પશ્ચિમ બંગાળના સંદેશખાલી (Sandeshkhali) કેસમાં તૃણમૂલ કોંગ્રેસ (TMC)એ ભાજપ પર ગંભીર આરોપ લગાવ્યા છે. ટીએમસીએ સોશિયલ મીડિયા પર એક વીડિયો (Video) જાહેર કરીને દાવો કર્યો છે કે લોકસભા ચૂંટણી પહેલા રાજ્યને બદનામ કરવાનું બીજેપી દ્વારા સંપૂર્ણ કાવતરું છે.
એક ન્યૂઝ એજન્સીના અહેવાલ અનુસાર આ વીડિયો બીજેપી મંડલ (બૂથ) પ્રમુખ ગંગાધર કોયલના સ્ટિંગ વીડિયોનો છે. એવો દાવો કરવામાં આવ્યો છે કે બીજેપી સાંસદ સુવેન્દુ અધિકારીએ શેખ શાહજહાં સહિત તેના ત્રણ નેતાઓ સામે જાતીય સતામણીના ખોટા આરોપો લગાવ્યા છે. સ્ટિંગ વીડિયોમાં બીજેપી નેતાએ કહ્યું કે સુવેન્દુએ બીજેપી નેતાઓને સ્થાનિક મહિલાઓને ઉશ્કેરવાનું કહ્યું હતું. બીજેપી સાંસદે કહ્યું હતું કે જ્યાં સુધી ટીએમસીના મજબૂત નેતાઓ પર બળાત્કારનો ખોટો આરોપ ન લાગે ત્યાં સુધી તેમની ધરપકડ કરવામાં આવશે નહીં. જે મહિલાઓ પર બળાત્કાર થયો ન હતો તેને પીડિતા તરીકે રજૂ કરવામાં આવી હતી. સંદેશખાલીના એક મકાનમાં સુવેન્દુએ પોતે બંદૂકો રાખી હતી જે બાદમાં સીબીઆઈ દ્વારા જપ્ત કરવામાં આવી હતી.
તૃણમૂલ કોંગ્રેસે ભાજપ સામે મોરચો ખોલ્યો
વાયરલ વીડિયોમાં એક વ્યક્તિ કબૂલ કરતો સંભળાય છે કે બળાત્કાર સહિતના વિવિધ આરોપો યોજના મુજબ કરવામાં આવ્યા હતા. વીડિયોમાં તેની ઓળખ સંદેશખાલી 2 બ્લોકના ભાજપના ‘મંડલ પ્રમુખ’ ગંગાધર કાયલ તરીકે કરવામાં આવી છે. આ વીડિયો સામે આવ્યા બાદ સત્તારૂઢ તૃણમૂલ કોંગ્રેસે ભાજપ વિરુદ્ધ મોરચો ખોલી દીધો છે. ભાજપે થોડા સમય પછી આ મામલે પ્રેસ કોન્ફરન્સ કરવાની વાત કરી છે.
ભાજપે કહ્યું- વીડિયોમાં દેખાતો વ્યક્તિ માત્ર સમર્થક છે
કહેવામાં આવી રહ્યું છે કે સંદેશખાલીમાં છુપા કેમેરા દ્વારા વીડિયો રેકોર્ડ કરવામાં આવ્યો હતો. સ્થાનિક સૂત્રોના જણાવ્યા અનુસાર વીડિયોમાં દેખાતા ગંગાધરનું ઘર સંદેશખાલીના સિંહપરા વિસ્તારમાં છે. સ્થાનિક ભાજપ નેતૃત્વ દાવો કરે છે કે તેઓ મંડળ પ્રમુખ નથી. તેમના પક્ષના સમર્થકો જ છે. ભાજપના બસીરહાટ સંગઠનાત્મક જિલ્લા ઉપાધ્યક્ષ વિવેક રોયે પણ દાવો કર્યો કે તેઓ માનસિક રીતે સ્વસ્થ નથી.
જણાવી દઈએ કે સંદેશખાલીમાં ટીએમસીના નેતા શેખ શાહજહાં અને તેના બે સહયોગી શિબુ હાઝરા અને ઉત્તમ સરદાર પર મહિલાઓ પર સામૂહિક બળાત્કારનો આરોપ છે. પોલીસે ત્રણેયની ધરપકડ કરી છે. શાહજહાં શેખ ટીએમસીના જિલ્લા સ્તરના નેતા છે. રાશન કૌભાંડમાં EDએ 5 જાન્યુઆરીએ તેમના ઘરે દરોડા પાડ્યા હતા. ત્યારબાદ શાહજહાંના 200થી વધુ સમર્થકોએ ટીમ પર હુમલો કર્યો હતો. અધિકારીઓએ પોતાનો જીવ બચાવવા ભાગવું પડ્યું હતું. EDએ 55 દિવસ સુધી ફરાર રહ્યા બાદ 29 ફેબ્રુઆરીએ શાહજહાંની ધરપકડ કરી હતી.
