“યુવરાજ સુધી પહોંચવા હજી લાંબો રસ્તો બાકી”
ભારતીય ક્રિકેટમાં તાજેતરમાં યુવા ખેલાડી Abhishek Sharmaના પ્રદર્શનને લઈને ભારે ચર્ચા ચાલી રહી છે. ટી20 વર્લ્ડ કપ દરમિયાન અપેક્ષાઓ પર ખરા ન ઉતરતાં, પૂર્વ ક્રિકેટર Yograj Singhએ તેમના પર કડક ટીકા કરી છે અને ખુલ્લેઆમ નારાજગી વ્યક્ત કરી છે.
અભિષેક શર્માએ ટૂર્નામેન્ટની શરૂઆત સતત ત્રણ ડક સાથે કરી હતી, જેના કારણે તેમના આત્મવિશ્વાસ પર પણ અસર પડી. આખા ટૂર્નામેન્ટમાં તેઓ 8 મેચમાં માત્ર 141 રન જ બનાવી શક્યા અને સરેરાશ 17.62 રહી. ફાઈનલમાં અડધી સદી જેવી કેટલીક સારી ઇનિંગ્સ જોવા મળી હતી, પરંતુ સતત સારો પ્રદર્શન કરવાની ક્ષમતા તેમની અંદર દેખાઈ નહોતી. ખાસ કરીને સ્પિન સામે, ખાસ કરીને ઑફ-સ્પિન સામે, તેઓ સંઘર્ષ કરતા નજર આવ્યા.
યોગરાજ સિંહે અભિષેકના પ્રદર્શન ઉપરાંત તેમના અભિગમ પર પણ સવાલ ઉઠાવ્યા છે. તેમણે કહ્યું કે મેદાન બહારના વિખરાયેલા ધ્યાનને કારણે જ તેમના પ્રદર્શન પર અસર પડી રહી છે. તેમણે કહ્યું કે, “જ્યારે તમારું ધ્યાન બીજી જગ્યાએ હોય છે, ત્યારે જ નિષ્ફળતા મળે છે. ખેલાડીનો મુખ્ય ફોકસ માત્ર રમત પર જ હોવો જોઈએ.”
યોગરાજે વધુમાં જણાવ્યું કે આજકાલના યુવા ખેલાડીઓ સોશિયલ મીડિયા અને રીલ્સ બનાવવામાં વધુ વ્યસ્ત રહે છે, જે તેમની રમતને અસર કરે છે. તેમણે અભિષેકને કડક શબ્દોમાં કહ્યું કે, “તેનું કામ રીલ્સ બનાવવાનું નથી, પરંતુ મહેનત કરીને રમત સુધારવાનું છે. વહેલા સુવું, વહેલા ઉઠવું અને સતત પ્રેક્ટિસ કરવી જરૂરી છે.”
અભિષેક શર્માએ અગાઉ Yuvraj Singhની માર્ગદર્શન હેઠળ તાલીમ લીધી હતી, પરંતુ યોગરાજે સ્પષ્ટ કહ્યું કે તેઓ હજી યુવરાજના સ્તર સુધી પહોંચવાથી ઘણાં દૂર છે. “યુવરાજ સુધી પહોંચવા માટે તેને હજુ લાંબો સમય લાગશે. ક્રિકેટમાં શિસ્ત સૌથી મહત્વપૂર્ણ છે,” એમ તેમણે ઉમેર્યું. યોગરાજે વધુમાં ચેતવણી આપી કે ક્રિકેટને હળવાશથી લેવું જોખમી સાબિત થઈ શકે છે. તેમણે કહ્યું કે ફક્ત મોટા શોટ્સ રમવાથી નહીં, પરંતુ સિંગલ-ડબલ લઈ ઇનિંગ્સ બનાવવી પણ એટલી જ જરૂરી છે.
આ નિવેદન બાદ ક્રિકેટ વર્તુળોમાં ચર્ચા તેજ થઈ છે કે યુવા ખેલાડીઓએ પ્રતિભા સાથે શિસ્ત અને ફોકસ જાળવવું પણ એટલું જ જરૂરી છે.
