Appleના iPhoneની દુનિયામાં હવે સૌથી મોટો ફેરફાર થવાની તૈયારી છે. વર્ષોથી ફોલ્ડેબલ ફોનથી દૂર રહેલી Apple હવે પોતાનો પહેલો Foldable iPhone લોન્ચ કરી શકે છે. આ ફોનને કેટલાક રિપોર્ટ્સમાં iPhone Ultra તરીકે ઓળખાવવામાં આવી રહ્યો છે. Appleએ હજુ ફોનના તમામ ફીચર્સ સત્તાવાર રીતે જાહેર કર્યા નથી, પરંતુ છેલ્લા કેટલાક મહિનામાં સામે આવેલા રિપોર્ટ્સ અને લીક્સે તેની ડિઝાઇન અને સ્પેસિફિકેશન અંગે ઘણી માહિતી આપી છે. 9 સપ્ટેમ્બર 2026ના Apple ઇવેન્ટમાં આ ફોન રજૂ થવાની શક્યતા છે.
ખુલ્યા બાદ માત્ર 4.5mm જાડાઈ?
ફોનની સૌથી મોટી ખાસિયત તેની ડિઝાઇન બની શકે છે. રિપોર્ટ્સ અનુસાર Foldable iPhone ખુલ્યા બાદ લગભગ 4.5mm જાડો હોઈ શકે છે. આ ડિઝાઇનને Appleએ ‘પાસપોર્ટ’ જેવી રાખી હોવાનું કહેવાય છે. એટલે ફોન સામાન્ય બુકની જેમ વચ્ચે ફોલ્ડ થશે. ફોલ્ડ થયેલી સ્થિતિમાં બહાર અલગ ડિસ્પ્લે હશે અને ખોલ્યા બાદ અંદર મોટી સ્ક્રીન મળશે.
અંદર 7.8 ઇંચની મોટી સ્ક્રીન
લીક્સ પ્રમાણે ફોનમાં બહારની તરફ લગભગ 5.5 ઇંચની ડિસ્પ્લે અને ફોન ખોલ્યા બાદ અંદર 7.8 ઇંચની ફોલ્ડેબલ ડિસ્પ્લે મળી શકે છે. આ સ્ક્રીન સાઈઝ લગભગ iPad miniની રેન્જમાં છે. એટલે ફોન બંધ હોય ત્યારે સામાન્ય સ્માર્ટફોનની જેમ ઉપયોગ કરી શકાશે, જ્યારે ખોલ્યા પછી મોટી સ્ક્રીન પર વીડિયો, ગેમિંગ અને એકસાથે અનેક એપ્સ ચલાવવાનો અનુભવ મળી શકે છે.
Crease લગભગ દેખાશે નહીં?
ફોલ્ડેબલ ફોનમાં સૌથી મોટો સવાલ હંમેશા સ્ક્રીનની વચ્ચે પડતી લાઇન એટલે કે creaseનો હોય છે. Apple આ બાબતમાં પણ ખાસ કામ કરી રહ્યું હોવાનું રિપોર્ટ્સમાં કહેવામાં આવ્યું છે. ફોનમાં નવી hinge ટેક્નોલોજીનો ઉપયોગ થઈ શકે છે, જેના કારણે સ્ક્રીન ખોલ્યા પછી વચ્ચેની crease ખૂબ ઓછી દેખાય તેવી શક્યતા છે. જોકે આ બાબતની સત્તાવાર પુષ્ટિ હજુ બાકી છે.
Face ID નહીં, Touch IDની વાપસી?
ફોનમાં Appleના સામાન્ય iPhoneથી અલગ સુરક્ષા સિસ્ટમ મળવાની પણ ચર્ચા છે. કેટલાક રિપોર્ટ્સ અનુસાર Foldable iPhoneમાં Face IDના બદલે સાઇડ બટનમાં Touch ID આપવામાં આવી શકે છે. જો આવું થાય તો વર્ષો બાદ iPhoneમાં Touch IDનું મહત્વ ફરી વધી શકે છે. જોકે આ પણ હાલ લીક થયેલી માહિતી છે અને Apple તરફથી પુષ્ટિ થયેલી નથી.
કેમેરામાં મોટો ફેરફાર
રિપોર્ટ્સ પ્રમાણે પાછળ ડ્યુઅલ કેમેરા સેટઅપ મળી શકે છે, જેમાં મુખ્ય અને અલ્ટ્રા-વાઇડ કેમેરા સામેલ હશે. ખાસ વાત એ છે કે ફોનમાં ટેલિફોટો કેમેરા ન મળવાની શક્યતા દર્શાવવામાં આવી છે. ફ્રન્ટમાં પણ બે કેમેરા હોવાની ચર્ચા છે, જેથી ફોન ફોલ્ડ અને અનફોલ્ડ બંને સ્થિતિમાં વીડિયો કોલિંગ અને સેલ્ફી માટે વધુ ઉપયોગી બની શકે.
A20 Pro ચિપ અને મોટી બેટરી
રિપોર્ટ્સમાં ફોનમાં Appleની નવી A20 Pro ચિપ મળવાની શક્યતા દર્શાવવામાં આવી છે. આ ચિપ 2nm ટેક્નોલોજી પર આધારિત હોવાનો દાવો છે. બેટરીની વાત કરીએ તો લગભગ 4,883mAhની ડ્યુઅલ-સેલ બેટરી મળવાની ચર્ચા છે. Foldable ડિઝાઇનને કારણે Apple માટે બેટરી, હિંગ અને આંતરિક હાર્ડવેરને ખૂબ પાતળી બોડીમાં ફિટ કરવું મોટો એન્જિનિયરિંગ પડકાર રહેશે.
કિંમત ₹2 લાખથી પણ ઉપર જઈ શકે
આ ફોન સામાન્ય iPhone કરતાં ઘણો મોંઘો હોવાની શક્યતા છે. રિપોર્ટ્સમાં તેની કિંમત $2,000થી $2,500 વચ્ચે રહેવાની વાત છે. ભારતમાં આ કિંમત ટેક્સ અને અન્ય ખર્ચને કારણે ₹2 લાખથી ઉપર જઈ શકે છે. જોકે Appleએ ભારતીય કિંમત જાહેર કરી નથી, તેથી હાલની કિંમતને માત્ર અંદાજ તરીકે જ જોવી જોઈએ.
Apple હવે Foldable માર્કેટમાં ઉતરશે
Samsung, Google અને Motorola જેવી કંપનીઓ ઘણા વર્ષોથી Foldable ફોન વેચી રહી છે. Appleની એન્ટ્રીથી આ માર્કેટમાં મોટો ફેરફાર થઈ શકે છે. Reuters અનુસાર Appleનો પહેલો Foldable iPhone કંપની માટે ખૂબ મહત્વનો પ્રોડક્ટ બની શકે છે અને 2027 સુધીમાં Appleના Foldable ફોનના શિપમેન્ટનો આંકડો 17 મિલિયનથી વધુ થઈ શકે તેવી વિશ્લેષકોની અપેક્ષા છે.
હાલ સૌથી મહત્વની વાત એ છે કે 9 સપ્ટેમ્બરનો Apple ઇવેન્ટ હવે નજીક છે. જો Apple ત્યાં ખરેખર Foldable iPhone રજૂ કરે છે, તો કંપની પહેલીવાર Samsung જેવા દિગ્ગજોને સીધી ટક્કર આપતી જોવા મળશે.
