથી જ થઈ શકે છે. સૌથી રસપ્રદ વાત એ છે કે આ ટુવ્હીલર વાતચીત પણ કરી શકે છે. રાઈડર તેને કોઈપણ પ્રશ્ન પૂછી શકે છે અને તે તરત જ જવાબ આપે છે. ટ્રાફિકના નિયમો, કાયદાકીય માહિતી અને અન્ય મહત્વના પ્રશ્નોના સચોટ જવાબ આપવાની ક્ષમતા તેમાં છે.

વધુમાં, ટુવ્હીલરમાં એક મેમરી કાર્ડ ફીટ કરવામાં આવ્યું છે, જેમાં સારી-નરસી યાદો સ્ટોર થઈ શકે છે. રાઈડર પૂછે તો વાહન પોતાની ‘યાદો’ પણ વર્ણવી શકે છે. આ ફીચર તેને માત્ર વાહન નહીં, પરંતુ એક સાથી જેવું બનાવે છે.

મુકેશ ભાવસારે કહ્યું કે, એજ્યુકેશન પર્પઝથી ટુવ્હીલરમાં પાંચ વર્ષ પહેલાં સ્પીકર, ચીપ વિગેરે સાધનો ફીટ કર્યા હતા. તેનું આઈપી એડ્રેસ બનાવ્યું હતું. જેની મદદથી વોઈસ કમાન્ડ આધારે ટુવ્હીલર સાથે કોમ્યુનિકેશન શક્ય બનાવાયું છે. આ ટુવ્હીલર વાતચીત કરી શકે છે. કમાન્ડ ફોલો કરે છે. તેમાં ગીતો વગાડી શકાય છે. તે ઉપરાંત તેની મેમરી એટલી શાર્પ છે કે એક્સિડેન્ટ થયા હોય કે અન્ય કોઈ બનાવ બન્યો હોય તે પણ યાદ રાખે છે અને પૂછવા પર માહિતી આપે છે.

ખરેખર એક વકીલની જિજ્ઞાસાવૃત્તિએ સામાન્ય મોપેડને ટેક્નોલોજીની મદદથી સ્પેશિયલ બનાવી દીધું છે.