Latest News

વાયદા બજારમાં આજે ભારે ઉથલપાથલ વચ્ચે સોનું અને ચાંદીના ભાવોમાં ઐતિહાસિક ધરખમ ઘટાડો નોંધાયો છે, જેના કારણે રોકાણકારોમાં ગભરાટ ફેલાયો છે. માત્ર 50 દિવસમાં કિંમતોમાં મોટો ધરાશાયી ઘટાડો જોવા મળ્યો છે, 29 જાન્યુઆરી 2026ના રોજ 4.25 લાખ રૂપિયા પ્રતિ કિલોના રેકોર્ડ સ્તરે રહેલી ચાંદી હવે ઘટીને 2 લાખ રૂપિયાની નીચે આવી ગઈ છે. એટલે કે બે મહિનાથી પણ ઓછા સમયમાં ચાંદીમાં પ્રતિ કિલો આશરે 2.25 લાખ રૂપિયાનો મોટો કડાકો નોંધાયો છે. સોમવારે ટ્રેડિંગ દરમિયાન ચાંદીમાં એક જ દિવસે 26,000 રૂપિયાનો ઘટાડો નોંધાતા ભાવ 1,99,643 રૂપિયા સુધી સરકી ગયા હતા. સોનામાં પણ ભારે દબાણ જોવા મળ્યું હતું, જ્યાં 10 ટકા લોઅર સર્કિટ લાગતા ભાવમાં 14,000 રૂપિયાનો ઘટાડો થઈ 1.30 લાખ રૂપિયા પ્રતિ 10 ગ્રામની નીચે આવી ગયા.

મિડલ ઇસ્ટમાં ઈરાન અને અમેરિકા વચ્ચે વધતા તણાવના કારણે વૈશ્વિક સ્તરે આર્થિક અનિશ્ચિતતા વધી રહી છે, જેના પરિણામે રોકાણકારોમાં ભયનો માહોલ ઉભો થયો છે. નિષ્ણાતોના મતે, અમેરિકન ફેડરલ રિઝર્વના વ્યાજદર સંબંધિત નિર્ણયો અને શેરબજારમાં ચાલી રહેલી ભારે વેચવાલી આ ઘટાડાને વધુ વેગ આપી રહી છે. આ સાથે જ શેરબજારમાં પણ મોટો ઝાટકો લાગ્યો છે, જ્યાં સેન્સેક્સમાં આજે 1800 પોઈન્ટનો ગાબડું નોંધાયું છે. ઊંચા ભાવે સોનું અને ચાંદી ખરીદનારા રોકાણકારો હાલ ભારે નુકસાનમાં છે, જ્યારે બજારમાં ખરીદદારોની અછત જોવા મળી રહી છે, જે પરિસ્થિતિને વધુ ચિંતાજનક બનાવી રહી છે.