રવિવારે ગોવામાં રાહુલ ગાંધીએ કહ્યું, “હું દરેક રાજ્યમાં કહું છું કે વડાપ્રધાન મત ચોરી કરે છે. તેમ છતાં મારી સામે કોઈ કેસ દાખલ કરવામાં આવતો નથી કારણ કે તેઓ જાણે છે કે જો કેસ દાખલ કરવામાં આવે, તો તે એક કાનૂની મામલો બની જશે અને તેઓ પોતે જ તેમાં ફસાઈ જશે.”
“દિલ્હીમાં અમે ટૂંક સમયમાં વડાપ્રધાન અને ગૃહમંત્રી સાથે હિસાબ કરી લઈશું. આ દિશામાં કામ ચાલી રહ્યું છે. સરકારની ‘એક્સપાયરી ડેટ’ નજીક આવી રહી છે. તમે ચોક્કસ નોંધ્યું હશે કે આજકાલ વડાપ્રધાન લોકોની સામે આવી શકતા નથી, કારણ કે તેઓ જાણે છે કે આ દેશના યુવાનો તેમની વિરુદ્ધ ઊભા થઈ ગયા છે.”
રાહુલ કોંગ્રેસ પક્ષના જનસંપર્ક અભિયાન ‘ગોય રાખણ યાત્રા’ (ગોવા બચાવો યાત્રા)માં ભાગ લેવા માટે ગોવા પહોંચ્યા હતા. આ સાથે કોંગ્રેસની ૨૮ દિવસીય યાત્રાનું સમાપન થયું. ચાર વર્ષમાં રાહુલની ગોવાની આ પ્રથમ મુલાકાત છે; તેમની છેલ્લી મુલાકાત ૨૦૨૨માં હતી. ગોવામાં ૨૦૨૭માં વિધાનસભાની ચૂંટણીઓ યોજાવાની છે.
તેમણે કહ્યું કે શિક્ષણ વ્યવસ્થાના દરેક સ્તરે RSSના સભ્યો ઘૂસી ગયા છે. એક સમયે સમગ્ર વિશ્વ ભારતની શિક્ષણ પ્રણાલીને શ્રેષ્ઠ મોડેલ તરીકે ઓળખતું હતું. પરંતુ આજે દિલ્હીમાં વિદ્યાર્થીઓ પર હુમલા થઈ રહ્યા છે. તેમણે શિક્ષણ વ્યવસ્થાના દરેક સ્તરે ભાજપ અને RSS સાથે જોડાયેલા લોકોને બેસાડી દીધા છે. કોંગ્રેસ ભ્રષ્ટાચારના આ મોડેલને તોડી પાડશે. તેઓ હાઈ-ટેક ભ્રષ્ટાચાર અને જમીન સંબંધિત ગોટાળા કરે છે જેમ કે ગુજરાતમાં ‘નરેન્દ્ર મોદી મોડેલ’ જોવા મળ્યું હતું, તેવું જ ભ્રષ્ટાચારનું મોડેલ હવે ગોવામાં પણ અસ્તિત્વમાં છે. માત્ર કોંગ્રેસ જ આનો અંત લાવી શકે છે.
“ગોવામાં દેશનો સૌથી વધુ બેરોજગારી દર છે. તેમણે ‘માસ્ટર પ્લાન’ રદ કરી નાખ્યો. તેમનો એકમાત્ર ઉદ્દેશ્ય પૈસા કેવી રીતે કમાવવા તે શોધવાનો છે. તેઓ બસ આ જ કરે છે. ગોવાના લોકોને લૂંટવા, તમારી જમીનો પચાવી પાડવી અને તેને અબજોપતિઓના હાથમાં સોંપી દેવી. ગોવામાં સરકાર તમારી જમીન હડપી રહી છે. ગોવા દેશના સૌથી સુંદર સ્થળોમાંનું એક છે અને ત્યાં સમૃદ્ધ સંસ્કૃતિ છે તેમ છતાં અહીંની સરકાર તમારી જમીન છીનવી રહી છે અને તેને કરોડો રૂપિયામાં બહારના લોકોને વેચી રહી છે. આ કામ સરળ બનાવવા માટે તેમણે ‘માસ્ટર પ્લાન’ પણ રદ કરી નાખ્યો.” તેમનું એકમાત્ર ધ્યાન પૈસા કમાવવા પર છે.
ગોવામાં ફેબ્રુઆરી-માર્ચ ૨૦૨૭માં ચૂંટણી યોજાવાની શક્યતા
ગોવામાં આગામી વિધાનસભા ચૂંટણી ૨૦૨૭ની શરૂઆતમાં સંભવતઃ ફેબ્રુઆરી કે માર્ચ મહિનામાં યોજાય તેવી અપેક્ષા છે. હજુ સુધી સત્તાવાર તારીખો જાહેર કરવામાં આવી નથી. વર્તમાન વિધાનસભાનો કાર્યકાળ ૧૪ માર્ચ, ૨૦૨૭ના રોજ પૂર્ણ થશે.
કોંગ્રેસ 15 વર્ષથી સત્તાની બહાર, પુનરાગમનની આશા
ગોવામાં કોંગ્રેસ પક્ષ ૨૦૧૨થી સત્તાની બહાર છે. એટલે કે લગભગ ૧૫ વર્ષથી. ૨૦૧૨માં કોંગ્રેસ સરકારનો પરાજય થયો અને ભાજપ-એમજીપી (BJP-MGP) ગઠબંધન સત્તામાં આવ્યું. ૨૦૧૭માં, કોંગ્રેસ ૧૭ બેઠકો સાથે સૌથી મોટો પક્ષ બનીને ઉભરી આવી હતી પરંતુ ભાજપે અન્ય પક્ષો સાથે ગઠબંધન કરીને સરકાર બનાવી લીધી. ૨૦૨૨માં ભાજપે ૨૦ બેઠકો જીતી અને ત્યારબાદ કોંગ્રેસના ૮ ધારાસભ્યો પક્ષપલટો કરીને ભાજપમાં જોડાઈ ગયા.
