રાજધાની દિલ્હીમાં સોમવાર, 12 ઑક્ટોબર 2026ના રોજ વિપક્ષી INDIA ગઠબંધન દ્વારા સુપ્રીમ કોર્ટ સુધી માર્ચ કાઢવાના કાર્યક્રમને પગલે સુરક્ષા વ્યવસ્થા કડક કરવામાં આવી છે. કથિત ‘વોટ ચોરી’ના મુદ્દે મુખ્ય ચૂંટણી કમિશનર જ્ઞાનેશ કુમાર સામે કાર્યવાહી કરવાની માગ સાથે યોજાનારી આ કૂચને ધ્યાનમાં રાખીને દિલ્હી મેટ્રો રેલ કોર્પોરેશન (DMRC)એ છ મહત્ત્વપૂર્ણ મેટ્રો સ્ટેશનના પ્રવેશ અને બહાર નીકળવાના ગેટ સવારે 6 વાગ્યાથી સાંજે 4 વાગ્યા સુધી બંધ રાખવાની જાહેરાત કરી છે. બીજી તરફ, દિલ્હી ટ્રાફિક પોલીસે પણ અનેક વિસ્તારોમાં વાહનવ્યવહાર પ્રભાવિત થવાની શક્યતા વ્યક્ત કરી છે.
રાજીવ ચોક સહિત કયા 6 મેટ્રો સ્ટેશનના ગેટ બંધ?
DMRC દ્વારા જાહેર કરવામાં આવેલી માહિતી અનુસાર, સુરક્ષાનાં કારણોસર નીચેના છ મેટ્રો સ્ટેશનના એન્ટ્રી અને એક્ઝિટ ગેટ બંધ રાખવામાં આવ્યા છે.
પટેલ ચોક મેટ્રો સ્ટેશન
જનપથ મેટ્રો સ્ટેશન
રાજીવ ચોક મેટ્રો સ્ટેશન
મંડી હાઉસ મેટ્રો સ્ટેશન
સેન્ટ્રલ સેક્રેટરિયેટ મેટ્રો સ્ટેશન
બારાખંભા રોડ મેટ્રો સ્ટેશન
આ તમામ સ્ટેશન પર સવારે 6 વાગ્યાથી સાંજે 4 વાગ્યા સુધી મુસાફરોને પ્રવેશવા અને બહાર નીકળવા પર પ્રતિબંધ રહેશે. જોકે, DMRCએ સ્પષ્ટ કર્યું છે કે આ સ્ટેશનો પર એક મેટ્રો લાઇનમાંથી બીજી લાઇનમાં જવા માટેની ઇન્ટરચેન્જ સુવિધા ચાલુ રહેશે. સુરક્ષા એજન્સીઓ પરિસ્થિતિની સમીક્ષા કર્યા બાદ જરૂરિયાત મુજબ આગળની માહિતી જાહેર કરશે.
‘વોટ ચોરી’ના મુદ્દે વિપક્ષની કૂચ
વિપક્ષી INDIA ગઠબંધન દ્વારા ‘ચલો દિલ્હી માર્ચ ફોર ડેમોક્રેસી’ના નામે આ કૂચનું આયોજન કરવામાં આવ્યું છે. વિપક્ષનો આરોપ છે કે ચૂંટણી પ્રક્રિયા અને મતદાર યાદીઓની સુધારણા અંગે ગંભીર પ્રશ્નો ઊભા થયા છે. આ મુદ્દે મુખ્ય ચૂંટણી કમિશનર જ્ઞાનેશ કુમાર સામે કાર્યવાહી કરવાની માગ કરવામાં આવી રહી છે.વિપક્ષ દ્વારા મુખ્ય ચૂંટણી કમિશનરના રાજીનામા, મતદાર યાદીઓની વિશેષ સઘન સુધારણા પ્રક્રિયા (SIR) પર રોક અને બેલેટ પેપરથી મતદાનની વ્યવસ્થા ફરી લાગુ કરવાની માગ પણ ઉઠાવવામાં આવવાની છે. કોંગ્રેસના નેતા રાહુલ ગાંધી અને રાજ્યસભામાં વિપક્ષના નેતા મલ્લિકાર્જુન ખડગેએ મુખ્ય ન્યાયાધીશ જસ્ટિસ સૂર્યકાંત સાથે મુલાકાત માટે સમય માગ્યો હતો, જેથી ચૂંટણી સંબંધિત મુદ્દાઓ અંગે રજૂઆત કરી શકાય. જોકે, સૂત્રોના જણાવ્યા અનુસાર મુખ્ય ન્યાયાધીશે આ મુલાકાતની વિનંતી સ્વીકારી નહોતી, કારણ કે સંબંધિત મુદ્દાઓ સુપ્રીમ કોર્ટમાં પહેલેથી જ વિચારાધીન છે.
બપોરે કનોટ પ્લેસમાં એકત્ર થવાની યોજના
કોંગ્રેસના કાર્યક્રમ મુજબ, તેના નેતાઓ સોમવારે બપોરે 1:30 વાગ્યે કનોટ પ્લેસ અને બારાખંભા રોડના જંક્શન પાસે એકત્ર થવાના છે. ત્યાંથી પ્રસ્તાવિત માર્ચમાં જોડાવાની યોજના છે. રાહુલ ગાંધીએ લોકશાહી અને બંધારણમાં વિશ્વાસ ધરાવતા નાગરિકોને આ કાર્યક્રમમાં જોડાવાની અપીલ કરી છે.
ટ્રાફિક ડાયવર્ઝનથી મુસાફરોને સાવચેતી રાખવાની સલાહ
દિલ્હી ટ્રાફિક પોલીસે નવી દિલ્હી અને મધ્ય દિલ્હીના અનેક માર્ગો પર વાહનવ્યવહાર પ્રભાવિત થવાની શક્યતા વ્યક્ત કરી છે. પરિસ્થિતિ પ્રમાણે વિવિધ જંક્શન અને માર્ગો પર ટ્રાફિક ડાયવર્ઝન લાગુ થઈ શકે છે. ખાસ કરીને કનોટ પ્લેસ, મંડી હાઉસ, પટેલ ચોક અને સંસદ માર્ગની આસપાસ મુસાફરોને વિલંબનો સામનો કરવો પડી શકે છે.રેલવે સ્ટેશન, આંતરરાજ્ય બસ ટર્મિનલ અથવા એરપોર્ટ જતાં લોકોએ વધારાનો સમય લઈને નીકળવું જોઈએ. મુસાફરોએ દિલ્હી મેટ્રો અને દિલ્હી ટ્રાફિક પોલીસની સત્તાવાર સૂચનાઓ તપાસીને જ મુસાફરીનું આયોજન કરવું હિતાવહ છે.
