ખાલિસ્તાનને સમર્થન આપવાના મુદ્દે ભારતે ફરી એકવાર કેનેડાને ફટકાર લગાવી છે. તાજેતરમાં કેનેડાએ ખાલિસ્તાની આતંકવાદી હરદીપ સિંહ નિજ્જર હત્યા કેસના મુદ્દે ભારતીય રાજદ્વારીઓ પર આરોપ લગાવ્યો હતો અને લોરેન્સ બિશ્નોઈ ગેંગ પર દેશમાં હિંસામાં સામેલ હોવાનો પણ આરોપ લગાવ્યો હતો. જ્યારે ભારતે રાજદ્વારીઓ સામેના આરોપોને લઈને કેનેડાના તમામ આરોપોને પાયાવિહોણા ગણાવ્યા હતા ત્યારે હવે ભારતે લોરેન્સ બિશ્નોઈ ગેંગના મામલામાં કેનેડા પર નિશાન સાધ્યું છે.
વિદેશ મંત્રાલયના પ્રવક્તા રણધીર જયસ્વાલે કહ્યું કે અમે કેનેડાને ઘણી વિનંતી કરી હતી, જેમાં તેમને લોરેન્સ બિશ્નોઈ ગેંગના સભ્યોની ધરપકડ કરવા માટે કહેવામાં આવ્યું હતું. જો કે કેનેડાએ અમારી ચિંતાઓ પર કોઈ પગલાં લીધાં નથી. આની પાછળ કેટલાક રાજકીય કારણો પણ છે.
બીજી તરફ વિદેશ મંત્રાલયે જસ્ટિન ટ્રુડોના કબૂલાત પર પણ પ્રહારો કર્યા છે, જેમાં કેનેડાના વડાપ્રધાને સ્વીકાર્યું હતું કે નિજ્જર કેસમાં ભારત સાથે માત્ર ગુપ્ત માહિતી જ શેર કરવામાં આવી હતી. કોઈ નક્કર પુરાવા નથી. રણધીર જયસ્વાલે કહ્યું કે અમે આ ખાસ મુદ્દા પર અમારી સ્થિતિ સ્પષ્ટ રાખી છે. તમારે છેલ્લા બે દિવસની પ્રેસ રિલીઝ જોઈ જ હશે જેમાં અમે કહ્યું છે કે કેનેડાએ સપ્ટેમ્બર 2023 પછી અમારી સાથે કોઈ માહિતી શેર કરી નથી.
તેમણે કહ્યું કે ગઈકાલે (બુધવારે) જાહેર પૂછપરછ અને સુનાવણી દરમિયાન અમે ફરીથી એક નિવેદન બહાર પાડ્યું જેમાં અમે કહ્યું કે કેનેડાએ માત્ર ગંભીર આરોપો જ લગાવ્યા છે પરંતુ આ આરોપો અંગે કોઈ પુરાવા આપ્યા નથી. જ્યાં સુધી આરોપોનો સંબંધ છે ત્યાં સુધી કેનેડાએ ગંભીર આરોપો લગાવ્યા છે. જ્યાં સુધી પ્રશ્નનો સંબંધ છે ગઈકાલે વડાપ્રધાન ટ્રુડોએ પોતે જે સ્વીકાર્યું હતું તે તેમના આરોપોનું મૂલ્ય દર્શાવે છે. જયસ્વાલે કહ્યું કે અમે અમારા રાજદ્વારીઓ પર લાગેલા આરોપોને સંપૂર્ણપણે નકારીએ છીએ.
કેનેડાના વડા પ્રધાન જસ્ટિસ ટ્રુડોએ બુધવારે ચૂંટણી પ્રક્રિયાઓ અને લોકતાંત્રિક સંસ્થાઓમાં વિદેશી હસ્તક્ષેપની તપાસ કરી રહેલા સ્વતંત્ર પંચ સમક્ષ સ્વીકાર્યું હતું કે તેમણે ખાલિસ્તાની અલગતાવાદી હરદીપ સિંહ નિજ્જરની હત્યામાં ભારતીય સરકારના એજન્ટોની સંડોવણી હોવાની શંકા વ્યક્ત કરી હતી. કેનેડાના પીએમે કહ્યું કે ગયા વર્ષે આરોપો મૂકતી વખતે તેમની પાસે માત્ર ગુપ્ત માહિતી હતી.
તેમણે કહ્યું કે ભારતીય રાજદ્વારીઓ પીએમ નરેન્દ્ર મોદીની સરકારની ટીકા કરનારા કેનેડિયનો વિશે માહિતી એકત્ર કરી રહ્યા છે અને તેને ભારત સરકારના ઉચ્ચ અધિકારીઓ અને લોરેન્સ બિશ્નોઈ ગેંગ જેવા ગુનાહિત સંગઠનો સુધી પહોંચાડી રહ્યા છે. ટ્રુડોએ જણાવ્યું હતું કે તેમની પાસે દેશની ગુપ્તચર એજન્સી અને સંભવતઃ ફાઇવ આઇઝ સભ્ય દેશોની સંયુક્ત ગુપ્તચર એજન્સીઓ પાસેથી વિશ્વસનીય માહિતી છે કે કેનેડાની ધરતી પર કેનેડિયનની હત્યામાં ભારત સરકારના એજન્ટો સામેલ હતા. આ બાબત તેમની સરકારે ખૂબ જ ગંભીરતાથી લીધી હતી. કેનેડા ઉપરાંત ફાઈવ આઈઝમાં યુએસ, બ્રિટન, ઓસ્ટ્રેલિયા અને ન્યુઝીલેન્ડનો સમાવેશ થાય છે.
લોરેન્સ બિશ્નોઈ ગેંગ પર ટ્રુડોએ શું કહ્યું?
કેનેડાના વડા પ્રધાન જસ્ટિન ટ્રુડોએ વિદેશી હસ્તક્ષેપ કમિશનમાં જણાવ્યું હતું કે મોદી સરકારનો વિરોધ કરનારા કેનેડિયનોની માહિતી ઉચ્ચ સ્તરે ભારત સરકારને આપવામાં આવી હતી જે પછી લોરેન્સ બિશ્નોઈ ગેંગ જેવા ગુનાહિત સંગઠનો દ્વારા કેનેડિયનો વિરુદ્ધ હિંસા તરફ દોરી ગઈ હતી. અમે ભારતીય રાજદ્વારીઓની પૂછપરછ કરવા માગતા હતા, પરંતુ તેઓએ તેમની રાજદ્વારી પ્રતિરક્ષા છોડી ન હતી તેથી અમારે તેમને ત્યાંથી જવાનું કહ્યું હતું.
