Latest News

ભારત આજે વૈશ્વિક રાજનીતિના એક મહત્વપૂર્ણ મંચનું યજમાન બનવા જઈ રહ્યું છે. અમેરિકા, ભારત,જાપાન,ઓસ્ટ્રેલિયાના વિદેશ મંત્રીઓની મહત્વપૂર્ણ QUAD (ક્વાડ) બેઠક યોજાઈ રહી છે, જેમાં ઈન્ડો-પેસિફિક ક્ષેત્રની સુરક્ષા ,વૈશ્વિક વેપાર તથા દરિયાઈ માર્ગોની સલામતી અને મધ્ય પૂર્વમાં વધતા તણાવ જેવા અનેક મહત્વપૂર્ણ મુદ્દાઓ પર ચર્ચા થવાની છે.આ બેઠક એવા સમયે યોજાઈ રહી છે જ્યારે વિશ્વના અનેક વિસ્તારોમાં ભૂરાજકીય અસ્થિરતા વધી રહી છે. ખાસ કરીને ઈરાન અને અમેરિકા વચ્ચે વધેલા તણાવ, હોર્મુઝ જળસંધિમાં સુરક્ષા સંબંધિત પડકારો અને ચીનની વધતી પ્રાદેશિક સક્રિયતા QUAD દેશો માટે ચિંતાનો વિષય બની છે.

QUAD શું છે?
QUAD એટલે Quadrilateral Security Dialogue, જેમાં ચાર લોકશાહી દેશો – India, United States, Japan અને Australia સામેલ છે.આ સંગઠનનો મુખ્ય હેતુ ઈન્ડો-પેસિફિક ક્ષેત્રમાં શાંતિ, સ્થિરતા, મુક્ત વેપાર અને નિયમ આધારિત આંતરરાષ્ટ્રીય વ્યવસ્થાને મજબૂત બનાવવાનો છે. છેલ્લા કેટલાક વર્ષોમાં QUADનું મહત્વ સતત વધતું ગયું છે અને તેને ચીનના વધતા પ્રભાવ સામે વ્યૂહાત્મક મંચ તરીકે પણ જોવામાં આવે છે.

હોર્મુઝ જળસંધિ મુખ્ય એજન્ડા પર
તાજેતરમાં ઈરાન અને અમેરિકા વચ્ચે વધેલા તણાવને કારણે હોર્મુઝ જળસંધિ ફરી વૈશ્વિક ચર્ચાના કેન્દ્રમાં આવી છે. વિશ્વના લગભગ 20 ટકા જેટલા કાચા તેલનું પરિવહન આ જળમાર્ગ મારફતે થાય છે.જો હોર્મુઝ વિસ્તારમાં કોઈપણ પ્રકારનો વિઘ્ન ઊભો થાય તો તેની સીધી અસર વૈશ્વિક તેલ બજાર, ઊર્જા સુરક્ષા અને આંતરરાષ્ટ્રીય વેપાર પર પડી શકે છે. QUAD દેશો આ વિસ્તારની સુરક્ષા અને સમુદ્રી માર્ગોને ખુલ્લા રાખવા માટે સંકલિત વ્યૂહરચના અંગે ચર્ચા કરી શકે છે.

ઈન્ડો-પેસિફિક ક્ષેત્રમાં ચીનની વધતી સક્રિયતા
બેઠકમાં દક્ષિણ ચીન સમુદ્ર, પૂર્વ ચીન સમુદ્ર અને ઈન્ડો-પેસિફિક વિસ્તારમાં ચીનની વધતી સૈન્ય અને આર્થિક સક્રિયતા પર પણ ચર્ચા થવાની શક્યતા છે.ભારત સહિત QUADના તમામ સભ્ય દેશો લાંબા સમયથી મુક્ત અને ખુલ્લા ઈન્ડો-પેસિફિકના સમર્થક રહ્યા છે. વિશ્લેષકોનું માનવું છે કે બેઠક દરમિયાન પ્રાદેશિક સુરક્ષા, નૌકાદળ સહયોગ અને સંયુક્ત અભ્યાસોને વધુ મજબૂત બનાવવાના મુદ્દા પર ભાર મૂકવામાં આવશે.

આતંકવાદ સામે સંયુક્ત લડત
તાજેતરના આતંકવાદી હુમલાઓ અને વૈશ્વિક સુરક્ષા પડકારોને ધ્યાનમાં રાખીને આતંકવાદ વિરોધી સહયોગ પણ બેઠકનો મહત્વપૂર્ણ મુદ્દો રહેશે.QUAD દેશો ગુપ્તચર માહિતીની આપ-લે, આતંકવાદી નેટવર્ક સામે કાર્યવાહી અને સાયબર સુરક્ષા જેવા ક્ષેત્રોમાં સહયોગ વધારવા અંગે ચર્ચા કરશે. ભારત લાંબા સમયથી આંતરરાષ્ટ્રીય આતંકવાદ સામે વધુ કડક વૈશ્વિક સહયોગની માંગ કરતું આવ્યું છે.

ટેક્નોલોજી અને સપ્લાય ચેઇન પર પણ ભાર
બેઠકમાં આર્ટિફિશિયલ ઇન્ટેલિજન્સ (AI), સેમિકન્ડક્ટર ઉત્પાદન, મહત્વપૂર્ણ ખનિજો (Critical Minerals), સાયબર સુરક્ષા અને વૈશ્વિક સપ્લાય ચેઇનને વધુ મજબૂત બનાવવાના મુદ્દાઓ પણ સામેલ છે. કોરોના મહામારી અને વૈશ્વિક રાજકીય સંઘર્ષો બાદ સપ્લાય ચેઇન સુરક્ષા QUAD દેશો માટે પ્રાથમિકતા બની છે. ખાસ કરીને ટેક્નોલોજી ક્ષેત્રમાં ચીન પરની નિર્ભરતા ઘટાડવા માટે વિકલ્પો શોધવાની દિશામાં ચર્ચા થઈ શકે છે.

ભારત માટે કેમ મહત્વપૂર્ણ છે આ બેઠક?
ભારત માટે QUAD માત્ર સુરક્ષા મંચ નથી પરંતુ વ્યૂહાત્મક ભાગીદારી, વેપાર, ટેક્નોલોજી અને વૈશ્વિક નેતૃત્વને મજબૂત બનાવવાનો મહત્વપૂર્ણ પ્લેટફોર્મ છે.ભારત હાલ વૈશ્વિક રાજકારણમાં વધુ સક્રિય ભૂમિકા ભજવી રહ્યું છે. આવી સ્થિતિમાં નવી દિલ્હીમાં યોજાતી આ બેઠક ભારતની વધતી આંતરરાષ્ટ્રીય પ્રતિષ્ઠાનું પણ પ્રતિબિંબ માનવામાં આવી રહી છે.ભારત હંમેશા મુક્ત, ખુલ્લા અને સમાવેશક ઈન્ડો-પેસિફિક ક્ષેત્રની વકાલાત કરતું આવ્યું છે. QUADના માધ્યમથી ભારત પોતાની સુરક્ષા અને આર્થિક હિતોને વધુ મજબૂત બનાવવા પ્રયાસ કરી રહ્યું છે.

વિશ્વની નજર બેઠક પર
આ બેઠક એવા સમયે યોજાઈ રહી છે જ્યારે મધ્ય પૂર્વમાં સંઘર્ષ, યુક્રેન યુદ્ધ, ચીન-તાઈવાન તણાવ અને વૈશ્વિક આર્થિક પડકારો વિશ્વ માટે ચિંતાનો વિષય બન્યા છે.એવા સંજોગોમાં QUAD દેશોની બેઠકમાંથી બહાર આવતા નિર્ણયો માત્ર ઈન્ડો-પેસિફિક વિસ્તાર માટે જ નહીં પરંતુ સમગ્ર વિશ્વની સુરક્ષા અને આર્થિક સ્થિરતા માટે પણ મહત્વપૂર્ણ સાબિત થઈ શકે છે.વિશ્વભરના રાજકીય વિશ્લેષકો અને વ્યૂહાત્મક નિષ્ણાતોની નજર હવે આ બેઠક પર ટકેલી છે. હોર્મુઝ જળસંધિની સુરક્ષા, ચીનની પ્રાદેશિક ભૂમિકા, આતંકવાદ વિરોધી સહયોગ અને ટેક્નોલોજીકલ ભાગીદારી જેવા મુદ્દાઓ પર લેવામાં આવતા નિર્ણયો આગામી સમયમાં વૈશ્વિક રાજકારણની દિશા નક્કી કરવામાં મહત્વપૂર્ણ ભૂમિકા ભજવી શકે છે.