Latest News

કંપની સામે ફરિયાદ – કરોડોની રિકવરીના આદેશ

અમદાવાદ,

અમદાવાદ મનપામાં નવી સ્ટોર્મ વોટર લાઇન અને ડ્રેનેજ લાઇનના કામોમાં થયેલી ગંભીર ગેરરીતિ – ભષ્ટ્રાચાર સામે આવતા આ કૌભાંડ બદલ ચાર જવાબદાર ઇજનેરી અધિકારીઓને સસ્પેન્ડ કરવાની સાથે કરોડોની રિકવરી તથા એજન્સી સામે ફરિયાદ દાખલ કરીને કોન્ટ્રાક્ટરો પર પ્રતિબંધ મૂક્યો હતો.

અમદાવાદ મનાપ કમિશનર બંછાનિધિ પાની દ્વારા સખ્ત કાર્યવાહી હાથ ધરી વિજીલન્સ વિભાગ દ્વારા કરવામાં આવેલી પ્રાથમિક તપાસમાં મેઝરમેન્ટ બુકમાં ફેરફાર, ડુપ્લિકેટ મેઝરમેન્ટ, સમાન ઇનવોઇસ તથા સાઇટ પરના વાસ્તવિક કામ અને નોંધાયેલા માપમાં મોટા તફાવતો સામે આવ્યા છે. આ સમગ્ર મામલે જવાબદાર અધિકારીઓ જેમાં ગેરરીતિ બદલ રાજેશ રાઠવા (એડી.સીટી ઈજનેર), ઉત્કર્ષ ભાભોર (ડે.સીટી ઈજનેર), રમેશ બારીયા (આસી.સીટી ઈજનેર), અલ્પેશ મકવાણા (આસી.ઈજનેર)ને સસ્પેન્ડ કરવામાં આવ્યા છે. તેમની સામે ખાતાકીય તપાસ તથા શિસ્તભંગની કાર્યવાહી શરૂ કરી છે.

વિજીલન્સ વિભાગે આ મામલે ટેન્ડર કોન્ટ્રાક્ટર ધૃવિ બિલ્ડકોન પ્રા. લી., કોન્ટ્રાક્ટર ભગીરથ કન્સ્ટ્રક્શન, પૂર્વ ઝોન વહીવટ ખાતાના બીલ ક્લાર્ક તથા સિનિયર ક્લાર્ક અને પૂર્વઝોન ઇજનેર ખાતાના પ્રિ-ઓડિટર આર.એસ. પટેલના પ્રતિનિધિઓ સહિત અમલીકરણ અધિકારીઓના નિવેદનો અને સ્થળ તપાસ અને રજૂ કરાયેલા દસ્તાવેજી પુરાવાઓના આધારે વિજીલન્સ તપાસ પૂર્ણ કરવામાં આવી હતી.

આ સાથે જ, તપાસ પૂર્ણ ન થાય ત્યાં સુધી ધૃવિ બિલ્ડકોન અને ભગીરથ કન્સ્ટ્રક્શન કંપનીઓને કોર્પોરેશનનું કોઈપણ નવું કામ સોંપવા પર પ્રતિબંધ (બ્લેકલિસ્ટ) મૂકવામાં આવ્યો છે. મેઝરમેન્ટ બુકના સરકારી પાના બદલીને નાણાકીય ઉચાપત કરવાના ગંભીર ફોજદારી ગુના બદલ જવાબદાર કોન્ટ્રાક્ટર એજન્સી અને અધિકારીઓ સામે ટૂંક સમયમાં જ FIR નોંધાવવાની તજવીજ હાથ ધરવામાં આવી છે.