Latest News

અમેરિકામાં ગુજરાતી મહિલાને અકસ્માતે ગોળી વાગી: જડબામાંથી ગોળી પાર, હાલત ગંભીર

લુઇઝિયાના રાજ્યમાં સ્ટોરમાં ઘટના; પતિની પોલીસે અટકાયત કરી તપાસ શરૂ : અમેરિકાના લુઇઝિયાના રાજ્યમાં એક દુર્ભાગ્યપૂર્ણ ઘટનામાં ગુજરાતની 30 વર્ષીય મહિલા ગંભીર રીતે ઈજાગ્રસ્ત બની છે. એક કન્વિનિયન્સ સ્ટોરમાં થયેલી “અકસ્મિક ફાયરિંગ” દરમિયાન ગોળી મહિલાના ચહેરામાંથી પસાર થઈ જડબાને ગંભીર રીતે નુકસાન પહોંચાડ્યું હતું. હાલ મહિલાની સ્થિતિ અત્યંત ગંભીર હોવાનું જણાવવામાં આવી રહ્યું છે.

માહિતી અનુસાર ઘટના સ્ટોરમાં સામાન્ય વાતચીત દરમિયાન બની હતી. અચાનક ગોળી છૂટતાં મહિલાને ગંભીર ઇજા પહોંચી હતી, જેના કારણે તેને તાત્કાલિક હોસ્પિટલમાં ખસેડવામાં આવી હતી. ડોક્ટરોએ જણાવ્યું છે કે ગોળી જડબામાંથી પસાર થતાં ચહેરાના ભાગને ભારે નુકસાન થયું છે અને લાંબી સારવાર સાથે એકથી વધુ સર્જરી કરવાની જરૂર પડી શકે છે.
આ ઘટનાને “અકસ્મિક ફાયરિંગ” તરીકે ગણાવવામાં આવી રહી છે. છતાં પણ પોલીસે મહિલાના પતિને કસ્ટડીમાં લઈને પૂછપરછ શરૂ કરી છે. અધિકારીઓ સમગ્ર ઘટનાની પરિસ્થિતિ અને ગોળી કેવી રીતે છૂટી તેની તપાસ કરી રહ્યા છે.

ઘટના બાદ સ્થાનિક ભારતીય સમુદાય અને મહિલાના પરિવારજનોમાં ભારે ચિંતા ફેલાઈ છે. મહિલાની સારવાર માટે લાંબો સમય લાગવાની શક્યતા હોવાથી પરિવાર માટે આર્થિક પડકાર પણ ઉભો થયો છે. સમુદાયના લોકો તરફથી સહાય માટે પ્રયત્નો શરૂ થયા હોવાનું પણ જાણવા મળ્યું છે. હાલમાં પોલીસ દ્વારા ઘટના પાછળના સાચા કારણોની વિગતવાર તપાસ ચાલુ છે. પ્રાથમિક રીતે આ અકસ્માત હોવાનું જણાવાઈ રહ્યું છે, પરંતુ તપાસ પૂર્ણ થયા બાદ જ સમગ્ર હકીકત સ્પષ્ટ થશે. મહિલાની તબિયત સ્થિર થાય તે માટે પરિવારજનો અને ઓળખીતાઓ પ્રાર્થના કરી રહ્યા છે.