સંભાજીનગર કેસમાં નવો ખુલાસો, i-Phone ની વાત શરૂવાતમાં ચાલી હતી
મહારાષ્ટ્રના છત્રપતિ સંભાજીનગરમાં એક જ પરિવારના ત્રણ સભ્યોના મોતના ચકચારી કેસમાં હવે નવી માહિતી સામે આવી છે. શરૂઆતમાં આ ઘટનાને 19 વર્ષીય કુણાલ ચાંદગૂડેના iPhoneને લઈને માતા-પિતા સાથે થયેલા વિવાદ સાથે જોડવામાં આવી રહી હતી, પરંતુ પોલીસ તપાસ અને પરિવારજનોના નિવેદનો બાદ સમગ્ર ઘટનાની પાછળ લાંબા સમયથી ચાલી રહેલા પારિવારિક તણાવની વાત પણ સામે આવી છે. કુણાલ પોતાના માતા-પિતા વચ્ચે ચાલી રહેલા મતભેદ દૂર કરવા માંગતો હતો અને પરિવારને ફરી એકસાથે લાવવા ઈચ્છતો હતો. પરિવારજનોના જણાવ્યા પ્રમાણે કુણાલ અભ્યાસમાં સારો હતો અને આગળ જઈને MBBS કરીને ડોક્ટર બનવાનું સપનું જોતો હતો.
ખવડિયા પહાડ પર શું થયું?
પોલીસના જણાવ્યા પ્રમાણે કુણાલ સવારે લગભગ 8 વાગ્યે આકાશ ઇન્સ્ટિટ્યૂટમાં જવા માટે ઘરેથી નીકળ્યો હતો. પરંતુ સવારે 9:10 વાગ્યા સુધી તે ક્લાસમાં પહોંચ્યો નહીં, જેના કારણે સંસ્થાએ તેની માતાના મોબાઇલ પર મેસેજ કર્યો. ત્યાર બાદ પરિવારજનોએ કુણાલની શોધખોળ શરૂ કરી. લગભગ 10થી 10:30 વાગ્યાની વચ્ચે કુણાલ ખવડિયા પહાડ પર હોવાની માહિતી મળી હતી. ગ્રામજનોએ પોલીસને લગભગ 10:45 વાગ્યે જાણ કરી અને ત્યારબાદ ફાયર બ્રિગેડને પણ બોલાવવામાં આવી હતી.પોલીસ અને ફાયર બ્રિગેડની ટીમ જ્યારે પહાડ પર પહોંચી ત્યારે કુણાલ સતત પોતાની જગ્યા બદલી રહ્યો હતો. તેને સમજાવવાનો પ્રયાસ કરવામાં આવ્યો હતો. નીચે રેસ્ક્યૂ ટીમે સુરક્ષા માટે જાળ પણ ગોઠવ્યું હતું, જેથી તે નીચે પડે તો તેને બચાવી શકાય. પોલીસના જણાવ્યા પ્રમાણે કુણાલને સમજાવવા માટે તેના માતા-પિતા અને અન્ય પરિવારજનો પણ પહાડ પર પહોંચ્યા હતા.
પુત્રને બચાવવા જતા પિતાનું પણ મોત
પોલીસના જણાવ્યા પ્રમાણે કુણાલના પિતા મुरલીધર તેની નજીક પહોંચ્યા અને તેને પકડીને સુરક્ષિત રીતે પાછો લાવવાનો પ્રયાસ કર્યો. દરમિયાન બંનેનું સંતુલન બગડ્યું અને પિતા-પુત્ર ઊંડી ખીણમાં પડી ગયા.પથ્થરાળ વિસ્તારમાં પડવાથી બંનેના મોત થયા. ત્યારબાદ કુણાલની માતા સંગીતાએ પણ પતિ અને પુત્રને ગુમાવવાના આઘાતમાં પહાડ પરથી નીચે પડવાનું પગલું ભર્યું અને તેમનું પણ મોત થયું. ફાયર બ્રિગેડ અધિકારીના જણાવ્યા પ્રમાણે ઘટનામાં એક ફાયરકર્મીને પણ સામાન્ય ઈજા થઈ હતી. ત્રણેય મૃતદેહોને બપોરે લગભગ 2:30 વાગ્યે ઘાટી હોસ્પિટલમાં લાવવામાં આવ્યા હતા, જ્યાં પોસ્ટમોર્ટમની કાર્યવાહી કરવામાં આવી હતી.
શરૂઆતમાં સામે આવ્યો હતો iPhone વિવાદ
ઘટના બાદ શરૂઆતના અહેવાલોમાં iPhoneને લઈને થયેલા વિવાદને મુખ્ય કારણ તરીકે રજૂ કરવામાં આવ્યો હતો. અગાઉના અહેવાલો અનુસાર કુણાલે iPhoneની માંગ કરી હતી અને આ મુદ્દે માતા-પિતા સાથે તેની બોલાચાલી થઈ હતી. ત્યારબાદ તે ગુસ્સામાં ખવડિયા પહાડ તરફ ચાલ્યો ગયો હતો. માતા સંગીતા સહિત પરિવારજનો તેને સમજાવવા માટે પહાડ પર પહોંચ્યા હતા. પોલીસ, ફાયર બ્રિગેડ અને ગ્રામજનોએ પણ લગભગ ત્રણ કલાક સુધી તેને સુરક્ષિત રીતે નીચે લાવવાનો પ્રયાસ કર્યો હતો.પરંતુ હવે પરિવારના અલગ-અલગ સભ્યો અને નજીકના લોકોના નિવેદનોને કારણે આ કેસમાં માત્ર iPhoneનો મુદ્દો જ કારણ હતો કે લાંબા સમયથી ચાલતો પારિવારિક તણાવ પણ પાછળ હતો, તે અંગે સવાલો ઊભા થયા છે. પોલીસ સમગ્ર મામલાની વિવિધ દિશામાં તપાસ કરી રહી છે.
કુણાલ માતા-પિતામાં સમાધાન કરાવવા માંગતો હતો
કુણાલના માતૃપક્ષના પરિવારજનોના જણાવ્યા પ્રમાણે તેના માતા-પિતા વચ્ચે લાંબા સમયથી મતભેદ ચાલી રહ્યા હતા. સંપત્તિ અને પરિવાર સાથે જોડાયેલા મુદ્દાઓને કારણે પતિ-પત્ની વચ્ચે તણાવ હોવાનો દાવો કરવામાં આવ્યો છે. પરિવારજનોનું કહેવું છે કે કુણાલ આ પરિસ્થિતિથી પરેશાન હતો અને પોતાના માતા-પિતાને ફરી એકસાથે લાવવા માંગતો હતો. એટલે આ ઘટના પાછળ માત્ર એક મોબાઇલ ફોનનો મુદ્દો હતો એવું માનવું અધૂરું ચિત્ર બની શકે છે.કુણાલના નાના બાપા બબન રાવના જણાવ્યા પ્રમાણે કુણાલ અભ્યાસમાં હોશિયાર હતો. પરિવારના જણાવ્યા પ્રમાણે તેણે આ વર્ષે CBSEની ધોરણ 10ની પરીક્ષામાં લગભગ 82 ટકા ગુણ મેળવ્યા હતા અને આગળ જઈને MBBS કરવાનો ઈરાદો હતો. અન્ય કેટલાક સંબંધીઓ અને પડોશીઓએ પણ કુણાલને અભ્યાસુ અને શાંત સ્વભાવનો યુવક ગણાવ્યો છે. કેટલાક અહેવાલોમાં તેના 10મા ધોરણના ગુણ અંગે અલગ આંકડા પણ જણાવવામાં આવ્યા છે, તેથી સત્તાવાર શૈક્ષણિક રેકોર્ડથી જ અંતિમ આંકડો નક્કી થઈ શકે છે.
પિતાના પરિવાર તરફથી અલગ દાવો
બીજી તરફ મુરલીધર ચાંદગૂડેની બહેન શોભા રાજેન્દ્ર મસ્કેએ પરિવારના સંબંધોને લઈને અલગ વિગતો આપી છે. તેમના જણાવ્યા પ્રમાણે મુરલીધર અને સંગીતાએ લગભગ 22 વર્ષ પહેલાં લવ મેરેજ કર્યા હતા અને મુરલીધર ના માતા-પિતા આ લગ્નથી ખુશ નહોતા. લગ્ન બાદ પણ પરિવારના સંબંધોમાં તણાવ રહ્યો હોવાનો તેમનો દાવો છે. તેમણે પતિ-પત્ની વચ્ચે લાંબા સમયથી ચાલતા મતભેદની વાત પણ કરી છે. જોકે, પરિવારને નજીકથી ઓળખતા કેટલાક પડોશીઓ અને મુરલીધર સાથે કામ કરનારા લોકો આ દાવાઓથી અલગ વાત કરે છે. તેમના કહેવા પ્રમાણે પરિવાર સામાન્ય જીવન જીવી રહ્યો હતો. ઘરના કેરટેકર આદિત્ય દેશપાંડેએ જણાવ્યું હતું કે પરિવાર લગભગ ચાર મહિના પહેલાં આ મકાનમાં ભાડે રહેવા આવ્યો હતો અને તેમનો વ્યવહાર સારો હતો.મુરલીધર સાથે કામ કરનારા લોકોએ પણ તેમને શાંત સ્વભાવના વ્યક્તિ તરીકે વર્ણવ્યા છે.
મુરલીધર ડ્રાઇવર તરીકે કામ કરતા હતા
મુરલીધર ચાંદગૂડે લગભગ 10 વર્ષથી ચૌધરી ટ્રાન્સપોર્ટમાં ડ્રાઇવર તરીકે કામ કરતા હતા. કંપનીના મેનેજર પવન ઓટંબેના જણાવ્યા પ્રમાણે તેમના વિરુદ્ધ ક્યારેય કોઈ ફરિયાદ મળી નહોતી. પડોશીઓએ પણ કુણાલને અભ્યાસમાં સારો અને શાંત યુવક ગણાવ્યો હતો. આ વિરોધાભાસી નિવેદનોને કારણે પોલીસ માટે હવે ઘટનાની સંપૂર્ણ પૃષ્ઠભૂમિ સમજવી વધુ મહત્વપૂર્ણ બની છે.
ઘરમાં એકલો રહી ગયો પાલતુ કૂતરો
આ કરુણ ઘટનાનો એક ભાવુક પાસો એ પણ છે કે પરિવારના ત્રણેય સભ્યોના મોત બાદ તેમનો પાલતુ કૂતરો શેરુ બે દિવસ સુધી ઘરમાં એકલો બંધ રહ્યો હતો. પરિવારના સભ્યો પરત ફરશે એવી જાણે તેને હજુ પણ આશા હોય તેમ દરવાજા બહાર કોઈના પગલાંનો અવાજ થતાં તે દરવાજા સુધી દોડી જતો હતો. પડોશીઓએ તેને ખાવા-પીવાનું આપવાનો પ્રયાસ કર્યો હતો. ત્યારબાદ પેટ એનિમલ લવર એસોસિએશનની ટીમે શેરુને ઘરમાંથી બહાર કાઢ્યો અને તેને હાલ સુરક્ષિત આશ્રયસ્થળે રાખવાની વ્યવસ્થા કરવામાં આવી છે.
પોલીસની તપાસ ચાલુ
હાલ પોલીસ આ સમગ્ર કેસની તપાસ કરી રહી છે. ઘટનાસ્થળે હાજર પોલીસ, ફાયર બ્રિગેડના કર્મચારીઓ, ગ્રામજનો, પરિવારજનો અને પડોશીઓના નિવેદનો મહત્વપૂર્ણ ગણાઈ રહ્યા છે. શરૂઆતમાં iPhone વિવાદ સામે આવ્યો હતો, પરંતુ હવે સંપત્તિ, દાંપત્ય તણાવ અને પરિવારના લાંબા સમયથી ચાલતા મતભેદની વાતો પણ સામે આવી રહી છે. તેથી પોલીસ માટે દરેક દાવાની ચકાસણી કરીને ઘટનાની વાસ્તવિક પૃષ્ઠભૂમિ સુધી પહોંચવું મહત્વપૂર્ણ બન્યું છે.કુણાલ, તેના પિતા મુરલીધર અને માતા સંગીતાના મોતથી એક પરિવાર જ નહીં પરંતુ તેમની પાછળ રહેલા સગાં-સંબંધીઓ અને પડોશીઓ પણ ઊંડા આઘાતમાં છે. ડોક્ટર બનવાનું સપનું જોનાર એક યુવાન પોતાના પરિવારને બચાવવા અને માતા-પિતામાં સમાધાન કરાવવાની ઇચ્છા રાખતો હતો કે નહીં, પરિવારની અંદરની વાસ્તવિક પરિસ્થિતિ શું હતી અને આ દુર્ઘટના સુધી વાત કેવી રીતે પહોંચી તેના જવાબો પોલીસ તપાસ પૂર્ણ થયા બાદ જ વધુ સ્પષ્ટ થઈ શકશે.
