બિહાર વિધાનસભા ચૂંટણી દરમિયાન સોમવારે આરજેડી સુપ્રીમો લાલુ યાદવે પહેલી વાર પ્રચાર કર્યો હતો. તેમણે દાનાપુરથી આરજેડી ઉમેદવાર રિતલાલ યાદવ માટે રોડ શો કર્યો હતો. રિતલાલ યાદવ 50 લાખ રૂપિયાની ખંડણી માંગવાના આરોપમાં જેલમાં છે. રિતલાલની પુત્રીએ પણ રોડ શોમાં ભાગ લીધો હતો.
લાલુનો રોડ શો દિઘામાં શરૂ થયો અને 15 કિલોમીટર દૂર ખગૌલ સુધી ચાલુ રહ્યો. દિઘા વિધાનસભા મતવિસ્તારના સીપીઆઈ ઉમેદવાર દિવ્યા ગૌતમ પણ લાલુની કારમાં જોવા મળ્યા હતા. રોડ શો દરમિયાન લાલુ પ્રસાદ યાદવે કહ્યું, “ચૂંટણી પ્રચાર ખૂબ જ સારી રીતે ચાલી રહ્યો છે. ગઠબંધન જીતશે. ભારે ભીડ છે. તેજસ્વીને લોકોનો પ્રેમ મળશે. તેજસ્વી મુખ્યમંત્રી બનશે. 14 નવેમ્બરે સરકાર બદલાશે.” લાલુના રોડ શોમાં ભાગ લેનારા એક કાર્યકર્તાએ કહ્યું, “આ પરિવર્તનની ભીડ છે. આજે પણ દુનિયા લાલુ યાદવ માટે પાગલ છે.”
રીતલાલ પર ₹50 લાખની ખંડણી માંગવાનો આરોપ
રીતલાલ યાદવે 17 એપ્રિલ, 2025 ના રોજ દાનાપુર કોર્ટમાં આત્મસમર્પણ કર્યું ત્યારબાદ તેમને 14 દિવસ માટે ન્યાયિક કસ્ટડીમાં બેઉર જેલમાં મોકલવામાં આવ્યા હતા. ધારાસભ્ય પર ₹50 લાખની ખંડણી માંગવાનો અને બિલ્ડર કુમાર ગૌરવને ધમકી આપવાનો આરોપ છે. આ સંદર્ભમાં ખગૌલ પોલીસ સ્ટેશન વિસ્તારમાં FIR નોંધવામાં આવી હતી.
લગભગ બે મહિના પહેલા સુરક્ષા કારણોસર RJD ધારાસભ્યને પટનાની બેઉર જેલમાંથી ભાગલપુરની સ્પેશિયલ સેન્ટ્રલ જેલમાં ખસેડવામાં આવ્યા હતા. રિતલાલ યાદવને ઉચ્ચ સુરક્ષાવાળા ત્રીજા વિભાગના ટી-સેલમાં રાખવામાં આવ્યા છે.
