મુંબઈ: ભારતીય શેરબજારમાં (Indian Share Market) આજે સતત ચોથા ટ્રેડિંગ (Trading) દિવસે જબરદસ્ત વૃદ્ધિ જોવા મળી હતી. સોમવારે બંને બજાર સેન્સેક્સ (Sensex) અને નિફ્ટી (Nifty) વધારા સાથે ગ્રીન ઝોનમાં ખુલ્યા હતા અને ટ્રેડિંગના અંતે નવા ઉચ્ચ સ્તરે બંધ થયા હતા. બોમ્બે સ્ટોક એક્સચેન્જ (BSE)નો 30 શેરો ધરાવતો સેન્સેક્સ 486 પોઈન્ટના ઉછાળા સાથે પ્રથમ વખત 65,000ને પાર કરી ગયો હતો, જ્યારે નેશનલ સ્ટોક એક્સચેન્જનો નિફ્ટી 133 પોઈન્ટના વધારા સાથે 19,300ની ઉપર બંધ થયો હતો.
સપ્તાહના પહેલા દિવસે BSEનું માર્કેટ કેપ આટલું વધ્યું
શેરબજારની શરૂઆત તેજી સાથે લીલા નિશાન પર થઈ. સોમવારે ટ્રેડિંગની શરૂઆતમાં, સવારે 9.15 વાગ્યે, BSE નો સેન્સેક્સ 282.85 પોઈન્ટ અથવા 0.44% વધીને 65,001.41 પર ખૂલ્યો હતો, જ્યારે NSEનો નિફ્ટી 81.30 પોઈન્ટ અથવા 0.42% વધીને 19,270.30 પર હતો. આ પછી જેમ જેમ દિવસનો ધંધો આગળ વધતો ગયો તેમ તેમ આ સ્પીડ પણ વધી હતી.
ટ્રેડિંગના અંતે સેન્સેક્સ 486.49 પોઈન્ટ વધીને 65,205.05 પર બંધ થયો હતો, જ્યારે નિફ્ટી 133.50 પોઈન્ટ વધીને 19,322.55 પર બંધ થયો હતો. બેંક નિફ્ટીમાં પણ જોરદાર તેજી જોવા મળી હતી. ટ્રેડિંગના અંતે 1910 શેરોમાં વધારો નોંધાયો હતો, જ્યારે 1688 શેરોમાં ઘટાડો જોવા મળ્યો હતો.
સેન્સેક્સ અને નિફ્ટી-50ની જેમ બેન્ક નિફ્ટીએ પણ સોમવારની શરૂઆતથી જ જોર પકડ્યું હતું. કારોબારના અંતે બેંક નિફ્ટી 410.75 પોઈન્ટના ઉછાળા સાથે 45,158.10ના સ્તરે બંધ રહ્યો હતો. દરમિયાન, સ્થાનિક શેરબજારમાં તેજી સાથે, BSE પર લિસ્ટેડ કંપનીઓનું માર્કેટ કેપિટલાઇઝેશન રેકોર્ડ 297.94 લાખ કરોડે પહોંચ્યું હતું.
રોકાણકારોએ આટલા કરોડની કમાણી કરી
BSE પર લિસ્ટેડ કંપનીઓની કુલ માર્કેટ કેપિટલાઇઝેશન આજે વધીને રૂ. 297.94 લાખ કરોડ થઈ છે, જે તેના પાછલા ટ્રેડિંગ દિવસે એટલે કે શુક્રવાર, 30 જૂનના રોજ બિઝનેસ બંધ થવા પર રૂ. 296.48 લાખ કરોડ હતી. જો આ રીતે જોવામાં આવે તો એક જ દિવસમાં રોકાણકારોની સંપત્તિમાં 1.46 લાખ કરોડ રૂપિયાનો વધારો થયો છે.
આ શેરોમાં જોરદાર ઉછાળો
શેરબજારમાં આ ઉછાળા દરમિયાન ગ્રાસિમ ઇન્ડસ્ટ્રીઝના શેરમાં સૌથી વધુ વધારો જોવા મળ્યો હતો અને ગ્રાસિમ ઇન્ડસ્ટ્રીઝનો શેર 3.40 ટકાના વધારા સાથે રૂ. 1,792.70 પર બંધ થયો હતો. આઇટીસી, બીપીસીએલ, રિલાયન્સ ઇન્ડસ્ટ્રીઝ (આરઆઇએલ) અને બજાજ ફાઇનાન્સ ઝડપી મૂવિંગ શેરોમાં સામેલ હતા.
દરમિયાન, પાવર ગ્રીડ કોર્પના શેરમાં સૌથી મોટો ઘટાડો નોંધાયો હતો અને તે 1.82 ટકાના ઘટાડા સાથે રૂ. 250.50 પર બંધ થયો હતો. ઘટતા શેરોમાં બજાજ ઓટો, પાવર ગ્રીડ કોર્પ, સન ફાર્મા, સિપ્લા અને ડૉ. રેડ્ડીઝ લેબોરેટરીઝનો સમાવેશ થાય છે. મર્જર પછી HDFCના શેરમાં વધારો ચાલુ છે. મુકેશ અંબાણીની આગેવાની હેઠળની રિલાયન્સ ઇન્ડસ્ટ્રીઝના શેરમાં વધારાની વાત કરીએ તો, તેઓ 2.42 ટકાના વધારા સાથે રૂ. 2,612.00 પર બંધ થયા છે.
આ સિવાય મર્જર બાદ HDFC લિમિટેડ અને HDFC બેંકના શેરમાં પણ સતત વધારો જોવા મળી રહ્યો છે. આ મર્જર 1 જુલાઇ 2023 થી અમલમાં આવ્યું છે અને અઠવાડિયાના પ્રથમ ટ્રેડિંગ દિવસે બંને કંપનીઓના શેર લાભ સાથે બંધ થયા છે. હાઉસિંગ ડેવલપમેન્ટ ફાઇનાન્સ કોર્પોરેશન લિમિટેડ (HDFC Ltd)નો શેર 1.79 ટકા વધીને રૂ. 2,872.55 પર બંધ થયો હતો. તે જ સમયે, HDFC બેન્કનો શેર 1.15 ટકા વધીને રૂ. 1,721.00 પર બંધ થયો હતો.
