બુધવારે મંદિર માર્ગ સ્થિત SEM કોર્ટમાં ‘કોકરોચ જનતા પાર્ટી’ (CJP) ના નેતાઓ સૌરવ દાસ અને આશુતોષ રંકાની જામીન અરજી પર સુનાવણી હાથ ધરવામાં આવી હતી. સુનાવણી બાદ કોર્ટે બંનેને જામીન મંજૂર કર્યા છે. કાર્યવાહી દરમિયાન દિલ્હી પોલીસે તેમની ન્યાયિક કસ્ટડી (જ્યુડિશિયલ કસ્ટડી) વધુ ત્રણ દિવસ માટે લંબાવવાની વિનંતી કરી હતી. જોકે સુનાવણી પછી કોર્ટે પોતાનો ચુકાદો આપતા સૌરવ દાસ અને આશુતોષ રંકા બંનેને જામીન આપી દીધા.
ઉલ્લેખનીય છે કે આ પહેલા સૌરવ દાસ અને આશુતોષ રંકાએ દિલ્હી હાઈકોર્ટમાં એક અરજી દાખલ કરી હતી, જેમાં મેજિસ્ટ્રેટ કોર્ટ દ્વારા તેમની ન્યાયિક કસ્ટડી લંબાવવાના નિર્ણયને પડકારવામાં આવ્યો હતો. સુનાવણી દરમિયાન હાઈકોર્ટે નોંધ્યું હતું કે મેજિસ્ટ્રેટના આદેશ સામે ‘રિવિઝન પિટિશન’ (પુનર્વિચાર અરજી) દાખલ કરવાનો વિકલ્પ ઉપલબ્ધ હોવાથી, સૌપ્રથમ તે કાયદાકીય માર્ગ અપનાવવો જોઈતો હતો.
હાઈકોર્ટે સૌરવ અને રંકાને ફટકાર લગાવી
દિલ્હી હાઈકોર્ટની ફટકાર બાદ સૌરવ દાસ અને આશુતોષ રંકાએ પોતાની જામીન અરજી પાછી ખેંચી લીધી. કાર્યવાહી દરમિયાન હાઈકોર્ટે પ્રશ્ન કર્યો હતો કે જ્યારે મેજિસ્ટ્રેટના આદેશ સામે રિવિઝન પિટિશન દાખલ કરવાનો વિકલ્પ ઉપલબ્ધ હતો ત્યારે તેઓ સીધા કલમ 226 હેઠળ હાઈકોર્ટમાં કેમ આવ્યા? કોર્ટે ભારપૂર્વક કહ્યું કે જ્યારે કોઈ આદેશને પડકારવા માટે ચોક્કસ કાયદાકીય માર્ગ મોજૂદ હોય ત્યારે તે માર્ગનો જ સૌપ્રથમ ઉપયોગ થવો જોઈએ. પરિણામે કોર્ટે અરજદારોને વર્તમાન અરજી પાછી ખેંચીને તેના બદલે રિવિઝન પિટિશન દાખલ કરવાની સલાહ આપી જેના પગલે સૌરવ દાસ અને આશુતોષ રાંકાએ પોતાની અરજીઓ પાછી ખેંચી લીધી.
સૌરવ અને આશુતોષની મુશ્કેલીઓમાં વધારો
CJP નેતાઓ સૌરવ દાસ અને આશુતોષ રંકાની મુશ્કેલીઓ સતત વધી રહી છે. જંતર-મંતરની ઘટના સાથે જોડાયેલો બીજો કેસ પણ હવે ક્રાઈમ બ્રાન્ચને સોંપવામાં આવ્યો છે. આ પહેલા કનોટ પ્લેસ સાથે સંબંધિત કેસ સોમવારે ક્રાઈમ બ્રાન્ચને સોંપવામાં આવ્યો હતો. હવે જંતર-મંતર સંબંધિત બીજો કેસ પણ ક્રાઈમ બ્રાન્ચને ટ્રાન્સફર કરવામાં આવ્યો છે.
કલમ ૨૨૬ અને રિવિઝન પિટિશન વચ્ચેનો તફાવત
જો કોઈ વ્યક્તિને એવું લાગે કે તેના અધિકારોનું ઉલ્લંઘન થયું છે અથવા સરકારી સત્તામંડળે અયોગ્ય કાયદાકીય કાર્યવાહી કરી છે તો તે હાઈકોર્ટમાં કલમ ૨૨૬ હેઠળ અરજી દાખલ કરી શકે છે. બીજી બાજુ રિવિઝન પિટિશન (પુનર્વિચાર અરજી) નીચલી અદાલતના આદેશને કાયદાકીય આધાર પર પડકારવાનો વિકલ્પ પૂરો પાડે છે. આ કિસ્સામાં નીચલી અદાલત દ્વારા ચુકાદો આપી દેવામાં આવ્યો હોવાથી રિવિઝન પિટિશન દાખલ કરવી એ યોગ્ય પ્રાથમિક પગલું હતું.
