સુરત શહેરમાં હાલમાં કોમર્શિયલ LPG ગેસને લઈને મોટી અછત સર્જાઈ છે, જેના કારણે હોટેલ, રેસ્ટોરન્ટ, લારીઓ અને નાના વેપારીઓ ભારે મુશ્કેલીમાં મુકાયા છે. છેલ્લા બે દિવસથી શહેરમાં કોમર્શિયલ ગેસ સિલિન્ડરની સપ્લાય બંધ થતાં અનેક વેપારીઓ ચિંતિત બન્યા છે. ગેસ વગર વ્યવસાય ચલાવવો મુશ્કેલ બનતા રોજગાર પર પણ અસર પડવાની ભીતિ વ્યક્ત થઈ રહી છે.
માહિતી મુજબ સુરતમાં કોમર્શિયલ LPG ગેસનો સપ્લાય કરતી મુખ્ય કંપનીઓ હિન્દુસ્તાન પેટ્રોલિયમ, ઇન્ડિયન ગેસ અને ભારત ગેસ દ્વારા છેલ્લા બે દિવસથી કોઈ પણ કોમર્શિયલ ગેસ સિલિન્ડરનું વિતરણ કરવામાં આવ્યું નથી. પરિણામે ગેસ રિફિલિંગ માટે આવતા ટ્રક અને ટેમ્પાઓની લાંબી કતારો જોવા મળી રહી છે.
સુરત ના હજીરા વિસ્તારમાં આવેલા LPG બોટલિંગ પ્લાન્ટ ખાતે તો સ્થિતિ વધુ ગંભીર બની ગઈ છે. રિફિલિંગ માટે આવેલા વાહનો કલાકો સુધી પોતાની વારીની રાહ જોતા જોવા મળે છે. ટ્રક અને ટેમ્પાઓની લાઈનો પ્લાન્ટ બહાર સુધી ફેલાઈ ગઈ છે, જેના કારણે ત્યાં અફરાતફરીનો માહોલ સર્જાયો છે.
ડ્રાઈવર અને ગેસ ડીલરોના જણાવ્યા અનુસાર તેઓ છેલ્લા બે દિવસથી રિફિલિંગ માટે રાહ જોઈ રહ્યા છે, પરંતુ હજુ સુધી સિલિન્ડર ભરાવી શકાયા નથી. કંપનીઓના પાર્કિંગ યાર્ડમાં પણ ગાડીઓની ભીડ જોવા મળી રહી છે, છતાં ગેસ સપ્લાય શરૂ ન થતા વેપારીઓમાં અસંતોષ વધી રહ્યો છે.
કોમર્શિયલ ગેસ સિલિન્ડરની અછતને કારણે શહેરના અનેક હોટેલ અને ફૂડ બિઝનેસ પર સીધી અસર જોવા મળી રહી છે. જો આવું જ ચાલુ રહેશે તો આગામી દિવસોમાં પરિસ્થિતિ વધુ ગંભીર બની શકે તેવી આશંકા વ્યક્ત કરવામાં આવી રહી છે.
હાલ વેપારીઓ અને ગેસ ડીલરો કંપનીઓ તરફથી વહેલી તકે સપ્લાય શરૂ થાય તેવી આશા રાખી રહ્યા છે, જેથી રોજિંદા વ્યવસાય ફરીથી નિયમિત રીતે ચાલી શકે.
