બિહાર(Bihar): પટના(Patna)ના ફુલવારી શરીફ વિસ્તારમાં બે આતંકવાદી(Terrorist) ઝડપાતા ફફડાટ ફેલાઈ જવા પામ્યો છે. તેઓના નિશાન પર વડાપ્રધાન મોદી(PM Modi)ની બિહાર મુલાકાત હતી. જેના માટે તેઓ 12 જુલાઈના રોજ પટના પહોંચ્યા હતા. હુમલા માટે પીએમની મુલાકાતના 15 દિવસ પહેલા ફુલવારી શરીફમાં શંકાસ્પદ આતંકવાદીઓની તાલીમ પણ શરૂ થઈ ગઈ હતી. પોલીસે દરોડા પાડ્યા બાદ શકમંદો ઝડપાયા હતા. પોલીસે આ કેસમાં 2 લોકોની ધરપકડ કરી છે. ધરપકડ કરાયેલા બે આતંકવાદીઓમાંથી એક ઝારખંડ(Jharkhand) પોલીસ(Police)ના નિવૃત્ત પોલીસ અધિકારી મોહમ્મદ જલાલુદ્દીન છે અને બીજો અતહર પરવેઝ છે. અતહર પરવેઝ પટનાના ગાંધી મેદાનમાં બોમ્બ બ્લાસ્ટના આરોપી મંજરનો સાચો ભાઈ છે.
આરોપીઓ શરીફ વિસ્તારમાં આતંકી શાળા ચલાવી રહ્યા હતા
પોલીસે જણાવ્યું છે કે બંને શંકાસ્પદ આતંકવાદીઓની કડી પોપ્યુલર ફ્રન્ટ ઓફ ઈન્ડિયા (PFI) અને સોશિયલ ડેમોક્રેટિક પાર્ટી ઓફ ઈન્ડિયા (SDPI) સાથે સંબંધિત છે. પોલીસે બંને પાસેથી PFI ફ્લેગ, બુકલેટ, પેમ્ફલેટ અને ઘણા શંકાસ્પદ દસ્તાવેજો જપ્ત કર્યા છે. જેમાં 2047 સુધીમાં ભારતને ઈસ્લામિક દેશ બનાવવાનો ઉલ્લેખ કરવામાં આવ્યો છે. પોલીસે જણાવ્યું છે કે આ બે શંકાસ્પદ આતંકવાદીઓ છેલ્લા કેટલાક સમયથી પટનાના ફુલવારી શરીફ વિસ્તારમાં આતંકી શાળા ચલાવી રહ્યા હતા. પોલીસના જણાવ્યા અનુસાર અતહર પરવેઝ માર્શલ આર્ટ અને શારીરિક શિક્ષણ આપવાના નામે મોહમ્મદ જલાલુદ્દીનની એનજીઓ ચલાવતો હતો. મળતી માહિતી મુજબ, અતહરે 16 હજાર રૂપિયાના ભાડા પર મોહમ્મદ જલાલુદ્દીનના ફુલવારીશરીફ સ્થિત ના નયા ટોલા વિસ્તારના અહેમદ પેલેસમાં ફ્લેટ લીધો હતો જ્યાંથી તે દેશ વિરોધી અભિયાન ચલાવી રહ્યો હતો.
NGOના નામે આતંકી ફેક્ટરીઓ ચાલતા હતા
કહેવામાં આવી રહ્યું છે કે અતહર પરવેઝ અને મોહમ્મદ જલાલુદ્દીન બંને NGOના નામે આતંકી ફેક્ટરીઓ ચલાવતા હતા અને તેમનો મુખ્ય ઉદ્દેશ્ય મુસ્લિમોને હિન્દુઓ વિરુદ્ધ ઉશ્કેરવાનો હતો. બંને મુસ્લિમ યુવાનોને હથિયાર ચલાવવાની તાલીમ આપતા હતા અને પછી રાષ્ટ્રીય સ્તરે, રાજ્ય સ્તરે, જિલ્લા સ્તરે પીએફઆઈ અને એસડીપીઆઈના સક્રિય સભ્યો સાથે મીટિંગમાં તેઓને જામીન અપાવતા હતા અને આતંકવાદી તાલીમ પણ આપતા હતા.
ઘણા યુવાનોને તાલીમ માટે બોલાવ્યા હતા
પોલીસે જણાવ્યું હતું કે 6 અને 7 જુલાઈના રોજ અતહર પરવેઝે માર્શલ આર્ટ અને શારીરિક શિક્ષણ આપવાના નામે ઘણા યુવાનોને ભાડે રાખેલી ઓફિસમાં બોલાવ્યા હતા અને પછી તેમને હથિયાર ચલાવવાની તાલીમ આપવા અને ધાર્મિક ઉન્માદ ફેલાવવા માટે ઉશ્કેર્યા હતા. IBને માહિતી મળી હતી કે પટનાના ફુલવારી શરીફ વિસ્તારમાં સંભવિત આતંકવાદી મોડ્યુલ કાર્યરત છે, જેના પછી પોલીસ અને કેન્દ્રીય એજન્સીઓએ 11 જુલાઈએ નયા ટોલા વિસ્તારમાં દરોડા પાડ્યા હતા અને બંને શંકાસ્પદ આતંકવાદીઓની ધરપકડ કરી હતી.
આ દેશો દ્વારા કરાતું હતું ફડિંગ
એવું પણ બહાર આવ્યું છે કે મોટા ભાગના યુવાનો કેરળ, પશ્ચિમ બંગાળ, ઉત્તર પ્રદેશ, તમિલનાડુ અને અન્ય ઘણા રાજ્યોમાંથી આતંકવાદની તાલીમ લેવા માટે અહીં આવતા હતા. પોલીસે ખુલાસો કર્યો છે કે આ બે શંકાસ્પદ આતંકવાદીઓ પાકિસ્તાન, બાંગ્લાદેશ અને તુર્કી સહિતના ઘણા ઇસ્લામિક દેશોમાંથી નાણાં ભંડોળ મેળવતા હતા જેથી તે દેશમાં રહીને રાષ્ટ્રવિરોધી અભિયાન ચલાવી શકે.
