Latest News

નો-પાર્કિંગ ઝોનમાં ઘૂસેલી થાર કાર રિવર્સ લેતા દીવાલ સાથે અથડાઈ

સુરત રેલવે સ્ટેશન વિસ્તારમાં એક મોટી દુર્ઘટના થતી ટળી ગઈ જ્યારે નો-પાર્કિંગ ઝોનમાં ઘૂસેલી થાર કાર રિવર્સ લેતી વખતે નિયંત્રણ ગુમાવતા દીવાલ સાથે જોરદાર અથડાઈ હતી. આ ઘટનાથી સ્ટેશન વિસ્તારમાં થોડા સમય માટે હડકંપ મચી ગયો હતો. સદનસીબે આ ઘટનામાં કોઈ જાનહાનિ નોંધાઈ નથી.

માહિતી મુજબ, ઘટના સુરત રેલવે સ્ટેશનના પ્રવેશદ્વાર નજીક બની હતી. અહીં નો-પાર્કિંગ ઝોન હોવા છતાં થાર કારનો ડ્રાઈવર વાહન લઈને અંદર પ્રવેશ્યો હતો. ત્યારબાદ વાહનને બહાર કાઢવા માટે ડ્રાઈવરે રિવર્સ લેવાનો પ્રયાસ કર્યો, પરંતુ અચાનક નિયંત્રણ ગુમાવતાં કાર સીધી નજીકની દીવાલ સાથે અથડાઈ ગઈ હતી.આ સમગ્ર ઘટના સ્થળ પર હાજર લોકો માટે ચોંકાવનારી બની હતી. સ્ટેશન પર આવનારા મુસાફરો અને સ્થાનિક લોકોમાં થોડો સમય ગભરાટનો માહોલ સર્જાયો હતો. ઘટનાના સમયે આસપાસ લોકોની અવરજવર ચાલુ હતી, પરંતુ સદનસીબે કોઈને ઈજા પહોંચી નહોતી.

પ્રાથમિક માહિતી અનુસાર, થાર કાર નો-પાર્કિંગ ઝોનમાં ખોટી રીતે પ્રવેશ કરવાના કારણે આ ઘટના બની હોવાનું માનવામાં આવે છે. ઘટના બાદ સ્થાનિક સુરક્ષા કર્મચારીઓ અને પોલીસ તાત્કાલિક સ્થળ પર પહોંચી હતી અને સ્થિતિને કાબૂમાં લીધી હતી. વાહનને ત્યાંથી હટાવીને ટ્રાફિક વ્યવસ્થા ફરી સામાન્ય કરવામાં આવી હતી.આ ઘટનાએ ફરી એકવાર સ્ટેશન વિસ્તારમાં ટ્રાફિક નિયમોનું પાલન કરવાની જરૂરિયાત પર ભાર મૂક્યો છે. ખાસ કરીને રેલવે સ્ટેશન જેવા ભીડવાળા વિસ્તારોમાં નો-પાર્કિંગ ઝોનમાં વાહન લઈ જવાથી મોટી દુર્ઘટના સર્જાઈ શકે છે. જો તે સમયે ત્યાં વધુ ભીડ હોત તો ગંભીર પરિણામો સામે આવી શકતે..

સ્થાનિક લોકો અને મુસાફરો દ્વારા પણ આવી ઘટનાઓ અટકાવવા માટે સ્ટેશન વિસ્તારમાં વધુ કડક ટ્રાફિક નિયંત્રણ અને સુરક્ષા વ્યવસ્થા કરવાની માંગ ઉઠાવવામાં આવી છે. હાલ આ સમગ્ર ઘટનાનો વીડિયો પણ સોશિયલ મીડિયા પર વાયરલ થઈ રહ્યો છે અને લોકો ટ્રાફિક નિયમોનું પાલન કરવા અંગે ચર્ચા કરી રહ્યા છે.