દુબઈ: ટીમ ઈન્ડિયાના (India) સ્ટાર ઓલરાઉન્ડર હાર્દિક પંડ્યાએ (HardikPandya) પોતાના તોફાની પ્રદર્શનના આધારે ટીમ ઈન્ડિયાને શાનદાર જીત અપાવી. મેચના હીરો પંડ્યાના કારણે ભારતીય ટીમે એશિયા કપની (Asia Cup) પોતાની પ્રથમ મેચમાં પાકિસ્તાનને (Pakistan) 5 વિકેટે હરાવ્યું હતું. મેચ બાદ હાર્દિકે જણાવ્યું કે કેવી રીતે તેણે છેલ્લી ઓવરમાં સિક્સર ફટકારી. એ પણ જણાવ્યું કે બોલિંગમાં તે એક સમયે માત્ર એક ઓવર માટે રણનીતિ તૈયાર કરી રહ્યો હતો. પંડ્યાએ કહ્યું કે, જો ભારતને એશિયા કપ ક્રિકેટ ટુર્નામેન્ટની પહેલી મેચ પાકિસ્તાન સામે જીતવા માટે છેલ્લી ઓવરમાં 7ને બદલે 15 રનની જરૂર હોય તો પણ તે પોતાની જાતને તેના માટે તૈયાર કરી લેત. આ મેચ UAEના દુબઈ ઈન્ટરનેશનલ સ્ટેડિયમમાં રમાઈ હતી. આ મેચમાં હાર્દિકે પ્રથમ બોલિંગમાં 25 રન આપીને 3 વિકેટ ઝડપી હતી. આ પછી બેટિંગમાં 17 બોલમાં અણનમ 33 રન બનાવીને વિજય અપાવ્યો હતો. પંડ્યાએ અંતે સિક્સર ફટકારીને મેચ જીતી લીધી હતી. તેને પ્લેયર ઓફ ધ મેચ (Man Of The Match) પણ જાહેર કરવામાં આવ્યો હતો.
મેચ પછીની પ્રેસ કોન્ફરન્સમાં હાર્દિક પંડ્યાએ કહ્યું, ‘બોલિંગમાં તે ખૂબ જ મહત્વપૂર્ણ છે કે તમે પરિસ્થિતિને સ્વીકારો અને તમારા હથિયારોનો ઉપયોગ કરો. ટૂંકી બોલિંગ અને હાર્ડ લેન્થ મારી શક્તિઓ છે. તે બધા તેના યોગ્ય ઉપયોગ પર પણ આધાર રાખે છે. બેટ્સમેન ભૂલ કરે છે અને આઉટ થાય છે. હું દરેક ઓવર માટે રણનીતિ ઘડી રહ્યો હતો. ટાર્ગેટ ચેઝ દરમિયાન છેલ્લી ત્રણ ઓવર વિશે વાત કરતાં પંડ્યાએ કહ્યું, ‘મને ખબર હતી કે છેલ્લી ઓવરમાં એક યુવા બોલર (નસીમ શાહ અથવા દહાની) અને લેફ્ટ આર્મ સ્પિનર (મોહમ્મદ નવાઝ) હશે.
અમને છેલ્લી ઓવરમાં 7 રનની જરૂર હતી. જો અમને 15 રનની જરૂર હોત તો પણ મેં મારી જાતને તૈયાર રાખી હોત. હું જાણતો હતો કે 20મી ઓવરમાં બોલર મારા કરતા વધુ દબાણમાં હતો. હું વસ્તુઓને સરળ બનાવવાનો પ્રયત્ન કરું છું. ’10 ફિલ્ડર હોત તો પણ સિક્સ મારવી હતી’ આ સિવાય હાર્દિક પંડ્યાએ BCCI.TV પર રવિન્દ્ર જાડેજા (Ravindra Jadeja) સાથે વાત કરી હતી. આ દરમિયાન પણ જાડેજાએ પંડ્યાને તે છેલ્લી ઓવરની સ્થિતિ અંગે સવાલ કર્યો હતો. જાડેજાએ કહ્યું કે છેલ્લી ઓવરમાં 7 રનની જરૂર હતી અને મેં પહેલા બોલ પર જ મોટી હિટ બનાવવાનું વિચાર્યું. જોકે હું બહાર નીકળી ગયો. જો કોઈ મોટી હિટ થઈ હોત તો મેચ ત્યાં જ ખતમ થઈ ગઈ હોત. હું બહાર નીકળ્યો, તો તમે શું વિચારતા હતા?
તેના પર પંડ્યાએ કહ્યું, ‘મને 7 રન બહુ મોટા નહોતા લાગ્યા. જો 5 કે 10 ફિલ્ડર બાઉન્ડ્રી પર ઉભા હોય તો પણ મારે હિટ કરવાનો હતો. મને તેની પરવા નહોતી. મારા મનમાં કોઈ દબાણ ન હતું. મારા મતે બોલર પર વધુ દબાણ હતું. તમે દબાણને યોગ્ય રીતે હેન્ડલ કરી શકશો, તો જ તમે કંઈક કરી શકશો. બોલર જે રીતે ફિલ્ડરને સેટ કરે છે તે હું જાણતો હતો. હું જાણતો હતો કે તે બેક-ઓફ લેન્થ પર જશે.
