Latest News

એન્જિનમાં શોર્ટ સર્કિટ હોવાનું પ્રાથમિક અનુમાન

( પ્રતિનિધિ )વડોદરા,તા.22

વડોદરા શહેરના રાવપુરા વિસ્તારમાં આવેલી મહારાણી કન્યા વિદ્યાલયના મુખ્ય ગેટ બહાર પાર્ક કરેલી એક કારમાં આજે અચાનક આગ લાગતા ભારે અફરાતફરી મચી ગઈ હતી. જોકે, ફાયરબ્રિગેડના જવાનોએ સ્થળ પર પહોંચી આગ પર કાબુ મેળવી લીધો હતો. સદનસીબે કોઈ હાજર નહિ હોવાથી જાનહાનિ થતા ટળી હતી.

મહારાણી કન્યા વિદ્યાલયના પાછળના ભાગે દાંડિયા બજાર ત્રણ રસ્તા નજીક ગેટ બહાર પાર્ક કરેલી કારમાંથી એકાએક ધુમાડા નીકળવા લાગ્યા હતા. જોતજોતામાં કારના આગળના ભાગે આગે વિકરાળ સ્વરૂપ ધારણ કરી લીધું હતું અને ગણતરીની મિનિટોમાં આખું બોનેટ આગની લપેટમાં આવી ગયું હતું. ઘટનાને પગલે રસ્તા પરથી પસાર થતા વાહનચાલકો પણ ગભરાઈને રોકાઈ ગયા હતા. સ્થળ પર લોકોના ટોળા એકઠા થઈ ગયા હતા. સદનસીબે બનાવ સમયે કારમાં કોઈ હાજર ન હોવાથી મોટી જાનહાનિ થતા ટળી હતી. સ્થાનિક લોકોએ તાત્કાલિક ફાયર બ્રિગેડને જાણ કરી હતી. બનાવની જાણ થતાં જ ફાયર બ્રિગેડના જવાનો ગણતરીની મિનિટોમાં સ્થળ પર દોડી આવ્યા હતા અને પાણીનો મારો ચલાવીને ભારે જહેમત બાદ આગ પર કાબૂ મેળવ્યો હતો. પ્રાથમિક તપાસમાં કારના એન્જિનમાં શોર્ટ સર્કિટ થવાને કારણે આગ લાગી હોવાનું અનુમાન લગાવાઈ રહ્યું છે. પોલીસે પણ ઘટનાસ્થળે પહોંચીને વધુ તપાસ હાથ ધરી છે. જોકે, આકસ્મિક બનેલી આ ઘટનાને પગલે લોકોમાં થોડા સમય માટે ફફડાટ વ્યાપી ગયો હતો.