Latest News

મિડલ ઈસ્ટમાં વધી રહેલા તણાવ વચ્ચે ઈરાને એક ગંભીર દાવો કર્યો છે કે તેની ક્રુઝ મિસાઈલોએ અમેરિકાના યુદ્ધ જહાજ USS Abraham Lincoln ને નિશાન બનાવ્યું છે. ઈરાની સેનાના જણાવ્યા મુજબ દરિયા કિનારાથી છોડાયેલી મિસાઈલોએ સફળતાપૂર્વક ટાર્ગેટ હિટ કર્યું છે. જોકે, અમેરિકાએ આ દાવાને ન તો સ્વીકાર્યો છે અને ન તો નકારી કાઢ્યો છે, જેના કારણે સ્થિતિ વધુ સંવેદનશીલ બની છે. ઈરાની નૌકાદળના કમાન્ડરે સ્પષ્ટ ચેતવણી આપી છે કે જો યુએસએસ અબ્રાહમ લિંકન તેમની મિસાઈલ રેન્જમાં આવશે, તો તેને નિશાન બનાવવામાં આવશે. અમે ચોક્કસપણે તેને નિશાન બનાવીશું. અમે તેના પર સતત નજર રાખી રહ્યા છીએ. આ નિવેદનથી વિસ્તારમાં તણાવ વધુ તેજ બન્યો છે.

આ દરમિયાન ઈરાન અને ઈઝરાયલ વચ્ચેની અથડામણ પણ ભયાનક સ્તરે પહોંચી છે. ઈરાને દાવો કર્યો છે કે છેલ્લા 24 કલાકમાં તેણે ઈઝરાયલ પર લગભગ 220 મિસાઈલ છોડ્યા છે, જે અત્યાર સુધીનો સૌથી મોટો હુમલો ગણાવવામાં આવી રહ્યો છે. ઈરાનનો સંદેશ સ્પષ્ટ છે કે તે ઈઝરાયલના કોઈ પણ ખૂણાને છોડવાનું નથી. આ હુમલાઓમાં Tel Aviv, Haifa, Bnei Brak અને Petah Tikva જેવા મુખ્ય શહેરો અસરગ્રસ્ત હોવાનું કહેવાય છે. ગીચ વસ્તીવાળા વિસ્તારોમાં નુકસાન વધુ થયું હોવાની પ્રાથમિક માહિતી મળી રહી છે. કેટલાક વિસ્તારોમાં ઇમારતો ધરાશાયી થવાની તસ્વીરો પણ સામે આવી છે, પરંતુ આ દાવાઓની હજી સત્તાવાર પુષ્ટિ થઈ નથી. જાનહાનિ અંગેના આંકડા હજુ સ્પષ્ટ નથી, પરંતુ પ્રાથમિક અહેવાલો મુજબ ઘણા લોકો ઘાયલ થયા છે. ઈરાનનો દાવો છે કે આ હુમલાઓમાં તેની નવી પેઢીની મિસાઈલ સિસ્ટમો, ફતાહ-2, સેજિલ, ઈમાદ અને ખોરમશહર-4નો ઉપયોગ કરવામાં આવ્યો છે, જે વધુ શક્તિશાળી અને ચોક્કસ નિશાન લગાવવાની ક્ષમતા ધરાવે છે. અમેરિકા તરફથી એક તરફ વાતચીતની ઓફર કરવામાં આવી રહી છે, ત્યારે બીજી તરફ ઈરાનના આક્રમક નિવેદનો અને કાર્યવાહીથી સમગ્ર ક્ષેત્રમાં અનિશ્ચિતતા અને તણાવ વધી રહ્યો છે. હાલની પરિસ્થિતિએ વૈશ્વિક સ્તરે ચિંતા વધારી છે અને આવનારા દિવસોમાં પરિસ્થિતિ કઈ દિશામાં વળે છે તે મહત્વપૂર્ણ રહેશે.