Latest News

મિડલ ઇસ્ટમાં વધતા તણાવ અને હોર્મુઝ સ્ટ્રેટ પર ઊભા થયેલા સંકટ વચ્ચે ચીને અમેરિકાને કડક સંદેશ આપતા તાત્કાલિક સૈન્ય કાર્યવાહી રોકી રાજદ્વારી વાતચીત તરફ આગળ વધવાની અપીલ કરી છે. આ નિવેદન એવા સમયે આવ્યું છે જ્યારે અમેરિકન પ્રમુખ ડોનાલ્ડ ટ્રમ્પે ચીન સહિત બ્રિટન, ફ્રાન્સ અને જાપાન જેવા દેશોને આંતરરાષ્ટ્રીય દરિયાઈ માર્ગની સુરક્ષા માટે પોતાના યુદ્ધ જહાજો તૈનાત કરવાની અપીલ કરી છે. બેઇજિંગમાં ચીનના વિદેશ મંત્રાલયના પ્રવક્તા લિન જિયાને સ્પષ્ટ કર્યું કે હોર્મુઝ વિસ્તારમાં વધતો સૈન્ય તણાવ આંતરરાષ્ટ્રીય વેપાર, ઊર્જા પુરવઠો અને પ્રાદેશિક શાંતિ માટે ગંભીર જોખમ બની રહ્યો છે. તેમણે ચેતવણી આપી કે પરિસ્થિતિ વધુ બગડશે તો તેની સીધી અસર વૈશ્વિક અર્થતંત્ર પર પડશે. ઈઝરાયલ, અમેરિકા અને ઈરાન વચ્ચે ચાલી રહેલા ટકરાવને કારણે હાલ પરિસ્થિતિ અત્યંત સંવેદનશીલ બની છે, અને ખાસ કરીને અમેરિકન હુમલામાં ઈરાનના સર્વોચ્ચ નેતા આયતુલ્લા અલી ખામેનેઈના અવસાન બાદ ચીને આ મુદ્દે આકરી પ્રતિક્રિયા નોંધાવી છે.

હોર્મુઝ સ્ટ્રેટ વિશ્વના સૌથી મહત્વપૂર્ણ દરિયાઈ માર્ગોમાંનો એક હોવાથી તેની સ્થિતિ વૈશ્વિક ઊર્જા બજાર માટે અત્યંત નિર્ણાયક છે. આ માર્ગથી વિશ્વના મોટા ભાગના દેશોમાં ઓઇલ અને ગેસનો પુરવઠો પસાર થાય છે, અને ઈરાન દ્વારા આ માર્ગને અસરકારક રીતે અવરોધાતા તેલના ભાવમાં વધારો નોંધાઈ રહ્યો છે. નિષ્ણાતો માને છે કે જો આ પરિસ્થિતિ લાંબા સમય સુધી યથાવત રહેશે તો વૈશ્વિક ઊર્જા સંકટ ઊભું થઈ શકે છે, જેનો પ્રભાવ સીધો અર્થતંત્ર અને વેપાર પર પડશે. આ તરફ, ટ્રમ્પે સોશિયલ મીડિયા મારફતે ચીન અને અન્ય દેશોને સહયોગ માટે દબાણ વધાર્યું છે અને સંકેત આપ્યો છે કે જો ચીન સહકાર નહીં આપે તો તેમની આગામી ચીન યાત્રા પણ રદ થઈ શકે છે. જોકે, ચીને સ્પષ્ટ કર્યું છે કે બંને દેશો વચ્ચે રાજદ્વારી વાતચીત હજુ ચાલુ છે અને તણાવ ઘટાડવા માટે પ્રયત્નો થઈ રહ્યા છે.