અમેરિકન રાષ્ટ્રપતિ ડોનાલ્ડ ટ્રમ્પે દાવો કર્યો હતો કે ખામેનીના અંતિમ સંસ્કારમાં ઈરાનનું સમગ્ર ટોચનું નેતૃત્વ હાજર હતું અને જો અમેરિકા ઇચ્છતે તો તે એક જ હુમલામાં તે બધાને ખતમ કરી શક્યું હોત. એક્સિઓસ સાથે વાત કરતા ટ્રમ્પે કહ્યું, “જોકે, મેં એવું ન કર્યું, કારણ કે પછી વાટાઘાટો કરવા માટે કોઈ બચ્યું ન હોત.” ટ્રમ્પે અંતિમ સંસ્કારમાં રડતા શોકગ્રસ્તો પર પણ કટાક્ષ કર્યો અને કહ્યું કે કદાચ તે આંસુ પણ નકલી હતા.
ઈરાને ટ્રમ્પના નિવેદન પર વળતો પ્રહાર કર્યો. આર્મેનિયામાં ઈરાની દૂતાવાસે સોશિયલ મીડિયા પર લખ્યું, “લોકોને મારી શકાય છે, પરંતુ વિચારોને નહી. તમારી પાસે સભ્યતા, ઇતિહાસ કે સન્માન નથી.” દરમિયાન ખામેનીને અંતિમ શ્રદ્ધાંજલિ આપવા માટે તેહરાનના ઇમામ ખોમેની ગ્રાન્ડ મોસલ્લામાં ત્રીજા દિવસે લાખો લોકો એકઠા થયા છે. કાર્યક્રમ દરમિયાન “અમેરિકા મુર્દાબાદ” અને “ઇઝરાયલ મુર્દાબાદ” ના નારા લગાવવામાં આવ્યા હતા.
ઈરાની સૈન્ય: યુદ્ધવિરામનો ઉપયોગ તાકાત વધારવા માટે થઈ રહ્યો છે
ઈરાની સૈન્યના બ્રિગેડિયર જનરલ મોહમ્મદ અકરમીનિયાએ જણાવ્યું હતું કે યુદ્ધવિરામનો ઉપયોગ સેનાની તાકાત વધારવા માટે થઈ રહ્યો છે. તેમણે કહ્યું, “અમે એક પણ ક્ષણ બગાડીશું નહીં અને અમારી લશ્કરી તૈયારીઓને સતત મજબૂત બનાવીશું.” અમેરિકા અને ઇઝરાયલને ચેતવણી આપતા અકરમીનિયાએ ઉમેર્યું, “જો દુશ્મન ભૂલ કરશે તો ઈરાની સશસ્ત્ર દળો જબરદસ્ત અને નિર્ણાયક જવાબ આપશે.”
રશિયાએ કહ્યું- હોર્મુઝ ઈરાનનું ‘પરમાણુ શસ્ત્ર’
ભૂતપૂર્વ રશિયન રાષ્ટ્રપતિ દિમિત્રી મેદવેદેવે જણાવ્યું હતું કે હોર્મુઝ સ્ટ્રેટ ઈરાનનું “પરમાણુ શસ્ત્ર” છે. તેમણે નોંધ્યું હતું કે આ માર્ગને નિયંત્રિત કરીને ઈરાન વૈશ્વિક તેલ વેપાર પર દબાણ લાવી શકે છે. મેદવેદેવના મતે જો ઈરાન આ દરિયાઈ માર્ગ પર ટ્રાફિકને અવરોધે છે તો તે વૈશ્વિક તેલ વેપાર અને પુરવઠાને અસર કરી શકે છે.
ખામેનીની 14 મહિનાની પૌત્રીને દફનાવવામાં આવી
ખામેનીની 14 મહિનાની પૌત્રી ઝહરા મોહમ્મદી ગોલપાયગાનીને પણ ખામેનીના અંતિમ સંસ્કાર દરમિયાન દફનાવવામાં આવી હતી. જનાજાની નમાઝ દરમિયાન ઝહરાની નાની શબપેટીને ખામેનીના શબપેટીની બાજુમાં રાખવામાં આવી હતી અને બંને માટે અંતિમ પ્રાર્થના એકસાથે કરવામાં આવી હતી. અહેવાલો અનુસાર ઝહરાની માતા બોશરા ખામેનીનું પણ 28 ફેબ્રુઆરીના રોજ યુએસ-ઇઝરાયલી હુમલામાં મૃત્યુ થયું હતું. ઝહરાના પિતા મોહમ્મદ જવાદ મોહમ્મદી ગોલપાયગાની પણ અંતિમ પ્રાર્થનામાં હાજર હતા.
