અમેરિકાના મિશિગન રાજ્યના રાજકારણમાં ભારતીય-અમેરિકન સમુદાય માટે નોંધપાત્ર સિદ્ધિ સામે આવી છે. ડેમોક્રેટિક પાર્ટીના 42 વર્ષીય નેતા રંજીવ પુરી મિશિગન હાઉસ ઓફ રિપ્રેઝન્ટેટિવ્સના સ્પીકર તરીકે ચૂંટાયા છે. આ પદ પર પહોંચનારા તેઓ પ્રથમ ભારતીય-અમેરિકન હોવાનું જણાવવામાં આવ્યું છે. સ્પીકર તરીકેની પસંદગી બાદ પુરીએ આ જવાબદારીને મોટું સન્માન ગણાવી સાથીદારોનો આભાર માન્યો હતો. તેમણે ગવર્નર જોસલિન બેન્સન અને સેનેટના મેજોરિટી લીડર ડેરીન કેમિલેરી સાથે મળીને ચૂંટણી પ્રચાર દરમિયાન આપેલાં વચનો પૂર્ણ કરવાની પ્રતિબદ્ધતા વ્યક્ત કરી હતી.
પંજાબી મૂળના અપ્રવાસી માતા-પિતાના પરિવારમાં જન્મેલા રંજીવ પુરીએ પોતાની આ ઐતિહાસિક સિદ્ધિ પર ભાવુક પ્રતિક્રિયા આપી હતી. તેમણે માતા-પિતાના સંઘર્ષને યાદ કરતાં કહ્યું હતું કે જ્યારે તેઓ અમેરિકા આવ્યા હતા, ત્યારે તેમણે ક્યારેય કલ્પના પણ નહીં કરી હોય કે તેમનો પુત્ર એક દિવસ મિશિગન હાઉસનું નેતૃત્વ કરશે. પુરીએ આ સિદ્ધિને અમેરિકામાં મળતી તકોનું ઉદાહરણ ગણાવ્યું હતું. તેમણે ગવર્નર અને સેનેટના નેતૃત્વ સાથે મળીને રાજ્યના નાગરિકોને આપેલાં વચનો પૂર્ણ કરવાની વાત પણ કરી હતી.
રંજીવ પુરીની રાજકીય સફર પૂર્વ અમેરિકી પ્રમુખ બરાક ઓબામાના ચૂંટણી પ્રચાર અભિયાનથી શરૂ થઈ હતી. તેમણે વર્ષ 2008 અને 2012માં ઓબામાના ચૂંટણી પ્રચારમાં મહત્વની ભૂમિકા ભજવી હતી. ત્યારબાદ તેમણે યુનિવર્સિટી ઓફ શિકાગોની બૂથ સ્કૂલ ઓફ બિઝનેસમાંથી MBAની ડિગ્રી મેળવી હતી. અભ્યાસ પૂર્ણ કર્યા બાદ તેઓ મિશિગન પરત ફર્યા હતા અને ઓટોમોટિવ ક્ષેત્રમાં કામ કર્યું હતું.
વર્ષ 2020માં તેઓ મિશિગન હાઉસ ઓફ રિપ્રેઝન્ટેટિવ્સમાં ચૂંટાયા હતા. આ સાથે તેઓ રાજ્યની વિધાનસભામાં ચૂંટાનારા પ્રથમ શીખ અમેરિકન બન્યા હતા. ત્યારબાદ તેમણે સતત રાજકીય જવાબદારીઓ સંભાળી હતી. વર્ષ 2025માં તેમને મિશિગન હાઉસમાં ડેમોક્રેટિક પાર્ટીના નેતા તરીકે પસંદ કરવામાં આવ્યા હતા. હવે તેઓ 2027-28ના વિધાનસભા કાર્યકાળ દરમિયાન સ્પીકર તરીકે જવાબદારી સંભાળશે.
રંજીવ પુરીની પસંદગી પર ભારતીય-અમેરિકન સમુદાયમાં પણ ખુશી વ્યક્ત કરવામાં આવી છે. ‘ઈન્ડિયન અમેરિકન ઈમ્પેક્ટ’ના એક્ઝિક્યુટિવ ડિરેક્ટર ચિંતન પટેલે તેમને અભિનંદન પાઠવ્યા હતા. તેમણે જણાવ્યું હતું કે પુરીએ આરોગ્ય સેવાઓ અને આવાસનો ખર્ચ ઘટાડવા જેવા મુદ્દાઓ પર કામ કર્યું છે, જેથી સામાન્ય પરિવારો માટે જીવન વધુ સરળ બની શકે. તેમણે આશા વ્યક્ત કરી હતી કે પુરી દક્ષિણ એશિયાઈ સમુદાયો સહિત મિશિગનના તમામ નાગરિકોના અધિકારો અને સુરક્ષા માટે મજબૂત અવાજ બનશે. રંજીવ પુરીની આ પસંદગી ભારતીય મૂળના લોકો માટે અમેરિકાના રાજકીય ક્ષેત્રમાં વધતી ભાગીદારીનું વધુ એક ઉદાહરણ બની છે. જોકે, તેઓ સ્પીકર તરીકે સત્તાવાર રીતે જાન્યુઆરી 2027થી જવાબદારી સંભાળશે. મિશિગન હાઉસમાં તેમની નવી ભૂમિકા દરમિયાન આરોગ્ય, આવાસ અને સામાન્ય નાગરિકોના જીવનનિર્વાહના ખર્ચ જેવા મુદ્દાઓ પર તેમનું ધ્યાન રહેવાની અપેક્ષા છે.
