ભ્રષ્ટાચારનો ગરમાવો કે કુદરતી પ્રકોપ ? નવા બનેલા રોડ પર ડામર પીગળતા રાહદારીઓના પગરખાં ચોંટી રહ્યા છે, અકસ્માતનો ભય
(પ્રતિનિધિ), વડોદરા. તા.14
વડોદરા :- શહેરમાં ઉનાળાના પ્રારંભે જ સૂર્યદેવતા આકરા પાણીએ થયા છે, ત્યારે વડોદરાના દક્ષિણ વિસ્તારમાં આવેલા માણેજાથી સુસેન તરફ જતા મુખ્ય માર્ગ પર એક અજીબોગરીબ અને જોખમી સ્થિતિ સર્જાઈ છે. આ માર્ગ પર ડામર પીગળીને રસ્તા પર પથરાઈ જતાં વાહનચાલકો અને રાહદારીઓ ભારે મુશ્કેલીમાં મુકાયા છે. રસ્તાની આ હાલત જોઈને સ્થાનિકોમાં એક જ ચર્ચા જાગી છે: આ ગરમીનો પ્રકોપ છે કે હલકી ગુણવત્તાના કામનો નમૂનો ?
છેલ્લા બે દિવસથી માણેજા-સુસેન રોડ પર ડામર પીગળીને પ્રવાહી જેવો બની ગયો છે. ખાસ કરીને બપોરના સમયે જ્યારે તાપમાન ઊંચું જાય છે, ત્યારે રસ્તા પર ડામરની ચીકણી પરત જામી જાય છે. આને કારણે, રસ્તો ઓળંગતા લોકોના ચપ્પલ અને પગરખાં ડામરમાં ચોંટી રહ્યા છે. ટુ-વ્હીલરના ટાયર લપસવાને કારણે અકસ્માતની સંભાવના વધી ગઈ છે. ડામર ઉખડીને ટાયર પર ચોંટતો હોવાથી વાહનોની ગતિ ધીમી પડી ગઈ છે, જેનાથી પીક અવર્સમાં ટ્રાફિકની સમસ્યા સર્જાય છે.
સામાન્ય રીતે, જો ડામરમાં ‘સોફ્ટનિંગ પોઈન્ટ’ જળવાયો ન હોય અથવા જરૂર કરતા વધારે ઓઈલનું પ્રમાણ હોય, તો તે ગરમીમાં પીગળવા લાગે છે. માણેજા-સુસેન રોડ પર જે રીતે ડામર ઉપર આવી રહ્યો છે, તે સીધો નિર્દેશ કરે છે કે કાં તો મટીરિયલ હલકી ગુણવત્તાનું છે અથવા તો ટેકનિકલ માપદંડોનું પાલન કરવામાં આવ્યું નથી.
હાલ તો આ માર્ગ પરથી પસાર થવું એ જીવના જોખમ સમાન બની ગયું છે. વડોદરા મહાનગરપાલિકા અને માર્ગ-મકાન વિભાગ આ મામલે તાત્કાલિક તપાસ કરે, ડામર પર ધૂળ કે રેતી નાખીને તેને સુરક્ષિત બનાવે અને જવાબદાર કોન્ટ્રાક્ટર સામે કડક પગલાં ભરે તેવી લોકમાંગ ઉઠી છે.
