પ્રખ્યાત સિંગર મિકા સિંહે પાકિસ્તાન સાથેના પોતાના સંબંધો, ત્યાંના લોકો અને શીખ ધર્મ સાથે જોડાયેલા મહત્વપૂર્ણ સ્થળો અંગે ખુલીને વાત કરી છે. એક પોડકાસ્ટ દરમિયાન 50 વર્ષીય સિંગરે પાકિસ્તાનમાં પોતાના અનુભવો શેર કર્યા હતા. આ દરમિયાન પાકિસ્તાની મુસ્લિમો અને દુબઈના મુસ્લિમો પ્રત્યે લોકોના અલગ-અલગ વલણનો ઉલ્લેખ કરતાં તેમણે સવાલ કર્યો હતો કે જો દુબઈના મુસ્લિમો લોકોને સારા લાગે છે તો પાકિસ્તાની મુસ્લિમો સામે અલગ વલણ કેમ રાખવામાં આવે છે. પાકિસ્તાનની પોતાની મુલાકાતોને યાદ કરતાં મિકા સિંહે કહ્યું હતું કે ત્યાંના મુસ્લિમોએ ગુરુદ્વારાની સંભાળ રાખવામાં અને સેવા કરવામાં ખૂબ મદદ કરી હતી. આ અનુભવને કારણે તેમના મનમાં પાકિસ્તાન અને ત્યાંના લોકો પ્રત્યે અલગ લાગણી છે. તેમણે કહ્યું હતું કે પાકિસ્તાન ખરાબ દેશ નથી અને ત્યાંના લોકો પણ સ્વભાવથી ખરાબ નથી.
મિકાએ કહ્યું હતું કે તેમને સમજાતું નથી કે લોકો પાકિસ્તાની મુસ્લિમોને લઈને અલગ વલણ કેમ રાખે છે, જ્યારે દુબઈના મુસ્લિમો પ્રત્યે સારો અભિગમ જોવા મળે છે. તેમણે પાકિસ્તાનમાં મળેલા પોતાના અનુભવોના આધારે કહ્યું હતું કે ત્યાંના સામાન્ય લોકો અને ખાસ કરીને ગુરુદ્વારાની સેવા સાથે જોડાયેલા લોકો તરફથી તેમને સારો સહકાર મળ્યો હતો. પાકિસ્તાની કલાકારોના ભારતમાં કામ કરવા અંગે પણ મિકા સિંહે પોતાનું વલણ સ્પષ્ટ કર્યું હતું. તેમણે કહ્યું હતું કે તેમને પાકિસ્તાની સિંગર્સ ભારતમાં આવે તે અંગે કોઈ વાંધો નથી. તેમના મતે, જ્યારે પાકિસ્તાની કલાકારો ભારતમાં આવે છે ત્યારે બોલિવૂડ અને અન્ય લોકો તેમનું સ્વાગત કરે છે.
ભારતીય કલાકારોના પાકિસ્તાન પ્રવાસ અંગે વાત કરતાં મિકાએ કહ્યું હતું કે જો કોઈ કલાકાર ખાનગી કાર્યક્રમમાં પરફોર્મ કરવા માટે પાકિસ્તાન જાય અને ત્યાંથી પૈસા કમાઈને ભારત પરત આવે તો તેમાં તેમને કંઈ ખોટું લાગતું નથી. તેમણે કહ્યું હતું કે આવા પ્રવાસ છુપાઈને થતા નથી. કલાકાર ફ્લાઈટ દ્વારા ખુલ્લેઆમ પાકિસ્તાન જાય છે અને આ વાત આખી દુનિયાની નજર સામે હોય છે. પાકિસ્તાન સાથે મિકા સિંહનો સંબંધ માત્ર સંગીત અને કાર્યક્રમો પૂરતો મર્યાદિત નથી. તેમણે ત્યાં આવેલા શીખ ધર્મના મહત્વપૂર્ણ સ્થળો સાથે પોતાની ભાવનાત્મક જોડાણની પણ વાત કરી હતી. મિકાએ કહ્યું હતું કે પાકિસ્તાનમાં આવેલા મહત્વપૂર્ણ શીખ ધર્મસ્થળોને કારણે તેમના માટે આ દેશ સાથે એક અલગ પ્રકારનો વ્યક્તિગત લગાવ છે.
નાનક સાહિબ અને પંજા સાહિબનો ઉલ્લેખ કરતાં મિકાએ કહ્યું હતું કે જ્યારે તેમને પાકિસ્તાનમાં પરફોર્મન્સ માટે આમંત્રણ મળ્યું ત્યારે તેમને એવું લાગ્યું હતું કે જાણે તેમને ત્યાં ‘બોલાવવામાં’ આવ્યા હોય. તેમના માટે આ માત્ર પૈસા કમાવવાની બાબત નહોતી. ગુરુદ્વારાના દર્શન કરવાનું તેમના માટે ખાસ મહત્વ હતું અને એ તેમની પ્રાથમિકતાઓમાં સામેલ હતું. જોકે, પાકિસ્તાન સાથેના મિકા સિંહના સંબંધો અગાઉ પણ વિવાદમાં રહ્યા છે. ઓગસ્ટ 2019માં કરાચીમાં એક પ્રી-વેડિંગ કાર્યક્રમમાં પરફોર્મ કર્યા બાદ તેઓ વિવાદમાં આવ્યા હતા. આ કાર્યક્રમને કારણે ભારતીય ફિલ્મ ઉદ્યોગમાં તેમની સામે વિરોધ થયો હતો અને ઓલ ઇન્ડિયા સિને વર્કર્સ એસોસિએશન તથા FWICE દ્વારા તેમનો બહિષ્કાર કરવામાં આવ્યો હતો.
આ વિવાદ બાદ મિકા સિંહે માફી માંગી હતી. તેમણે સ્પષ્ટતા કરી હતી કે કરાચીનો કાર્યક્રમ અગાઉથી નક્કી કરાયેલો પ્રોફેશનલ કાર્યક્રમ હતો અને તે પોતાની પ્રતિબદ્ધતા પૂરી કરવા માટે ત્યાં ગયા હતા. માફી બાદ તેમના પર લગાવવામાં આવેલો પ્રતિબંધ પાછો ખેંચવામાં આવ્યો હતો અને ત્યારબાદ તેમણે ફરીથી કામ શરૂ કર્યું હતું. હવે પાકિસ્તાન અને ત્યાંના મુસ્લિમો અંગે મિકા સિંહની તાજેતરની ટિપ્પણીઓ ફરી ચર્ચામાં આવી છે. ખાસ કરીને પાકિસ્તાની અને દુબઈના મુસ્લિમોની સરખામણી કરતું તેમનું નિવેદન સોશિયલ મીડિયા પર ચર્ચાનો વિષય બન્યું છે. સાથે જ પાકિસ્તાની કલાકારોના ભારતમાં કામ કરવા અને ભારતીય કલાકારોના પાકિસ્તાન પ્રવાસ અંગે તેમના વિચારોને લઈને પણ અલગ-અલગ પ્રતિક્રિયાઓ જોવા મળી રહી છે.
